Yoga Vasistha · Chapter 3.121

caṇḍālyuvāca /
kenacittvatha kālena grāmake'smiñjaneśvara /
avṛṣṭiduḥkhamabhavadbhīṣaṇaṃ bhagnamānavam

mahatānena duḥkhena sarve te grāmakā janāḥ /
vinirgatya gatā dūraṃ sarve pañcatvamāgatāḥ

tenemā duḥkhabhāginyaḥ śūnyā vayamiha prabho /
saumya śocāma sadvāṣpamācāntekṣaṇadhārayā

ityākarṇyāṅganāvaktrādrājā vismayamāgataḥ /
mantriṇāṃ mukhamālokya citrārpita ivābhavat

bhūyo vicārayāmāsa tadāścaryamanuttamam /
bhūyo bhūyo'tha papraccha babhūvāścaryavāniti

teṣāṃ samucitairdānasanmānairduḥkhasaṃkṣayam /
kṛtvā karuṇayāviṣṭo iṣṭalokaparāvaraḥ

sthitvā tatra ciraṃ kālaṃ vimṛśya niyatergatīḥ /
ājagāma gṛhaṃ paurairvanditaḥ praviveśa ha

prātastatra sabhāsthāne māmapṛcchadasau nṛpaḥ /
kathamevaṃ mune svapnaḥ pratyakṣamiti vismitaḥ

yathāvastutayā tasya tata uktaḥ sa tādṛśaḥ /
saṃśayo hṛdayānnunno vātenevāmbudo divaḥ

ityevaṃ rāghavāvidyā mahatī bhramadāyinī /
asatsattāṃ nayatyāśu saccāsattāṃ nayatyalam

śrīrāma uvāca /
kathamevaṃ vada brahmansvapnaḥ satyatvamāgataḥ /
bhramodāra ivaiṣo'rtho na me galati cetasi

śrīvasiṣṭha uvāca /
sarvametadavidyāyāṃ saṃbhavatyeva rāghava /
ghaṭeṣu paṭatā dṛṣṭā svapnasaṃbhramitādiṣu

dūraṃ nikaṭavadbhāti mukure'ntarivācalaḥ /
ciraṃ śīghratvamāyāti punaḥ śreṣṭheva yāminī

asaṃbhavaśca bhavati svapne svamaraṇaṃ yathā /
asacca sadivābhāti svapneṣviva nabhogatiḥ

susthitaṃ suṣṭha calati bhrame bhūparivartavat /
acalaṃ calatāmeti madavikṣubdhacittavat

vāsanāvalitaṃ ceto yadyathā bhāvayatyalam /
tattathānubhavatyāśu na tadasti na vāpyasat

yadaivābhyuditā vidyā tvahaṃtvādimayī mudhā /
tadaivānādimadhyāntā bhramasyānantatoditā

pratibhāsavaśādeva sarvo viparivartate /
kṣaṇaḥ kalpatvamāyāti kalpaśca bhavati kṣaṇaḥ

viparyastamatirjantuḥ paśyatyātmānameḍakam /
bibharti siṃhatāmeḍo vāsanāvaśataḥ svayam

viṣamabhramadāvidyāmohāhantādayaḥ samāḥ /
sarve cittaviparyāsaphalasaṃpattihetutaḥ

kākatālīyavaccetovāsanāvaśataḥ svataḥ /
saṃvadanti mahārambhā vyavahārāḥ parasparam

vṛttaṃ prākpakkaṇe rājñaḥ kasyacillavaṇasya yat /
pratibhātaṃ tadetasya sadvāsadvā manogatam

vismaratyapi vistīrṇāṃ kṛtāṃ cetaḥkriyāṃ yathā /
tathā kṛtāmapyakṛtāmiti smarati niścitam

tathā na bhuktavānasmi bhuktavāniti cetasi /
svapne deśāntaragame prākṛto'pyavabuddhyate

