Yoga Vasistha · Chapter 3.65

pañcaṣaṣṭitamaḥ sargaḥ

śrīvasiṣṭha uvāca /
parasmātkāraṇādeva manaḥ prathamamutthitam /
mananātmakamābhogi tatsthameva sthitiṃ gatam

bhāvābhāvalasaddolaṃ tenāyamavalokyate /
sargaḥ sadasadābhāsaḥ pūrvagandha ivecchayā

na kaścidvidyate bhedo dvaitaikyakalanātmakaḥ /
brahmajīvamanomāyākartṛkarmajagaddṛśām

apārāvāravistārasaṃvitsalilavalganaiḥ /
cidekārṇava evāyaṃ svayamātmā vijṛmbhate

asatyamasthairyavaśātsatyaṃ saṃpratibhāsataḥ /
yathā svapnastathā cittaṃ jagatsadasadātmakam

na sannāsanna saṃjātaścetaso jagato bhramaḥ /
atha dhīsamavāyānāmindrajālamivotthitaḥ

dīrghaḥ svapnaḥ sthitiṃ yātaḥ saṃsārākhyo manobalāt /
asamyagdarśanātsthāṇāviva puṃspratyayo mudhā

anātmālokanāccittaṃ cittatvaṃ nānuśocati /
vetālakalpanādbāla iva saṃkalpite bhaye

anākhyasya svarūpasya sarvāśātigatātmanaḥ ./
cetyonmukhatayā cittaṃ cittājjīvatvakalpanam

jīvatvādapyahaṃbhāvastvahaṃbhāvācca cittatā /
cittatvādindriyāditvaṃ tato dehādivibhramāḥ

dehādimohataḥ svarganarakau mokṣabandhane /
bījāṅkuravadārambhasaṃrūḍhe dehakarmaṇoḥ

dvaitaṃ yathā nāsti cidātmajīvayo-
stathaiva bhedo'sti na jīvacittayoḥ /
yathaiva bhedo'sti na jīvacittayo-
stathaiva bhedo'sti na dehakarmaṇoḥ

karmaiva deho nanu deha eva
cittaṃ tadevāhamitīha jīvaḥ /
sa jīva eveśvaracitsa ātmā
sarvaḥ śivastvekapadoktametat

ityārṣe śrīvāsiṣṭhamahārāmāyaṇe vālmīkīye utpattiprakaraṇe līlopākhyāne jīvavicāro nāma pañcaṣaṣṭitamaḥ sargaḥ