Yoga Vasistha · Chapter 3.33

śrīrāma uvāca /
bhagavanyuddhametanme samāsena manāgvada /
śrutirāhlādyate śroturyasmādetābhiruktimiḥ

śrīvasiṣṭha uvāca /
atha tatraiva te devyau saṃgrāmaṃ tamavekṣitum /
vimāne kalpite kānte ruddhe ruruhatuḥ sthire

etasminnantare tatra līleśaḥ pratipakṣataḥ /
tamutsoḍhumaśaktaḥ sanmukhavyatikare raṇe

pralayārṇavakallola ivotpattyodbhaye bhaṭe /
jahau sānāviva śilāṃ bhaṭasyorasi mudgaram

atha pravṛttaḥ prasabhaṃ pralayārṇavaraṃhasā /
senayoḥ śastrasaṃpātaḥ kirannanalavidyutaḥ

tarattaraladhārāgrarekhāṅkitanabhastalaḥ /
dhvanatkaṇakaṇāśabdamadhyalakṣitaṭāṃkṛtiḥ

dhīrahuṃkāramiśroṣmaghargharāravaghasmaraḥ /
pravṛttaśaradhārāgrabhāskarārcirvitānakaḥ

nadatkaṅkaṭaṭaṅkāraproḍḍīnakaṇapāvakaḥ /
parasparāhaticchinnahetikhaṇḍakhagāmbaraḥ

vīradordrumasaṃcāravahadvananabhasthalaḥ /
kodaṇḍacakrakreṅkāradravadvaimānikāṅganaḥ

mahāhalahalārāvabhṛṅgīkṛtaghanadhvaniḥ /
nirvikalpasamādhistha ivaikaghanatāvaśāt

nārācāsāradhārāgralūnaśūraśiraskaraḥ /
parasparāṃsasaṃghaṭṭaraṇatkaṅkaṭasaṃkaṭaḥ

huṃkārahatahetyugrasaṃghaṭṭakaṭuṭāṃkṛtaḥ /
taraddhārātaraṅgābhradanturāśeṣadiṅmukhaḥ

hetisaṃghaṭṭavikṣobhamuṣṭigrāhyajhaṇajjhaṇaḥ /
ciramāsphoṭakāsphoṭaluṭhaccaṭacaṭāravaḥ

pravahatkhaḍgasītkārajvalatkaṇasaṇadhvaniḥ /
saraccharabharādhvāntaśaratkharakharāravaḥ

dhagaddhagitivicchinnakaṇṭhotthaprāṇalohitaḥ /
chinnabāhuśiraḥkhaḍgakhaṇḍanirvivarāmbaraḥ

kaṅkaṭotthasphuradvahnisaṭāspṛṣṭaśiroruhaḥ /
raṇatpatadasivrātamattapīnajhaṇajjhaṇaḥ

kuntakuṇṭhitamātaṅgataraṅgottuṅgalohitaḥ /
dantidantaviniṣpeṣatāracītkārakarkaśaḥ

mahāmusalasaṃpātapiṣṭakaṣṭoddhurasvaraḥ /
taracchūraśiraḥpadmaprakarācchāditāmbaraḥ

vyomanyastabhujāhīndraḥ pūrṇadhūlimayāmbudaḥ /
chinnahetinarārabdhakeśākeśipratikriyaḥ

nakhānakhinikṛttākṣikarṇanāsoṣṭhakandharaḥ /
chinnāyudhamahāmallahelollālanalabdhabhūḥ

patatsamadamātaṅgakampitorvīluṭhadrayaḥ /
raṇadratharayotpannakṣaradraktasaritpathaḥ

rajoracitanīhāraḥ kacatpravahadāyudhaḥ /
ekīkṛtaghanakṣobhasainyasāgaragarjitaḥ

mattahāsavilāsena mṛtyunā paricarvitaḥ /
garvitādrīndranāgendrakharvitāmbhodagarjitaḥ

vṛkṣaśvabhrataṭīcchannacakraśaktyṛṣṭimudgaraḥ /
śarorṇātantunīrandhraghṛṣṭiyodhādrimekhalaḥ

