Yoga Vasistha · Chapter 3.46

śrīrāma uvāca /
evaṃ saṃkathayantīṣu tāsu tasmingṛhodare /
vidūrathaḥ kimakaronnirgatya kupito gṛhāt

śrīvasiṣṭha uvāca /
vidūrathaḥ svasadanānnirgataḥ parivāritaḥ /
parivāreṇa mahatā ṛkṣaugheṇeva candramāḥ

sannaddhasarvāvayavo lagnahāravibhūṣaṇaḥ /
mahājayajayārāvaiḥ surendra iva nirgataḥ

samādiśanyodhagaṇaṃ śṛṇvanmaṇḍalasaṃsthitim /
ālokayanvīragaṇānāruroha nṛpo ratham

kūṭākārasamākāraṃ muktāmāṇikyamaṇḍitam /
patākāpañcabhirvyāptaṃ dyuvimānamivottamam // '
cakrabhittipariprotaprakacatkāñcanāṅkuram /
muktājālaraṇatkāracāruvikramakūbaram

sugrīvairlakṣaṇopetaiḥ praśastaiḥ pracalaiḥ kṛśaiḥ /
javoḍḍayanavegena pravahadbhiḥ surāniva

vāyuṃ javena sahasā asahadbhirgatikramaiḥ /
prohyadbhiriva paścārdhamāpibadbhirivāmbaram

yojitairiva saṃpūrṇaiścandraiścāmaradīptibhiḥ /
aśvairaṣṭabhirābaddhamāśāpūrakaheṣitaiḥ

athodapataduddāmanāgābhraravanirbharaḥ /
śailabhittipratidhvānadāruṇo dundubhidhvaniḥ

mattasainikanirmuktairvyāptaṃ kalakalāravaiḥ /
kiṃkiṇījālanirdhvānairhetisaṃghaṭṭaghaṭṭitaiḥ

dhanuścaṭacaṭāśabdaiḥ śarasītkāragāyanaiḥ /
parasparāṅganiṣpiṣṭakavacaughajhaṇajjhaṇaiḥ

jvaladagniṭaṇatkārairārtimatkrandanāravaiḥ /
parasparabhaṭāhvānairbandivikṣubdharodanaiḥ

śilāghanīkṛtāśeṣabrahmāṇḍakuharo dhvaniḥ /
hastagrāhyo'bhavadbhīmo daśāśākuñjapūrakaḥ

athodapatadādityapathapīvararodhakam /
rajonibhena bhūpīṭhamambaroḍḍayanonmukham

garbhavāsamivāpannaṃ tenāsīttanmahāpuram /
mūḍhatvaṃ yauvaneneva ghanatāmāyayau tamaḥ

prayayuḥ kvāpi dīpaughā divaseneva tārakāḥ /
āyayurbalamālolā naiśabhūtaparamparāḥ

dadṛśustanmahāyuddhaṃ dve līle sā kumārikā /
prasphuṭaddhṛdayeneva devīdattamahādṛśau

praśemuratha hetīṣu prodyatkaṭakaṭāravāḥ /
ekārṇavapayaḥpūrairvālavā iva vahnayaḥ

śanaiḥ senāṃ samākarṣannājñāyata balāntaram /
viveśapakṣaproḍḍīno merurekamivārṇavam

athodabhūdguṇadhvānaṃ caṭaccaṭaditi sphuṭam /
racitāṃśumayāmbhodāśceruḥ paraparamparāḥ

yayurambaramāśritya nānāhetivihaṃgamāḥ /
prasasruralamāttāsumalināḥ śastradīptayaḥ

jajvaluḥ śastrasaṃghaṭṭajvalanā ulmukāgnivat /
jagarjuḥ śaradhāraughānvarṣanto vīravāridāḥ

viviśuḥ krakacakrūrā vīrāṅgeṣu ca hetayaḥ /
petuḥ paṭapaṭārāvaṃ hetiniṣpiṣṭayo'mbare

jagmuḥ śamaṃ tamāṃsyāśu śastrakānaladīpakaiḥ /
babhūvurakhilā senā navanārācaromaśāḥ

uttasthuryamayātrāyāṃ kabandhanaṭapaṅktayaḥ /
jaguruccai raṇodrekaṃ piśācyo raṇadārikāḥ

udagurdantasaṃghaṭṭaṭaṃkārā dantināṃ balāt /
ūhuḥ kṣapaṇapāṣāṇamahānadyo nabhastale

petuḥ śavā nivātāstasaṃśuṣkavanaparṇavat /
niryayurlohitā nadyo raṇādrermṛtivarṣiṇaḥ

praśemuḥ pāṃsavo raktaistamāṃsyāyudhavahnibhiḥ /
yuddhaikadhyānataḥ śabdā bhayāni mṛtiniścayaiḥ

abhavatkevalaṃ yuddhamapaśabdamasaṃbhramam /
anākulāmbuvāhābhaṃ khaḍgavīcisaṭāṃkṛtam

khadakhadaravasaṃvahaccharoghaṃ
ṭakaṭakitāravasaṃpatadbhuśuṇḍi /
jhaṇajhaṇaravasaṃmilanmahāstraṃ
timitimivadraṇamāsa dustaraṃ tat

ityārṣe śrīvāsiṣṭhamahārāmāyaṇe vālmīkīye utpattiprakaraṇe līlopākhyāne vidūrathaniryāṇaṃ nāma ṣaṭcatvāriṃśaḥ sargaḥ