Yoga Vasistha · Chapter 3.55

pañcapañcāśaḥ sargaḥ

prabuddhalīlovāca /
yathaiva janturmriyate jāyate ca yathā punaḥ /
tanme kathaya deveśi punarbodhavivṛddhaye

śrīdevyuvāca /
nāḍīpravāhe vidhure yadā vātavisaṃsthitim /
jantuḥ prāpnoti hi tadā śāmyatīvāsya cetanā

śuddhaṃ hi cetanaṃ nityaṃ nodeti na ca śāmyati /
sthāvare jaṅgame vyomni śaile'gnau pavane sthitam

kevalaṃ vātasaṃrodhādyadā spandaḥ praśāmyati /
mṛta ityucyate dehastadāsau jaḍanāmakaḥ

tasmindehe śavībhūte vāte cānilatāṃ gate /
cetanaṃ vāsanāmuktaṃ svātmatattve'vatiṣṭhati

jīva ityucyate tasya nāmāṇorvāsanāvataḥ /
tatraivāste sa ca śavāgāre gaganake tathā

tato'sau pretaśabdena procyate vyavahāribhiḥ /
cetanaṃ vāsanāmiśramāmodānilavatsthitam

idaṃ dṛśyaṃ parityajya yadāste darśanāntare /
sa svapna iva saṃkalpa iva nānākṛtistadā

tasminneva pradeśe'ntaḥ pūrvavatsmṛtimānbhavet /
tadaiva mṛtimūrcchānte paśyatyanyaśarīrakam

ātmanyasti ghaṭāpuṣṭamanyasya vyoma kevalam /
ākāśabhūtale sākaṃ sākāśaśaśivāsaram

bhavanti ṣaḍvidhāḥ pretāsteṣāṃ bhedamimaṃ śrṛṇu /
sāmānyapāpino madhyapāpinaḥ sthūlapāpinaḥ

sāmānyadharmā madhyamadharmā cottamadharmavān /
eteṣāṃ kasyacidbhedo dvau trayo'pyatha kasyacit

kaścinmahāpātakavānvatsaraṃ smṛtimūrcchanam /
vimūḍho'nubhavatyantaḥ pāṣāṇahṛdayopamaḥ

tataḥ kālena saṃbuddho vāsanājaṭharoditam /
anubhūya ciraṃ kālaṃ nārakaṃ duḥkhamakṣayam

bhuktvā yoniśatānyuccairduḥkhādduḥkhāntaraṃ gataḥ /
kadācicchamamāyāti saṃsārasvapnasaṃbhrame

athavā mṛtimohānte jaḍaduḥkhaśatākulām /
kṣaṇādvṛkṣāditāmeva hṛtsthāmanubhavanti te

svavāsanānurūpāṇi duḥkhāni narake punaḥ /
anubhūyātha yonīṣu jāyante bhūtale cirāt

atha madhyamapāpo yo mṛtimohādanantaram /
saśilājaṭharaṃ jāḍyaṃ kaṃcitkālaṃ prapaśyati

tataḥ prabuddhaḥ kālena kenacidvā tadaiva vā /
tiryagādikramairbhuktvā yonīḥ saṃsārameṣyati

mṛta evānubhavati kaścitsāmānyapātakī /
svavāsanānusāreṇa dehaṃ saṃpannamakṣatam

sa svapna iva saṃkalpa iva cetati tādṛśam /
tasminneva kṣaṇe tasya smṛtiritthamudeti ca

ye tūttamamahāpuṇyā mṛtimohādanantaram /
svargavidyādharapuraṃ smṛtyā svanubhavanti te/

tato'nyakarmasadṛśaṃ bhuktvānyatra phalaṃ nijam /
jāyante mānuṣe loke saśrīke sajjanāspade

ye ca madhyamadharmāṇo mṛtimohādanantaram /
te vyomavāyuvalitāḥ prayāntyoṣadhipallavam

tatra cāruphalaṃ bhuktvā praviśya hṛdayaṃ nṛṇām /
retasāmadhitiṣṭhanti garbhe jātikramocite

svavāsanānusāreṇa pretā etāṃ vyavasthitim /
mūrcchānte'nubhavantyantaḥ krameṇaivākrameṇa ca

