Yoga Vasistha · Chapter 3.34

śrīvasiṣṭha uvāca /
atha rājñāṃ yuyutsūnāṃ bhaṭānāṃ mantriṇāmapi /
nabhasaḥ prekṣakāṇāṃ ca tatremāḥ prodagurgiraḥ

calatpadmaṃ sara iva vahadvihagameva ca /
nabhaḥ śūraśiraḥkīrṇaṃ bhāti tārakitākṛti

paśya raktapṛṣatpūrasindūrāruṇamārutaiḥ /
sāṃdhyā iva vibhāntyete madhyāhne'mbudabhānavaḥ

kimidaṃ bhagavanvyoma palālabharitaṃ sthitam /
nedaṃ palālaṃ vīrāṇāmete śarabharāmbudāḥ

yāvanto bhuvi sicyante rudhire raṇareṇavaḥ /
tāvantyabdasahasrāṇi bhaṭānāmāspadaṃ divi

mā bhaiṣṭa naite nistriṃśā nīlotpaladalatviṣaḥ /
amī vīrāvalokinyā lakṣmyā nayanavibhramāḥ

vīrāliṅganalolānāṃ nitambe surayoṣitām /
mekhalāḥ śithilīkartuṃ pravṛttaḥ kusumāyudhaḥ

lasadbhujalatālolā raktapallavapāṇayaḥ /
mañjarīmattanayanā madhvāmodasugandhayaḥ

gāyantyo madhurālāpairnandanodyānadevatāḥ /
tavāgamanamāśaṅkya pravṛttāḥ parinartitum

pratyanīkaṃ bhinattyantaḥ kuṭhāraiḥ kaṭhinairiyam /
senā grāmyeva vanitā dayitaṃ dṛṣṭiceṣṭitaiḥ

hā piturmama bhallena śiro jvalitakuṇḍalam /
sūryasya nikaṭaṃ nītaṃ kālenevāṣṭamo grahaḥ

āpādaśṛṅkhalāprotabhramatsthūlopaladvayam /
bhrāmayaṃścitradaṇḍākhyaṃ cakramūrdhvabhujo javāt

yodho yama ivābhāti yāmyādāyāti diktaṭāt /
sarvataḥ saṃharansenāmehi yāmo yathāgatam

sadyaśchinnaśiraśvabhramajjatkaṅkakulākulāḥ /
kabandhāḥ parinṛtyanti tālottālā raṇāṅgaṇe

gīrvāṇagaṇagoṣṭhīṣu pravṛttāḥ saṃkathā mithaḥ /
kadā lokāntaraṃ dhīrāḥ kathaṃ yāsyanti ke kutaḥ

nigiratyāgatāḥ senāḥ sravantīriva sāgaraḥ /
samatsyamakaravyūhā aho nu viṣamo bhaṭaḥ

kaṭeṣu kariṇāṃ kīrṇā dhārānārācarājayaḥ /
patitā iva saṃpūrṇāḥ śṛṅgasaṃgheṣu vṛṣṭayaḥ

hā kuntena śiro nītaṃ mametyeva vivakṣataḥ /
śirasā'jīvamityevaṃ khe khageneva vāśitam

yantrapāṣāṇavarṣeṇa yaiṣāsmānpariṣiñcati /
senānuśṛṅkhalājālavalanā kriyatāṃ balāt

valīpalitanirmuktaṃ pūrvabhāryāpsarāḥ satī /
aṅgīkaroti bhartāraṃ parijñāya raṇe hatam

ādivaṃ racitākārāḥ kuntakānanakāntayaḥ /
vīrāṇāṃ svargamāroḍhumiva sopānapaṅktayaḥ

kāntakāñcanakāntāṅge bhaṭasyorasi kāminī /
dṛṣṭā devapurandhrīyaṃ bharturanveṣaṇānvitā

hā hataṃ sainyamasmākaṃ bhaṭai'ruddhatamuṣṭibhiḥ /
mahāpralayakallolaiḥ suraśailasthalaṃ yathā

yudhyadhvamagrato mūḍhā nayatārdhamṛtānnarān /
nijānpādaprahāreṇa maitāndārayatādhamāḥ

dhammillavalanāvyagre ghanotkaṇṭhe'psarogaṇe /
bhaṭo divyaśarīreṇa pārśvaprāpto nirīkṣyatām

phullahemāravindāsu cchāyāśītajalānilaiḥ /
svarganadyāstaṭīṣvenaṃ dūrāyātaṃ vinodaya

vividhāyudhasaṃghaṭṭakhaṇḍitogrāsthikoṭayaḥ /
khe kavantyaḥ kaṇatkāraiḥ prasṛtāstārakā iva

vyomni jīvanadīvāhe vahatsāyakavāriṇi /
cakrāvartini gacchanti girayo'pyaṇupaṅkatām

