Yoga Vasistha · Chapter 3.32

śrīvasiṣṭha uvāca /
atha vīravarotkaṇṭhanṛtyadapsarasi sthitā /
līlāvalokayāmāsa vyomni vidyānvitāvanau

svarāṣṭramaṇḍale bhartṛpālite balamālite /
kasmiṃścidvitatāraṇye dvitīyākāśabhīṣaṇe

senādvitayamākṣubdhaṃ saumyābdhidvitayopamam /
mahārambhaghanaṃ mattaṃ sthitaṃ rājadvayānvitam

yuddhasajjaṃ susaṃnaddhamiddhamagnimivādbhutam /
pūrvaprahārasaṃpātaprekṣākṣubdhākṣilakṣitam

udyatāmalanistriṃśadhārāsāravahajjanam /
kacatparaśvadhaprāsabhindipālarṣṭimudgaram

garutmatpakṣavikṣubdhavanasaṃpātakampitam /
udyaddinakarālokacañcatkanakakaṅkaṭam

parasparamukhālokakopaproddāmitāyudham /
anyonyabaddhadṛṣṭitvāccitraṃ bhittāvivārpitam

lekhāmaryādayā dīrghabaddhayā sthāpitasthiti /
anivāryamahāsainyajhāṃkārāśrutasaṃkatham

pūrvaprahārasmayataściraṃ saṃśāntadundubhi /
nibaddhayodhasaṃsthānanikhilānīkamantharam

dhanurdvitathamātrātmaśūnyamadhyaikasetunā /
vibhaktaṃ kalpavātena mattamekārṇavaṃ yathā

kāye saṃkaṭasaṃrambhacintāparavaśeśvaram /
viraṭadbhekakaṇṭhatvagbhaṅgurāturahṛdguham

prāṇasarvasvasaṃtyāgasodyogāsaṃkhyasainikam /
karṇākṛṣṭaśaraughaughatyāgonmukhadhanurdharam

prahārapātasaṃprekṣāniṣpandāsaṃkhyasainikam /
anyonyotkaṇṭhakāṭhinyabharabhrukuṭisaṃkaṭam

parasparasusaṃghaṭṭakaṭuṭaṅkārakaṅkaṭam /
vīrayodhamukhādagdhabhīruprepsitakoṭaram

mithaḥsaṃsthānakālokamātrāsaṃdigdhajīvitam /
samastāṅgaruhāsaktaprāṃśuvṛddhebhamānavam

pūrvaprahārasaṃprekṣāvyagraprāṇatayā tayā /
saṃśāntakallolaravaṃ nidrāmudrapuropamam

saṃśāntaśaṅkhasaṃghātatūryanirhrādadundubhi /
bhūtalākāśasaṃlīnasarvapāṃsupayodharam

palāyanaparaiḥ paścāttyaktamaṅgulamaṇḍalam /
visārimakaravyūhamatsyasaṃkhyābdhibhāsuram

patākāmañjarīpuñjavijitākāśatārakam /
hāstikottambhitakarakānanīkṛtakhāntaram

tarattaralabhāpūrasapakṣasakalāyudham /
dhamaddhamitiśabdaiśca śvāsosthairdhmātakhāntaram

cakravyūhakarākrāntadurvṛttasurabhāsuram /
garuḍavyūhasaṃrambhavidravannāgasaṃcayam

śyenavyūhavibhinnāgrasaṃniveśottamadhvani /
anyonyāsphoṭaniḥśeṣaprapatadbhūrivṛndakam

vividhavyūhavinyāsavāntavīravarāravam /
karapratolanollāsamattamudgaramaṇḍalam

kṛṣṇāyudhāṃśujaladaśyāmīkṛtadivākaram /
anilādhūtapalyūlasūtkṛtābhaśaradhvani

anekakalpakalpāgrasavṛndamiva saṃsthitam /
pralayānilasaṃkṣubdhamekārṇavamivotthitam

sadyaśchinnaṃ mahāmeroḥ pakṣadvayamiva sphurat /
kṣubdhamārutanirdhūtamiva kajjalaparvatam

pātālakuharātkṣubdhamandhakāramivotthitam /
lokālokamivonmattanṛtyalolalasattaṭam /
mahānarakasaṃghātaṃ bhittvāvanimivotthitam

ālolakuntamusalāsiparaśvadhāṃśu-
śyāmāyamānadivasātapavāripūraiḥ /
ekārṇavaṃ bhuvanakośamivācireṇa
kartuṃ samudyatamagādhamanantapūraiḥ

ityārṣe śrīvāsiṣṭhamahārāmāyaṇe vālmīkīye utpattiprakaraṇe līlopākhyāne āhavārambhaṇaṃ nāma dvātriṃśaḥ sargaḥ