ādau mṛtā vayamiti budhyante tadanukramāt /
bandhupiṇḍādidānena protpannā iti vedinaḥ

tato yamabhaṭā ete kālapāśānvitā iti /
nīyamānaḥ prayāmyebhiḥ kramādyamapuraṃ tviti

udyānāni vimānāni śobhanāni punaḥpunaḥ /
svakarmabhirupāttāni divyānītyeva puṇyavān

himānīkaṇṭakaśvabhraśastrapatravanāni ca /
svakarmaduṣkṛtotthāni saṃprāptānīti pāpavān

iyaṃ me saumyasaṃpātā saraṇiḥ śītaśādvalā /
snigdhacchāyā savāpīkā puraḥsaṃstheti madhyamaḥ

ayaṃ prāpto yamapuramahameṣa sa bhūtapaḥ /
ayaṃ karmavicāro'tra kṛta ityanubhūtimān

iti pratyekamabhyeti pṛthuḥ saṃsārakhaṇḍakaḥ /
yathāsaṃsthitaniḥśeṣapadārthācārabhāsuraḥ

ākāśa iva niḥśūnye śūnyātmaiva vibodhavān /
deśakālakriyādairghyabhāsuro'pi na kiṃcana

ito'yamahamādiṣṭaḥ svakarmaphalabhojane /
gacchāmyāśu śubhaṃ svargamito narakameva ca

yaḥ svargo'yaṃ mayā bhukto bhukto'yaṃ narako'tha vā /
imāstā yonayo bhuktā jāye'haṃ saṃsṛtau punaḥ

ayaṃ śālirahaṃ jātaḥ kramātphalamahaṃ sthitaḥ /
ityudarkaprabodhena budhyamāno bhaviṣyati

saṃsuptakaraṇastvevaṃ bījatāṃ yātyasau nare
tadbījaṃ yonigalitaṃ garbho bhavati mātari

sa garbho jāyate loke pūrvakarmānusārataḥ /
bhavyo bhavatyabhavyo vā bālako lalitākṛtiḥ

tato'nubhavatīndvābhaṃ yauvanaṃ madanonmukham /
tato jarāṃ padmamukhe himāśanimiva cyutam

tato'pi vyādhimaraṇaṃ punarmaraṇamūrcchanām /
punaḥ svapnavadāyātaṃ piṇḍairdehaparigraham

yāmyaṃ yāti punarlokaṃ punareva bhramakramam /
bhūyo bhūyo'nubhavati nānāyonyantarodaye

ityājavaṃ javībhāvamāmokṣamatibhāsuram /
bhūyo bhūyo'nubhavati vyomnyeva vyomarūpavān

prabuddhalīlovāca /
ādisarge yathā devi bhrama eṣa pravartate /
tathā kathaya me bhūyaḥ prasādādvodhavṛddhaye

śrīdevyuvāca /
paramārthaghanaṃ śailāḥ paramārthaghanaṃ drumāḥ /
paramārthaghanaṃ pṛthvī paramārthaghanaṃ nabhaḥ

sarvātmakatvātsa yato yathodeti cidīśvaraḥ /
paramākāśaśuddhātmā tatra tatra bhavettathā

sargādau svapnapuruṣanyāyenādiprajāpatiḥ /
yathā sphuṭaṃ prakacitastathādyāpi sthitā sthitiḥ

prathamo'sau pratispandaḥ padārthānāṃ hi bimbakam /
pratibimbitametasmādyattadadyāpi saṃsthitam

yannāma suṣiraṃ sthānaṃ dehānāṃ tadgato'nilaḥ /
karotyaṅgaparispandaṃ jīvatītyucyate tataḥ

sargādāvevamevaiṣā jaṅgameṣu sthitā sthitiḥ /
cetanā api niḥspandāstenaite pādapādayaḥ

cidākāśo'yamevāṃśaṃ kurute cetanoditam /
sa eva saṃvidbhavati śeṣaṃ bhavati naiva tat