bhramadbhirgrahamārgeṣu śirobhirvīrabhūbhṛtām /
āyudhāṃśulatānālalagnāsidalakaṇṭakaiḥ

ketupaṭṭaṃmṛṇālāṅgadalairlabdhaśilīmukhaiḥ /
vahadvātacalatpadmaṃ nabhaḥ padmasaraḥ kṛtam

mṛtamātaṅgasaṃghāte girāviva pipīlikāḥ /
bhīravaḥ parilīyante striyaḥ puṃvakṣasīva ca

apūrvottamasaundaryakāntasaṃgamaśaṃsinaḥ /
vānti vidyādharastrīṇāmalakollāsino'nilāḥ

chatreṣūḍḍīyamāneṣu sthiteṣu vyomni candratā /
induneva yaśomūrtyā kṛtā śubhrātapatratā

bhaṭo maraṇamūrcchānte nimeṣeṇāmaraṃ vapuḥ /
svakarmaśilpiracitaṃ prāptaḥ svapnapuraṃ yathā

śūlaśaktyṛṣṭicakrāṇāṃ vṛṣṭayo muktatuṣṭayaḥ /
vyomābdhau matsyamakarasaṃkulāvayavāḥ sthitāḥ

śarotkṛttasitacchatrakalahaṃsairnabhaḥsthalam /
bhāti saṃcitapūrṇendubimbalakṣairivāvṛtam

kriyate gaganoḍḍīnaiścāmaraiścārughargharaiḥ /
vātāvadhūtasaṃrodhataraṅganikaradyutiḥ

dṛśyante hetidalitāśchatracāmaraketavaḥ /
ākāśakṣetravikṣiptā yaśaḥśālilatā iva

vahadbhirvyomni sakṣema paśya nītā kṣayaṃ śarai /
śaktivṛṣṭirupāyāntī sasyaśrīḥ śalabhairiva

eṣā prasṛtadordaṇḍabhaṭakhaḍgacchaṭātkṛtiḥ /
kaṭhinātkaṃkaṭājjātā mṛtyorevograhuṃkṛtiḥ

hetikalpānilakṣuṇṇā dantanirjharavārayaḥ /
janatākṣayakāle'sminbhagnā nāgā nagā iva

sacakranāthasūtāśvaṃ vyūḍhaṃ raktamahāhṛde /
hāhābhibhūtagatikaṃ ceṣṭate rathapattnam

karakaṃkaṭakuṭyaṅkakhaḍgasaṃghaṭṭaṭāṃkṛtaiḥ /
kālarātryā pranṛtyantyā raṇavīṇeva vādyate

narebhakharavājibhyo ye cyutā raktanirjharāḥ /
paśya tadbindusiktena vāyunāruṇitā diśaḥ

śastrāṃśujalade vyomni kālīcikuramecake /
śarakorakabhārasraṅmeghe vidyudivoditā

anantaraktasaṃsaktasannāvanitalāyudhaiḥ /
bhuvanaṃ bhātyabhijvālamagniloka ivākulam

bhuśuṇḍīśaktiśūlāsimusalaprāsavṛṣṭayaḥ /
anyonyacchedabhedābhyāṃ karaprakarato'patan

akṣobhaikapraharaṇādyātudhānyo'nyaceṣṭitam /
saṃrambhāvekṣaṇaprajñaṃ raṇaṃ svapnamiva sthitam

ananyaśabdāviratahatāhatiraṇajjhaṇaiḥ /
gāyatīva kṣatakṣobhamudito raṇabhairavaḥ

anyonyaraṇahetyugracūrṇapūrṇo raṇārṇavaḥ /
vālukāmaya evābhūcchinnacchatrataraṅgakaḥ

sarabhasarasavadvisāritūrya-
pratiravapūritalokapālalokaḥ /
raṇagirirayamugrapakṣadakṣa-
pratisṛtivṛtta ivāmbare yugānte

hā hā dhikpravikaṭakaṅkaṭānanodya-
tproḍḍīnaprakaṭataḍicchaṭāprataptāḥ /
kreṅkārasphuritaguṇeritā raṇanto
nārācāḥ śikhariśilāgaṇaṃ vahanti

chinnecchācchamiti na yāvadaṅgabhaṅgaṃ
kurvanto jvaladanalojjvalāḥ pṛṣatkāḥ /
tāvaddrāgdrutamita ehi mitra yāmo
yāmo'yaṃ pravahati vāsaraścaturthaḥ

ityārṣe śrīvāsiṣṭhamahārāmāyaṇe vālmīkīye utpattiprakaraṇe līlopākhyāne raṇaprekṣakajanoktivarṇanaṃ nāma catustriṃśaḥ sargaḥ