Yoga Vasistha · Chapter 3.62

dviṣaṣṭitamaḥ sargaḥ

śrīvasiṣṭha uvāca /
paramāṇunimeṣāṇāṃ lakṣāṃśakalanāsvapi /
jagatkalpasahasrāṇi satyānīva vibhāntyalam

teṣvapyantastathaivāntaḥ paramāṇukaṇaṃ prati /
bhrāntirevamanantāho iyamityavabhāsate

vahantīmāḥ parāḥ sattāḥ śāntāḥ sargaparamparāḥ /
saliladravatevāntaḥsphuṭāvartavivartikā

mithyātmikaiva sargaśrīrbhavatīha mahāmarau /
tīradrumalatonmuktapuṣpālīva taraṅgiṇī

svapnendrajālapuravatsaṃkathehāpurādrivat /
saṃkalpavadasatyaiva bhāti sargānubhūtibhūḥ

śrīrāma uvāca /
ekātmaikatayaivaṃ hi jāte samyagvicāraṇāt /
nirvikalpātmavijñāne pare jñānavatāṃ vara

kimarthamiha tiṣṭhanti dehāstattvavidāmapi /
daivenaiva samākrāntā daivamatra ca kiṃ bhavet

śrīvasiṣṭha uvāca /
astīha niyatirbrāhmī cicchaktiḥ spandarūpiṇī /
avaśyabhavitavyaikasattā sakalakalpagā

ādisarge hi niyatirbhāvavaicitryamakṣayam /
anenetthaṃ sadā bhāvyamiti saṃpadyate param

mahāsatteti kathitā mahācitiriti smṛtā /
mahāśaktiriti khyātā mahādṛṣṭiriti sthitā

mahākriyeti gaditā mahodbhava iti smṛtā /
mahāspanda iti prauḍhā mahātmaikatayoditā

tṛṇānīva jagantyevamiti daityāḥ surā iti /
iti nāgā iti nagā ityākalpaṃ kṛtāsthitiḥ

kadācidbrahmasattāyā vyabhicāro'numīyate /
citramākāśakośe ca nānyathā niyateḥ sthitiḥ

viriñcayādyātmabhirbuddhairbodhāyāviditātmanām /
brahmātmaiva sā niyatiḥ sargo'yamiti kathyate

acalaṃ calavaddṛṣṭaṃ brahmāpūrya vyavasthitaḥ /
anādimadhyaparyantaṃ sargo vṛkṣa ivāmbare

pāṣāṇodaralekhaughanyāyenātmani tiṣṭhatā /
brahmaṇā niyatiḥ sargo buddho'bodhavateva kham

dehe yathāṅgino'ṅgādi dṛśyate citsvabhāvataḥ /
brahmaṇā padmajatvena niyatyādyaṅgakaṃ tathā

eṣā daivamiti proktā sarvaṃ sakalakālagam /
padārthamalamākramya śuddhā ciditi saṃsthitā

spanditavyaṃ padārthena bhāvyaṃ vā bhoktṛtāpadam /
anenetthamanenetthamavaśyamiti daivadhīḥ

eṣaiva puruṣaspandastṛṇagulmādi cākhilam /
eṣaiva sarvabhūtādi jagatkālakriyādi vā

anayā pauruṣī sattā sattāsyāḥ pauruṣeṇa ca /
lakṣyate bhuvanaṃ yāvaddve ekātmatayaiva hi

nareṇa pauruṣeṇaiva kārye sattātmake ubhe /
īdṛśyetena niyatirevaṃ niyatipauruṣe

praṣṭavyo'haṃ tvayā rāma daivapauruṣanirṇayaḥ /
maduktaṃ pauruṣaṃ pālyaṃ tvayeti niyatiḥ sthitā

bhojayiṣyati māṃ daivamiti daivaparāyaṇaḥ /
yattiṣṭhatyakriyo maunaṃ niyatereṣa niścayaḥ

na syādbuddhirna karmāṇi na vikārādi nākṛtiḥ /
kevalaṃ tvitthamākalpaṃ sthityā bhāvyamiti sthitāḥ

avaśyaṃbhavitavyaiṣā tvidamitthamiti sthitiḥ /
na śakyate laṅghayitumapi rudrādibuddhibhiḥ

pauruṣaṃ na parityājyametāmāśritya dhīmatā /
pauruṣeṇaiva rūpeṇa niyatirhi niyāmikā

apauruṣaṃ hi niyatiḥ pauruṣaṃ saiva sargagā /
niṣphalā'pauruṣākārā saphalā pauruṣātmikā

niyatyā mūkatāmetya niṣpauruṣatayā'kriyam /
yastiṣṭhati prāṇamarutspandastasya kva gacchati

atha prāṇakriyārodhamapi kṛtvā virāmadam /
yadi tiṣṭhati tatsādhurmukta eva kimucyate

pauruṣaikātmatā śreyo mokṣo'tyantamakartṛtā /
ābhyāṃ tu sabalaḥ pakṣo nirduḥkhaiva mahātmanām

niyatirbrahmasattābhā tasyāṃ cetpariṇamyate /
nūnaṃ paramaśuddhākhyaṃ tatprāptaiva parāgatiḥ

etairniyatyādimahāvilāsai-
brahmaiva visphūrjati sarvagātmā /
tṛṇādivallītarugulmajālaiḥ
satteva toyasya dharāntarasthā

ityārṣe śrīvāsiṣṭhamahārāmāyaṇe vālmīkīye utpattiprakaraṇe līlo० daivaśabdārthanirūpaṇaṃ nāma dviṣaṣṭitamaḥ sargaḥ