Yoga Vasistha · Chapter 3.108

aṣṭottaraśatatamaḥ sargaḥ

rājovāca /
atha gacchati kāle'tra jarājarjaritāyuṣi /
tuṣārapūrṇaśaṣpaughasamaśmaśrubhṛte mayi

karmavātāpanunneṣu saraseṣvaraseṣvapi /
patatsu vāsaraugheṣu śīrṇaparṇagaṇeṣviva

ājāviva śaraugheṣu sukhaduḥkheṣvanāratam /
kalaheṣvapyakāryeṣu cāgacchatsu patatsu ca

vikalpakalpanāvartavartini dvijage jaḍe /
samudra iva kallolabhare bhramitacetasi

calaccintācitaṃ cakramārūḍhe bhrānta ātmani /
prohyamāne tṛṇa iva sāvartaṃ kālasāgare

vindhyorvīvanakīṭasya grāsaikaśaraṇasya me /
dvibāhorgardabhasyātra kṣīṇa itthaṃ samāgaṇe

vismṛte mama bhūpatve śavasyeva mahājave /
cāṇḍālatve sthirībhūte pakṣacchinna ivācale

saṃsāramiva kalpānto dāvāgniriva kānanam /
sāgarormistaṭamiva śuṣkavṛkṣamivāśaniḥ

akāṇḍe maraṇoḍḍīnaṃ caṇḍacaṇḍālamaṇḍalam /
nirannatṛṇapatrāmbu vindhyakacchaṃ tadāyayau

na varṣati ghanavrāte dṛṣṭanaṣṭe kvacitsthite /
pūtāṃgārakaṇonmiśragatau vahati mārute

śīrṇamarmaraparṇāsu dāvāgnivalitāsu ca /
vanasthalīṣu śūnyāsu cirapravrajitāsviva

akāṇḍamabhavadbhīmamuddāmadavapāvakam /
śoṣitāśeṣagahanaṃ bhasmaśeṣatṛṇolapam

pāṃsudhūsarasarvāṅgaṃ kṣudhitāśeṣamānavam /
nirannatṛṇapānīyaṃ deśādyuddāvamaṇḍalam

kacanmarumarīcyambumajjanmahiṣamaṇḍalam /
vātotthasīkaravyūhāparivāhavanāmbaram

pānīyaśabdamātraikaśravaṇotkanaravrajam /
ātapātatisaṃśoṣasīdatsakalamānavam

patragrasanasaṃrabdhakṣudhitotthitajīvitam /
svāṅgacarvaṇasaṃrambhaluṭhaddaśanamaṇḍalam

māṃsaśaṅkānigīrṇograkhadirāgnikaṇotkaram /
maṇḍakāsārasaṃgrastavanapāṣāṇakhaṇḍakam

anyonyabhūtasaṃsaktamātṛputrapitṛvrajam /
gṛdhrodararaṭatsāranigīrṇavarasārikam

parasparāṅgavicchedaraktasiktadharātalam /
harigrasanasaṃrabdhamattakṣudhitavāraṇam

darīnigaraṇaikaikasiṃhabhramaṇabhīṣaṇam /
anyonyagrasanodyuktalokamallakṛtaṃ vahat

niṣpatrapādapoḍḍīnaprauḍhāṅgāramayānilam /
raktapānotkamārjāralīḍhadhātutaṭāvani

jvālāghanaghaṭāṭopasāvartasavanānilam /
sarvasthalarasadvahnipuñjapiñjarajaṅgalam

dagdhājagarakuñjotthadhūmamāṃsalagulmakam /
mārutāvalitajvālāsaṃdhyābhravalitāmbaram

uddāmaravamudbhāntabhasmanā'stambhamaṇḍalam /
sākrandanaradārāgradīnārbhakakṛtāravam

saṃbhrāntapuruṣavyūhadantakṛttamahāśavam /
māṃsagandhajavagrastaraktāraktanijāṅguli

nīlapatralatāśaṅkāpītadhūmaghanacchavi /
bhramadgṛdhranigīrṇogranabhobhrāntolmukāmiṣam

itaretarabhinnāṅgalokavidravaṇākulam /
jvalitāgniṭaṇatkāravidīrṇahṛdayodaram

gartamārutakrāṅkārabhīmadāvāgnivalganam /
bhītājagaraphūtkārapatadaṅgārapādapam

sadakāṇḍasphuṭaddeśaṃ prāpya tacchuṣkakoṭaram /
dvādaśārkāgnidagdhasya jagato'nukṛtiṃ yayau

jvaladanalajaṭālavṛkṣakhaṇḍa-
prasaramarutprasarāvanunnalokaḥ /
jvalanatapanabhāskarātmajānāṃ
ramaṇagṛhānukṛtiṃ jagāma deśaḥ

ityārṣe śrīvāsiṣṭhamahārāmāyaṇe mokṣopāye utpattiprakaraṇe indrajālopākhyāne akāṇḍavarṇanaṃ nāmāṣṭottaraśatatamaḥ sargaḥ