Yoga Vasistha · Chapter 3.6

ṣaṣṭhaḥ sargaḥ

śrīvasiṣṭha uvāca /
asya devādhidevasya parasya paramātmanaḥ /
jñānādeva parā siddhirna tvanuṣṭhānaduḥkhataḥ

atra jñānamanuṣṭhānaṃ natvanyadupayujyate /
mṛgatṛṣṇājalabhrāntiśāntau cedaṃ nirūpitam

nahyeṣa dūre nābhyāśe nālabhyo viṣame na ca /
svānandābhāsarūpo'sau svadehādeva labhyate

kiṃcinnopakarotyatra tapodānavratādikam /
svabhāvamātre viśrāntimṛte nātrāsti sādhanam

sādhusaṃgamasacchāstraparataivātra kāraṇam /
sādhanaṃ bādhanaṃ mohajālasya yadakṛtrimam

aryaṃ sadeva ityeva saṃparijñānamātrataḥ /
jantorna jāyate duḥkhaṃ jīvanmuktatvameti ca

śrīrāma uvāca /
saṃparijñātamātreṇa kilānenātmanātmanā /
punardoṣā na bādhante maraṇādyāḥ kadācana

devadevo mahāneṣa kuto dūrādavāpyate /
tapasā kena tīvreṇa kleśena kiyatāthavā

śrīvasiṣṭha uvāca /
svapauruṣaprayatnena vivekena vikāsinā /
sa devo jñāyate rāma na tapaḥsnānakarmabhiḥ

rāgadveṣatamaḥkrodhamadamātsaryavarjanam /
vinā rāma tapodānaṃ kleśa eva na vāstavam

rāgādyupahate citte vañcayitvā paraṃ dhanam /
yadarjyate tasya dānādyasyārthāstasya tatphalam

rāgādyupahate citte vratādi kriyate ca yat /
taddambhaḥ procyate tasya phalamasti manāṅga ca

tasmātpuruṣayatnena mukhyamauṣadhamāharet /
sacchāstrasajjanāsaṅgau saṃsṛtivyādhināśanau

atraikaṃ pauruṣaṃ yatnaṃ varjayitvetarā gatiḥ /
sarvaduḥkhakṣayaprāptau na kācidupapadyate

śrṛṇu tatpauruṣaṃ kīdṛgātmajñānasya labdhaye /
yena śāmyatyaśeṣeṇa rāgadveṣaviṣūcikā

yathāsaṃbhavayā vṛttyā lokaśāstrāviruddhayā /
saṃtoṣasaṃtuṣṭamanā bhogagandhaṃ parityajet

yathāsaṃbhavamudyogādanudvignatayā svayā /
sādhusaṃgamasacchāstraparatāṃ prathamaṃ śrayet

yathāprāptārthasaṃtuṣṭo yo garhitamupekṣate /
sādhusaṃgamasacchāstraparaḥ śīghraṃ sa mucyate

vicāreṇa parijñātasvabhāvasya mahāmateḥ /
anukampyā bhavantyete brahmaviṣṇvindraśaṃkarāḥ

deśe yaṃ sujanaprāyā lokāḥ sādhuṃ pracakṣate /
sa viśiṣṭaḥ sa sādhuḥ syāttaṃ prayatnena saṃśrayet

adhyātmavidyā vidyānāṃ pradhānaṃ tatkathāśrayam /
śāstraṃ sacchāstramityāhurmucyate tadvicāraṇāt

sacchāstrasatsaṃgamajairvivekai-
stathā vinaśyanti balādavidyāḥ /
yathā jalānāṃ katakānuṣaṅgā-
dyathā janānāṃ matayo'pi yogāt

ityārṣe śrīvāsiṣṭhamahārāmāyaṇe mokṣopāye utpattiprakaraṇe mumukṣuprayatnopadeśo nāma ṣaṣṭhaḥ sargaḥ