Yoga Vasistha · Chapter 3.47

saptacatvāriṃśaḥ sargaḥ

śrīvasiṣṭha uvāca /
etasminvartamāne tu ghore samarasaṃgame /
līlādvayamuvācedaṃ jñaptiṃ bhagavatīṃ punaḥ

līlādvayamuvāca /
devi kasmādakasmānnau bhartā jayati nau raṇe /
vada tvayyapi tuṣṭāyāmasminvidrutavāraṇe

śrīsarasvatyuvāca /
ciramārādhitānena vidūrathanṛpāriṇā /
ahaṃ putri jayārthena na vidūrathabhūbhṛtā

tenāsāveva jayati jīyate ca vidūrathaḥ /
jñaptirantargatā saṃvidetāṃ māṃ yo yadā yathā

prerayatyāśu tattasya tadā saṃpādayāmyaham /
yo yathā prerayati māṃ tasya tiṣṭhāmi tatphalā

na svabhāvo'nyatāṃ dhatte vahnerauṣṇyamivaiṣa me /
anena mukta eva syāmahamityasmi bhāvitā

pratibhārūpiṇī tena bāle mukto bhaviṣyati /
etadīyaḥ svayaṃ śatruḥ sindhurnāma mahīpatiḥ

jayāmyahaṃ syāṃ saṃgrāma ityanenāsmi pūjitā /
tasmādvidūratho dehaṃ tatprāpya saha bhāryayā

tvayānayā ca kālena bāle mukto bhaviṣyati /
etadīyaḥ svayaṃ śatruḥ sindhurnāma mahīpatiḥ

hatvainaṃ vasudhāpīṭhe jayī rājyaṃ kariṣyati /
śrīvasiṣṭha uvāca /
evaṃ devyāṃ vadantyā tu balayoryudhyamānayoḥ

ravirdraṣṭumivāścaryamājagāmodayācalam /
celustimirasaṃghātā balānīvārirūpiṇaḥ

asṛjanjīvasaṅghānye saṃdhyāyāṃ tārakā iva /
śanaiḥ prakaṭatāṃ jagmurnīlākāśādribhūmayaḥ

bhuvanaṃ kajjalāmbhodherivotkṣiptamarājata /
petuḥ kanakaniḥsyandasundarā raviraśmayaḥ

śaileṣu varavīreṣu raṇe raktacchaṭā iva /
adṛśyata tato vyoma tathā raṇamahītalam

bāhubhirbhrāntabhujagaṃ prabhābhiḥ kīrṇakāñcanam /
kuṇḍalaiḥ kīrṇaratnaughaṃ śirobhirdṛṣṭapaṅkajam

āyudhaiḥ khaḍganīrandhraṃ śaraiḥ śalabhanirbharam /
raktābhāsthirasaṃdhyāḍhyaṃ sasiddhapuruṣaṃ śavaiḥ

hāraiḥ sasarpanirmokaṃ kaṭairiddhaṃ susaṃkulam /
lasallataṃ patākābhirurubhiḥ kṛtatoraṇam

hastaiḥ pādaiḥ pallavitaṃ śaraiḥ śaravaṇopamam /
śastrāṃśuśādvalaśyāmaṃ śastrapūraiḥ sakaitakam

kīrṇamāyudhamālābhirunmattamiva bhairavam /
phullāśokavanākāraṃ śastrasaṃghaṭṭavahnibhiḥ

udaghuṃghumahāśabdairvidravatsiddhanāyakaiḥ /
sauvarṇanagarākāraṃ bālārkakacitāyudhaiḥ

prāsāsiśakticakrarṣṭimudgarāraṇitāmbaram /
vahadraktanadīraṃhaḥ prohyamānaśavotkaram

bhuśuṇḍīśaktikuntāsiśūlapāṣāṇasaṃkulam /
śūlaśastrāhaticchannakabandhapatanānvitam

kālatāṇḍavavetālakulārabdhahalāravam /
śūnye raṇāṅgaṇe dīptau padmasindhvo rathau calau

adṛśyetāṃ nabhaścihnau candrasūryau divīva tau /
cakraśūlabhuśuṇḍyṛṣṭiprāsāyudhasamākulā

sahasreṇa sahasreṇa vīrāṇāṃ parivāritau /
vicarantau yathākāmaṃ maṇḍalairvitatāravaiḥ

sacītkāramahācakrapiṣṭānekamṛtāmṛtau /
tarantau raktasaritau mattavāraṇalīlayā

keśaśaivalasaṃpanne cakracakrajalenduke /
vahaccakrāhatikṣobhapātitākulavāraṇau

maṇimuktājhaṇatkāraraṇatkūbarakāravau /
vātāhatapatākāgrapaṭatpaṭapaṭāravau

anuyātau mahāvīrairbhūrimirbhīrusainikaiḥ /
dhārā vamadbhiḥ kuntānāṃ śarāṇāṃ dhanuṣāmapi

śaktīnāṃ prāsaśaṅkūnāṃ cakrāṇāṃ kacatāṃ raṇe /
tatra tau kṣaṇamāvṛtye maṇḍale bhūmikuṇḍale

ubhau vyatibabhūvāte saṃmukhāvāyudhāvubhau /
nārācadhārānikaravikṣepakarakadhvanau

anyonyamapi garjantau mattābdhijaladāviva /
tayoḥ praharatorbāṇā vasudhānarasiṃhayoḥ

pāṣāṇamusalākārā vyomavistāriṇo'bhavan /
karavālamukhāḥ kecinmudgarānanakāḥ pare

śitacakramukhāḥ kecitkecitparaśuvaktrakāḥ /
kecicchaktimukhāḥ kecitkecicchūlaśilāmukhāḥ /
triśūlavadanāḥ kecitsthūlā iva mahāśilāḥ

pralayapavanapātitāḥ śilaughā
iva nipatanti śilīmukhāstadā sma /
pramilitamabhavattayostadānīṃ
pralayavijṛmbhitasindhusaṃbhrameṇa

ityārṣe śrīvāsiṣṭhamahārāmāyaṇe vālmīkīye utpattiprakaraṇe lī० vidūrathasindhusamāgamo nāma saptacatvāriṃśaḥ sargaḥ