યોગવાસિષ્ઠ · અધ્યાય 3.59

શ્રીવસિષ્ઠ ઉવાચ ।
સરસ્વતી તથેત્યુક્ત્વા તત્રૈવાન્તર્ધિમાયયૌ ।
પ્રભાતે પઙ્કજૈઃ સાર્ધં બુબુધે સકલો જનઃ

આલિલિઙ્ગ ચ તાં લીલાં લીલા ચ દયિતં ક્રમાત્ ।
પુનઃપુનર્મહાનન્દાન્મૃતં પ્રોજ્જીવિતં પુનઃ

તદાસીદ્રાજસદનં મદમન્મથમન્થરમ્ ।
આનન્દમત્તજનતં વાદ્યગેયરવાકુલમ્

જયમઙ્ગલપુણ્યાહઘોષઘુંઘુમઘર્ઘરમ્ ।
તુષ્ટપુષ્ટજનાપૂર્ણં રાજલોકવૃતાઙ્ગણમ્

સિદ્ધવિદ્યાધરોન્મુક્તપુષ્પવર્ષસહસ્રભૃત્ ।
ધ્વનન્મૃદઙ્ગમુરજકાહલાશઙ્ખદુન્દુભિ

ઊર્ધ્વીકૃતબૃહદ્ધસ્તહાસ્તિકસ્તનિતોત્કટમ્ ।
ઉત્તાલતાણ્ડવસ્ત્રૈણપૂર્ણાઙ્ગણલસદ્ધ્વનિ

મિથઃસંઘટ્ટનિપતજ્જનોપાયનદન્તુરમ્ ।
પુષ્પશેખરસંભારમયસંસારસુન્દરમ્

વિકીર્ણાપાદિતક્ષૌમં મન્ત્રિસામન્તનાગરૈઃ ।
સ્થૂલપદ્મમયં વ્યોમ રક્તૈસ્તાણ્ડવિનીકરૈઃ

મત્તસ્ત્રીકન્ધરાવૃત્તલીલાન્દોલિતકુણ્ડલમ્ ।
પ્રવૃત્તપાદસંપાતપ્રોલ્લસત્પુષ્પકર્દમમ્

પટ્ટવાસઃશરન્મેઘવિતાનકવિતાનકમ્ ।
વરાઙ્ગનામુખૈર્નૃત્યચ્ચન્દ્રલક્ષગૃહાજિરમ્

પરલોકાદુપાનીતા રાજ્ઞી સા પતિરેવ ચ ।
ઇતિ નિર્વૃત્તગાથાભિર્જગુર્દેશાન્તરે જનાઃ

પદ્મો ભૂમિપતિઃ શ્રુત્વા વૃત્તાન્તં કથિતં મનાક્ ।
ચક્રે સ્નાનં સમાનીતૈશ્ચતુઃસાગરવારિભિઃ

તતોઽભિષિષિચુર્વિપ્રા મન્ત્રિણો ભૂભુજશ્ચ તમ્ ।
લબ્ધોદયમનન્તેહમમરેન્દ્રમિવામરાઃ

લીલા લીલા ચ રાજા ચ જીવન્મુક્તમહાધિયઃ ।
રેમિરે પૂર્વવૃત્તાન્તકથનૈઃ સુરતૈરિવ

સરસ્વત્યાઃ પ્રસાદેન સ્વપૌરુષકૃતેન તત્ ।
પ્રાપ્તં લોકત્રયશ્રેયઃ પદ્મેનેતિ મહીભુજા

સ જ્ઞપ્તિજ્ઞાનસંબુદ્ધો રાજા લીલાદ્વયાન્વિતઃ ।
ચક્રે વર્ષાયુતાન્યષ્ટૌ તત્ર રાજ્યમનિન્દિતઃ

જીવન્મુક્તાસ્ત ઇત્યેવં રાજ્યં વર્ષાયુતાષ્ટકમ્ ।
કૃત્વા વિદેહમુક્તત્વમાસેદુઃ સિદ્ધસંવિદઃ

યદુદયવિશદં વિદગ્ધમુગ્ધં
સમુચિતમાત્મહિતં ચ પેશલં ચ ।
તદખિલજનતોષદં સ્વરાજ્યં
ચિરમનુપાલ્ય સુદંપતી વિમુક્તૌ

ઇત્યાર્ષે શ્રીવાસિષ્ઠમહારામાયણે વાલ્મીકીયે લીલોપાખ્યાને પદ્મનિર્વાણં નામૈકોનષષ્ટિતમઃ સર્ગઃ