Yoga Vasistha · Chapter 3.102

dvi uttaraśatatamaḥ sargaḥ

śrīvasiṣṭha uvāca /
svasaṃkalpavaśānmūḍho mohameti na paṇḍitaḥ /
akṣaye kṣayasaṃkalpānmuhyate śiśureva hi

śrīrāma uvāca /
ko'sau saṃkalpitaḥ kena kṣayo brahmavidāṃ vara /
asataiva mahāmohaṃ yenādāttatsadaiva hi

śrīvasiṣṭha uvāca /
asatā bhūtasaṃghena kṣayo'haṃkāranāmadhṛk /
vetālaḥ śiśuneveha mithyaiva parikalpitaḥ

ekasminneva sarvasminsthite paramavastuni /
kutaḥ ko'yamahaṃ nāma kathaṃ nāma kiloditaḥ

vastuto nāstyahaṃkāraḥ paramātmanyabhedini /
asamyagdarśanānmārgīsarittīvrātape yathā

manomaṇimahārambhaḥ saṃsāra iti lakṣyate /
ātmanātmānamāśritya sphuratyantaryathāmbhasā

asamyagdarśanaṃ tena tyaja rāma nirāśrayam /
sāśrayaṃ satyamānandi samyagdarśanamāśraya

dhiyā vicāradharmiṇyā mohasaṃrambhahīnayā /
vicārayādhunā satyamasatyaṃ saṃparityaja

abaddho baddha ityuktvā kiṃ śocasi mudhaiva hi /
anantasyātmatattvasya kiṃ kathaṃ kena badhyate

nānā'nānātvakalanā tvavibhinnamahātmani /
sarvasminbrahmatattve'sminkiṃ baddhaṃ kiṃ vimucyate

anārto'pyārtimānbhāti cchinne'ṅge kiṃca tāmyati /
bhedābhedavikārārtiḥ kācinnātmani vidyate

dehe naṣṭe kṣate kṣīṇe kātmanaḥ kṣatirāgatā /
bhastrāyāṃ paridagdhāyāṃ bhastrāpūro na naśyati

dehaḥ patatu vodetu kā naḥ kṣatirupasthitā /
ko naṣṭaḥ prakṣate puṣpe āmodo vyomasaṃśrayaḥ

āpatantu vapuḥpadme sukhaduḥkhahimaśriyaḥ /
ākāśoḍuyanālīnāṃ kā naḥ kṣatirupasthitā

dehaḥ patatu vodetu yātu vā gaganāntaram /
tadvilakṣaṇarūpasya kāsau bhavati me kṣatiḥ

yathā payodamarutoryathā ṣaṭpadapadmayoḥ /
tathā rāghava saṃbandhastvaccharīratvadātmanoḥ

mano rāma śarīraṃ hi jagataḥ sakalasya ca /
ādyā śaktiścidadhyātmā na naśyati kadācana

yo'sāvātmā mahāprājña na naśyati na gacchati /
na naśyati kadācicca kiṃ mudhā paritapyase

viśīrṇe'bhre yathā vātaḥ śuṣke'bje ṣaṭpado yathā /
yātyanantapadaṃ vyoma tathātmā dehasaṃkṣaye

saṃsāre'sminviharato mano'pi hi na naśyati /
jñānāgninā vinā jantorātmanāśe tu kā kathā

yaḥ kuṇḍavadaranyāyo yo ghaṭākāśayoḥ kramaḥ /
sthitirdehātmanoḥ saiva savināśāvināśayoḥ

badaraṃ hastamāyāti yathā sphuṭati kuṇḍake /
ātmā gaganamāyāti tathā calati dehake

kumbhe gacchatyakumbhatvaṃ kumbhākāśo yathāmbare /
tiṣṭhatyevamayaṃ kṣīṇe dehe dehī nirāmayaḥ

manodeho hi jantūnāṃ deśakālatirohitaḥ /
muhurmṛtipaṭācchannaḥ śaṭhe kiṃ paridevanā

deśakālatirodhāne mūḍho'pi maraṇe naraḥ /
kiṃ bibheti mahābāho neha paśyati kaścana

atastvaṃ vāsanāṃ rāma mithyaivāhamiti sthitām /
tyaja pakṣīśvaro vyomagamanotka ivāṇḍakam

eṣā hi mānasī śaktiriṣṭāniṣṭanibandhanī /
anayaiva mudhā bhrāntyā svapnavatparikalpanā

avidyaiṣā durantaiṣā duḥkhāyaiṣā vivardhate /
aparijñāyamānaiṣā tanotīdamasanmayam

eṣā tucchavadākāśaṃ tuṣāramalinaṃ yathā /
paripaśyati vibhrāntā svarūpasya svabhāvataḥ

asadevedamārambhamantharaṃ sadivotthitam /
kalpitaṃ jagadābhogi dīrghasvapna ivaitayā

bhāvanāmātra evāsyāḥ svarūpaṃ kartṛtāṃ gatam /
jagannāmāvilaṃ cakṣurvyomni bimbarucāmiva

layamasyāḥ svarūpaṃ tvaṃ naya rāma vicāraṇāt /
yathā himaśilāyāstu tapanāddivasādhipaḥ

himābhāvārthino'rkasya svodayenepsitaṃ yathā /
siddhyatyevaṃ vicāreṇa manonāśārthino'rthitam

avidyā'saṃprabuddhā hi vitatānarthadurgamā /
nānendrajālakalanāṃ śambaro hema varṣati

svavināśakriyāṃ caitāṃ mana eva karotyalam /
mano hyātmavadhaṃ nāma nāṭakaṃ parinṛtyati

ātmānamīkṣate cetaḥ svavināśāya kevalam /
nahi jānāti durbuddhirvināśaṃ pratyupasthitam

svayaṃ saṃkalpamātreṇa svavināśadṛśāmidam /
manaḥ saṃsādhayatyāśu kleśo nātropayujyate

svasaṃkalpavikalpāṃśaṃ vivekopahitaṃ manaḥ /
saṃtyajya rūpamābhogi karotyātmāvabodhanam

mahodayo manonāśo mahocchedasya tūdayaḥ /
manonāśe prayatnaṃ tvaṃ kuru mā manaso jave

aviralasukhaduḥkhavṛkṣakhaṇḍe
viṣamakṛtāntamahorage vane'smin /
prabhuridamakhile vivekahīnaṃ
subhaga mano mahadāpadekahetuḥ

ityuktavatyatha munau divaso jagāma
sāyaṃtanāya vidhaye'stamino jagāma /
snātuṃ sabhā kṛtanamaskaraṇā jagāma
śyāmākṣaye ravikaraiśca sahājagāma

ityārṣe śrīvāsiṣṭhamahārāmāyaṇe vālmīkīye utpattiprakaraṇe de० mo० upadeśakaraṇaṃ nāma dvi uttaraśatatamaḥ sargaḥ