meghaviśrāntavicchinnapatākāpaṭacāmaraḥ /
yantrapāṣāṇacakraughadūravidrutakhecaraḥ

maraṇavyagrakṛttāṅgayodhākrandātighargharaḥ /
kuṭhārāghātasaṃghātavidalanmastakavrajaḥ

dūroḍḍīnakacatkhaḍgakhaṇḍatārakitāmbaraḥ /
śaktinirmuktaśaktyaughavibhinnebhāvṛtāvaniḥ

sainyavyākulavetālalalanonmuktamudgaraḥ /
gaganottambhitottuṅgaśūratomaratoraṇaḥ

bhuśuṇḍībhagnakhaḍgaughakhaṇḍālīvyomakuntalaḥ /
kuntaveṇuvananyastatāpāmbarakacacchaviḥ

khaḍgarṣṭivṛṣṭisaṃpuṣṭarājapūjitasainikaḥ /
śūlottambhitasacchūragrahaṇodyamitāpsarāḥ

gadātuṣāravigalatsphuritāṅgadadiṅmukhaḥ /
prāsaprasabhasaṃpiṣṭakaṣṭaceṣṭatayotkaṭaḥ

cakrakrakacasaṃcāracchinnāśvanaravāraṇaḥ /
paraśuvrātasaṃpātapatatsamadavāraṇaḥ

lakuṭolloḍanoḍḍīnaproḍḍāmaracaṭadbhaṭaḥ /
yantrapāṣāṇasaṃpātapiṣṭaketurathadrumaḥ

karavālavilūnāgracchatrapaṅkajapāṇḍuraḥ /
kṣepaṇakṣobhasaṃkṣīṇasainyakṣobho'pyalakṣaṇaḥ

kabandhabandhasaṃnetṛpātasaṃpiṣṭapārśvagaḥ /
sāṅkuśāṅkitasaṃkhyasthavīravāritavāraṇaḥ

paraśuvrātasaṃpātapatatsamadavāraṇaḥ /
pāśāprāśiviśeṣajñavīrātiparidevanaḥ

kṣurikākukṣinirbhedagalatpadmapatajjanaḥ /
triśūlavalanonmattaśūvarasaṃkaranartataḥ

dhāvaddhānuṣkasaṃpūrṇakulakūjitakākaliḥ /
bhindipālasaṭāṭopahuṃkārārabhaṭīnaṭaḥ

vajramuṣṭiviniṣpiṣṭapiṣṭasadbhaṭasaṃkaṭaḥ /
śyenavadvyomapadavīprotpatatpaṭupaṭṭiśaḥ

aṅkuśākṛṣṭaśūreśarathebhahayaketanaḥ /
halāhalihatālūnahelākulakulācalaḥ

sutālottālakuddālanikhātavanabhūtalaḥ /
dhanurdviguṇamātrāstalūnalokaśilāvaliḥ

krakacobhayapārśvebhacchinnamattamataṅgajaḥ /
saṃgrāmolūkhalakṣuṇṇalokataṇḍulamausalī

astrābhāśṛṅkhalājālabaddhasenāvihaṅgamaḥ /
lolāsivīranistriṃśanītavādigṛhāṅgaṇāḥ

gaṇaśo nīyamānāgryaśvāpadārāvanirbharaḥ /
nakhāṅguṣṭhakhanatpuṅkhapreṅkhāraṇaraṇāravaiḥ

maricairvyañjanānīva rañjayansakalāravān /
sainyanikṣiptakumbhāgnidagdhayodheritāyudhaḥ /
sainyanikṣiptakumbhāgnidagdhayodhojjhitāyudhaḥ

sainyanikṣiptakumbhasthataptāṅgārahatekṣaṇaḥ /
sainyanikṣiptakumbhasthaviṣavāridalajjanaḥ

nārācavarṣavaravāridavīrapūra-
mattābhrasaṃbhramasanṛttakabandhabarhī /
kalpāntakāla iva vegavivartamāna-
mātaṅgaśailavalito raṇasaṃbhramo'bhūt

ityārṣe śrīvāsiṣṭhamahārāmāyaṇe vālmīkīye utpattiprakaraṇe senayoḥ prathamapātavarṇanaṃ nāma trayastriṃśaḥ sargaḥ