Yoga Vasistha · Chapter 3.35

pañcatriṃśaḥ sargaḥ

śrīvasiṣṭha uvāca /
atha proḍḍayanodyuktaturaṅgamataraṅgakaḥ /
uttāṇḍava ivonmatto babhūva sa raṇārṇavaḥ

chatraḍiṇḍīraviśrāntasiteṣuśapharotkaraḥ /
aśvasainyollasallolakallolākulakoṭaraḥ

nānāyudhanadīnītasainyāvartavivṛttimān /
mattahastighaṭāpīṭhacalācalakulācalaḥ

kacaccakraśatāvartavṛttibhrāntaśirastṛṇaḥ /
dhūlījaladharāpītabhramatkhaḍgaprabhājalaḥ

makaravyūhavistārabhagnābhagnabhaṭaughanau /
mahāguḍuguḍāvartapratiśruddhanakandaraḥ

mīnavyūhaviniṣkrāntaśarabījaughasarṣapaḥ /
hetivīcīvarālūnapatākāvīcimaṇḍalaḥ

śastravārikṛtāmbhodasadṛśāvartakuṇḍalaḥ /
saṃrambhaghanasaṃcārasenātimitimiṅgilaḥ

kṛṣṇāyasaparīdhānavalatsenāmbubhīṣaṇaḥ /
kabandhāvartalekhāntarbaddhasainyādibhūṣaṇaḥ

śarasīkaranīhārasāndhakārakakubgaṇaḥ /
nirghoṣāśoṣitāśeṣaśabdaikaghanaghuṃghumaḥ

patanotpatanavyagraśiraḥśakalasīkaraḥ /
āvartacakravyūheṣu prabhramadbhaṭakāṣṭhakaḥ

kaṣṭaṭāṅkārakodaṇḍakuṇḍalonmathanodbhaṭaḥ /
aśaṅkameva pātālādivodyatsainikormimān

gamāgamaparānantapatākācchatraphenilaḥ /
vahadraktanadīraṃhaḥprohyamānarathadrumaḥ

gajapratimasaṃpannamahārudhirabudbudaḥ /
sainyapravāhavicaladdhayahastijalecaraḥ

sasaṃgrāmo'mbaragrāma ivāścaryakaro nṛṇām /
abhūtpralayabhūkampakampitācalacañcalaḥ

tarattaraṅgavihagaḥ patatkarighaṭātaṭaḥ /
trastabhīrumṛgānīkaskūrjaddhurughurāravaḥ

saraccharālīśalabhaśatabhaṅgurasainikaḥ /
tarattaraṅgaśarabhaḥ śarabhāravanāvaniḥ

caladdvirephanirhrādo rasattūryaguhāguruḥ /
cirātsa sainyajalado luṭhadbhaṭamṛgādhipaḥ

prasaraddhūlijalado vigalatsainyasānumān /
patadrathavarāḍhyāṅgaḥ pratapatkhaṅgamaṇḍalaḥ

protpatatpadapuṣpaughaḥ patākācchatravāridaḥ /
vahadraktanadīpūrapatatsārāvavāraṇaḥ

so'bhūtsamarakalpānto jagatkavalanākulaḥ /
paryastasadhvajacchatrapatākārathapattanaḥ

patadvimalahetyaughabhūribhāsvarabhāskaraḥ /
kaṭhinaprāṇasaṃtāpatāpitākhilamānasaḥ

kodaṇḍapuṣkarāvartaśaradhārānirantaraḥ /
vahatkhaṃgaśilālekhāvidyudvalayitāmbaraḥ

ucchinnaraktajaladhipatitebhakulācalaḥ /
nabhovikīrṇanipatadyuttārakaṇatārakaḥ

cakrakulyāmbudāvartapūrṇavyomaśirāmbudaḥ /
astrakalpāgninirdagdhasainyalokāntarakramaḥ

hetivarṣāśanicchannabhūtalāmalabhūdharaḥ /
gajarājagirivrātapātapiṣṭajanavrajaḥ

śaradhārāghanānīkameghacchannamahīnabhāḥ /
mahānīkārṇavakṣobhasaṃghaṭṭaghaṭitādravaḥ

vyāpta ugrānilodbhūtairjalavyālairivācalaḥ /
anyonyadalanavyagraiḥ śastrotpāta ivotthitaiḥ

śūlāsicakraśaraśaktigadābhuśuṇḍī-
prāsādayo vidalanena mitho dhvanantaḥ /
dīptā adhurdaśadiśaḥ śataśo bhramantaḥ
kalpāntavātaparivṛttapadārthalīlām

ityārṣe śrīvāsiṣṭhamahārāmāyaṇe vālmīkīye utpattiprakaraṇe raṇavarṇanaṃ nāma pañcatriṃśaḥ sargaḥ