vindhyapuṣkasasugrāme vyavahāro'yamīdṛśaḥ /
pratibhāsāgatastasya svapne pūrvakathā yathā

athavā lavaṇenāśu dṛṣṭo yaḥ svapnavibhramaḥ /
sa eva saṃvidaṃ prāpto vindhyapuṣkasacetasi

lāvaṇī pratibhā''rūḍhā vindhyāpuṣkasacetasi /
vindhyapuṣkasasaṃvidvā''rūḍhā pārthivacetasi

yathā bahūnāṃ sadṛśaṃ vacanaṃ nāma mānasam /
tathā svapne'pi bhavati kālo deśaḥ kriyāpi ca

vyavahāragatestasyāḥ sattāsti pratibhāsataḥ /
sattā sarvapadārthānāṃ nānyā saṃvedanādṛte

saṃvedanetarā bhāti vīcirvā jalasaṃgatiḥ /
bhūtabhavyabhaviṣyasthā tarubīje taruryathā

tasyāḥ sattvamasattvaṃ ca na sannāsaditi sthitam /
satsadeva hi saṃvitterasaṃvitterasanmayam

nāvidyā vidyate kiṃcittailādi sikatāsviva /
hemnaḥ kiṃ kaṭakādanyatpadaṃ syāddhematāṃ vinā

avidyayātmatattvasya saṃbandho nopapadyate /
saṃbandhaḥ sadṛśānāṃ ca yaḥ sphuṭaḥ svānubhūtitaḥ

jatukāṣṭhādisaṃbandho yaḥ samāsamayogataḥ /
nānyonyānubhavāyāsau tadekaspandamātrakam //

paramārthamayaṃ sarvaṃ yathā tenopalādayaḥ /
citā samabhicetyante saṃbandhavaśataḥ samāḥ

yadā cinmātrasanmātramayāḥ sava jagadgatāḥ /
bhāvāstadā vibhāntyete mithaḥ svānubhavasthiteḥ

na saṃbhavati saṃbandho viṣamāṇāṃ nirantaraḥ /
na parasparasaṃbandhādvinānubhavanaṃ mithaḥ

sadṛśe sadṛśaṃ vastu kṣaṇādgatvaikatāmalam /
rūpamāsphārayatyekamekatvādeva nānyathā

ciccetyamilitā dṛśyarūpayodeti cetanaḥ /
[ jaḍaṃ jaḍena militaṃ ghanaṃ saṃpadyate jaḍam /]
na ca cijjaḍayoraikyaṃ vailakṣaṇyātkvacidbhavet

cijjaḍau citra ekatra na tau saṃmilataḥ kvacit /
cinmayatvāccidālambhaścidālambhena vedanam

dārupāṣāṇabhedānāṃ natu hyete cidātmakāḥ /
padārtho hi padārthena pariṇāmyanubhūyate

jihvayaiva rasāsvādaḥ sajātīyāmalodayaḥ /
aikyaṃ ca viddhi saṃbandhaṃ nāstyasāvasamānayoḥ

jaḍacetanayostena nopalādi jaḍaṃ matam /
cidevopalakuḍyādirūpiṇīti mitā citā

ekībhāvaṃ gatā draṣṭadṛśyādi kurute bhramam /
kāṣṭhopalādyaśeṣaṃ hiṃ paramārthamayaṃ yataḥ

tadātmanā tatsaṃbandhe dṛśyatvenopalabhyate /
sarvaṃ sarvaprakārāḍhyamanantamiva yatnataḥ

viśvaṃ sanmātramevaitadviddhi tattvavidāṃ vara /
asattātyāganiṣṭhena viśvaṃ lakṣaśatabhramaiḥ

pūritaṃ ciccamatkāro naca kiṃcana pūritam /
saṃkalpanāgarā nṝṇāṃ mithaḥ spandanti no yathā

na deśakālarodhāya tathā sargeṣviti sthitiḥ /
bhedabodhe hi sargatvamahaṃtvādibhramodayaḥ

