Yoga Vasistha · Chapter 3.59

śrīvasiṣṭha uvāca /
sarasvatī tathetyuktvā tatraivāntardhimāyayau /
prabhāte paṅkajaiḥ sārdhaṃ bubudhe sakalo janaḥ

āliliṅga ca tāṃ līlāṃ līlā ca dayitaṃ kramāt /
punaḥpunarmahānandānmṛtaṃ projjīvitaṃ punaḥ

tadāsīdrājasadanaṃ madamanmathamantharam /
ānandamattajanataṃ vādyageyaravākulam

jayamaṅgalapuṇyāhaghoṣaghuṃghumaghargharam /
tuṣṭapuṣṭajanāpūrṇaṃ rājalokavṛtāṅgaṇam

siddhavidyādharonmuktapuṣpavarṣasahasrabhṛt /
dhvananmṛdaṅgamurajakāhalāśaṅkhadundubhi

ūrdhvīkṛtabṛhaddhastahāstikastanitotkaṭam /
uttālatāṇḍavastraiṇapūrṇāṅgaṇalasaddhvani

mithaḥsaṃghaṭṭanipatajjanopāyanadanturam /
puṣpaśekharasaṃbhāramayasaṃsārasundaram

vikīrṇāpāditakṣaumaṃ mantrisāmantanāgaraiḥ /
sthūlapadmamayaṃ vyoma raktaistāṇḍavinīkaraiḥ

mattastrīkandharāvṛttalīlāndolitakuṇḍalam /
pravṛttapādasaṃpātaprollasatpuṣpakardamam

paṭṭavāsaḥśaranmeghavitānakavitānakam /
varāṅganāmukhairnṛtyaccandralakṣagṛhājiram

paralokādupānītā rājñī sā patireva ca /
iti nirvṛttagāthābhirjagurdeśāntare janāḥ

padmo bhūmipatiḥ śrutvā vṛttāntaṃ kathitaṃ manāk /
cakre snānaṃ samānītaiścatuḥsāgaravāribhiḥ

tato'bhiṣiṣicurviprā mantriṇo bhūbhujaśca tam /
labdhodayamanantehamamarendramivāmarāḥ

līlā līlā ca rājā ca jīvanmuktamahādhiyaḥ /
remire pūrvavṛttāntakathanaiḥ suratairiva

sarasvatyāḥ prasādena svapauruṣakṛtena tat /
prāptaṃ lokatrayaśreyaḥ padmeneti mahībhujā

sa jñaptijñānasaṃbuddho rājā līlādvayānvitaḥ /
cakre varṣāyutānyaṣṭau tatra rājyamaninditaḥ

jīvanmuktāsta ityevaṃ rājyaṃ varṣāyutāṣṭakam /
kṛtvā videhamuktatvamāseduḥ siddhasaṃvidaḥ

yadudayaviśadaṃ vidagdhamugdhaṃ
samucitamātmahitaṃ ca peśalaṃ ca /
tadakhilajanatoṣadaṃ svarājyaṃ
ciramanupālya sudaṃpatī vimuktau

ityārṣe śrīvāsiṣṭhamahārāmāyaṇe vālmīkīye līlopākhyāne padmanirvāṇaṃ nāmaikonaṣaṣṭitamaḥ sargaḥ