naropādhipuraṃ prāptaṃ cetatyakṣipuṭaṃ nayat /
tattasyā nākṣicijjīvaṃ no jīvatyeva sargataḥ

tathā khaṃ khaṃ tathā bhūmirbhūmitvenāptvavajjalam /
yadyathā cetati svairaṃ tadvettyeva tathā vapuḥ

iti sarvaśarīreṇa jaṃgamatvena jaṃgamam /
sthāvaraṃ sthāvaratvena sarvātmā bhāvayan sthitaḥ

tasmādyajjaṅgamaṃ nāma tatsvabodhanarūpavat /
tena buddhaṃ tatastadbattadevādyāpi saṃsthitam

yadvṛkṣābhidhamābuddhaṃ sthāvaratvena vai punaḥ /
jaḍamadyāpi saṃsiddhaṃ śilātarutṛṇādi ca

na tu jāḍyaṃ pṛthakkiṃcidasti nāpi ca cetanam /
nātra bhedo'sti sargādau sattāsāmānyakena ca

vṛkṣāṇāmupalānāṃ yā nāmāntaḥsthāḥ svasaṃvidaḥ /
buddhyādivihitānyeva tāni teṣāmiti sthitiḥ

vidontaḥsthāvarāderyāstasyā buddhyāstathā sthiteḥ /
anyābhidhānāsthānārthāḥ saṃketairaparaiḥ sthitāḥ

kṛmikīṭapataṅgānāṃ yā nāmāntaḥsvasaṃvidaḥ /
tānyeva teṣāṃ buddhyādīnyabhidhārthāni kānicit

yathottarābdhijanatā dakṣiṇābdhijanaṃ sthitam /
na kiṃcidapi jānāti nijasaṃvedanādṛte

svasaṃjñānubhave līnāstathā sthāvarajaṅgamāḥ /
parasparaṃ yadā sarve svasaṃketaparāyaṇāḥ

yathā śilāntaḥsaṃsthānāṃ bahiṣṭhānāṃ ca vedanam /
asajjaḍaṃ ca bhekānāṃ mitho'ntastasthuṣāṃ tathā

sarvaṃ sarvagataṃ cittaṃ cidvyomnā yatpracetitam /
sargādau copanaṃ vāyuḥ sa ihādyāpi saṃsthitaḥ

cetitaṃ yattu sauṣiryaṃ tannabhastatra mārutaḥ /
spandātmetyādisargehāḥ padārtheṣviva copanam

cittaṃ tu paramārthena sthāvare jaṃgame sthitam /
copanānyanilaireva bhavanti na bhavanti ca

evaṃ bhrāntimaye viśve padārthāḥ saṃvidaṃśavaḥ /
sargādiṣu yathaivāsaṃstathaivādyāpi saṃsthitāḥ

yathā viśvapadārthānāṃ svabhāvasya vijṛmbhitam /
asatyameva satyābhaṃ tadetatkathitaṃ tava

ayamastaṃ gataḥ prāyaḥ paśya rājā vidūrathaḥ /
mālāśavasya padmasya patyuste yāti hṛdgatam

prabuddhalīlovāca /
kena mārgeṇa deveśi yātyeṣa śavamaṇḍapam /
enamevāśu paśyantyāvāvāṃ gacchāva uttame

śrīdevyuvāca /
manuṣyavāsanāntasthaṃ mārgamāśritya gacchati /
eṣo'hamaparaṃ lokaṃ dūraṃ yāmīti cinmayaḥ

mārgeṇaivamanenaiva yāvasteyena (?) saṃmatam /
parasparecchāvicchittirna hi sauhārdabandhanī

śrīvasiṣṭha uvāca /
iti vihitakathāgataklamāyāṃ
paramadṛśi prasṛte vibodhabhānau /
nṛpativarasutāmanasyudāre
vigalitacittajaḍo vidūratho'bhūt

ityārṣe śrīvāsiṣṭhamahārāmāyaṇe vālmīkīye mokṣopāyeṣūtpattiprakaraṇe līlo० saṃsāramaraṇāvasthāvarṇanaṃ nāma pañcapañcāśaḥ sargaḥ