hemasaṃvitparityāge kaṭakādibhramo yathā /
kaṭakādibhramo hemni deśāddeśaṃ bhavādbhavam

dṛgdarśanaparityāge nāvidyāsti pṛthaksadā /
kaṭakādimahābhedamekaṃ hema yathāmalam

bodhaikatvādayaṃ sargastadevāsannayatyalam /
senā mṛtsaṃvidā citrā mṛnmātramiva mṛnmayī

jalamekaṃ taraṅgādi dārvekaṃ śālabhañjikā /
mṛnmātramekaṃ kumbhādi brahmaikaṃ trijagadbhramaḥ

saṃbandhe dṛśyadṛṣṭīnāṃ madhye draṣṭurhi yadvapuḥ /
draṣṭṛdarśanadṛśyādivarjitaṃ tadidaṃ param

deśāddeśaṃ gate citte madhye yaccetaso vapuḥ /
ajāḍyasaṃvinmananaṃ tanmayo bhava sarvadā

ajāgratsvapnanidrasya yatte rūpaṃ sanātanam /
acetanaṃ cājaḍaṃ ca tanmayo bhava sarvadā

jaḍatāṃ varjayitvaikāṃ śilāyā hṛdayaṃ hi tat /
akṣubdho vāthavā kṣubdhastanmayo bhava sarvadā

kasyacitkiṃcanāpīha nodeti na vilīyate /
akṣubdho vāthavākṣubdhaḥ svasthastiṣṭha yathāsukham

nābhivāñchati no dveṣṭi dehe kiṃcitkvacitpumān /
svasthastiṣṭha nirāśaṅkaṃ dehavṛttiṣu mā pata

bhaviṣyadgrāmakagrāmyakāryavyavasito yathā /
cittavṛttiṣu mā tiṣṭha tathā satyātmatāṃ gataḥ

yathā deśāntaranaro yathā kāṣṭhaṃ yathopalaḥ /
tathaiva paśya cittaṃ tvamacittaiva yadātmanā

yathā dṛṣadi nāstyambu yathāmbhasyanalastathā /
svātmanyevāsti no cittaṃ paramātmani tatkutaḥ

prekṣyamāṇaṃ na yatkiṃcittena yatkriyate kvacit /
kṛtaṃ bhavati tanneti matvā cittātigo bhavet

atyantānātmabhūtasya yaścittasyānuvartate /
paryantavāsinaḥ kasmānna mlecchasyānuvartate

nirantaramanādṛtya tvamārāccittapuṣkasam /
svasthamāssva nirāśaṅkaṃ paṅkeneva kṛto jaḍaḥ

cittaṃ nāstyeva me bhūtaṃ mṛtamevādya vetti vā /
bhava niścayavānbhūtvā śilāpuruṣaniścalaḥ

prekṣāyāmasti no cittaṃ tadvihīno'si tattvataḥ /
sa kimarthamanarthena tadvyarthena kadarthyase

asatā cittayakṣeṇa ye mudhā svavaśe kṛtāḥ /
teṣāṃ pelavabuddhīnāṃ candrādaśanirutthitaḥ

cittaṃ dūre parityajya yo'si so'si sthiro bhava /
bhava bhāvanayā mukto yuktyā paramayānvitaḥ

asato ye'nuvartante cetaso'satyarūpiṇaḥ /
vyomamāraṇakarmaikanītakālāndhigastu tān

vyapagalitamanā mahānubhāvo
bhava bhavapāragato bhavāmalātmā /
suciramapi vicāritaṃ na labdhaṃ
malamamalātmani mānasātma kiṃcit

ityārṣe śrīvāsiṣṭhamahārāmāyaṇe vālmīkīye mokṣopāyeṣūtpattiprakaraṇe cittābhāvapratipādanaṃ nāmaikaviṃśatyuttaraśatatamaḥ sargaḥ