Yoga Vasistha · Chapter 3.100

śatatamaḥ sargaḥ

śrīvasiṣṭha uvāca /
cittametadupāyātaṃ brahmaṇaḥ paramātpadāt /
atanmayaṃ tanmayaṃ ca taraṅgaḥ sāgarādiva

prabuddhānāṃ mano rāma brahmaiveha hi netarat /
jalasāmānyabuddhīnāmabdhernānyastaraṅgakaḥ

mano rāmāprabuddhānāṃ saṃsārabhramakāraṇam /
apaśyato'mbusāmānyamanyatāmbutaraṅgayoḥ

aprabuddhadṛśāṃ pakṣe tatprabodhāya kevalam /
vācyavācakasaṃbandhakṛto bhedaḥ prakalpyate

sarvaśakti paraṃ brahma nityamāpūrṇamavyayam /
na tadasti na tasminyadvidyate vitatātmani

sarvaśaktirhi bhagavānyaiva tasmai hi rocate /
śaktiṃ tāmeva vitatāṃ prakāśayati sarvagaḥ

cicchaktirbrahmaṇo rāma śarīreṣvabhidṛśyate /
spandaśaktiśca vāteṣu jaḍaśaktistathopale

dravaśaktistathāmbhaḥsu tejaḥśaktistathā'nale /
śūnyaśaktistathākāśe bhāvaśaktirbhavasthitau

brahmaṇaḥ sarvaśaktirhi dṛśyate daśadiggatā /
nāśaśaktirvināśeṣu śokaśaktiśca śokiṣu

ānandaśaktirmudite vīryaśaktistathā bhaṭe /
sargeṣu sargaśaktiśca kalpānte sarvaśaktitā

phalapuṣpalatāpatraśākhāviṭapamūlavān /
vṛkṣabīje yathā vṛkṣastathedaṃ brahmaṇi sthitam

pratibhāsavaśādeva madhyasthaṃ cittajāḍyayoḥ /
jīvetarābhidhaṃ cittamantarbrahmaṇi dṛśyate

nānātarulatāgulmajālapallavaśālayaḥ /
nirvikalpakacinmātraṃ nānā'nirjñātakalpanā

brahmaivedamahaṃtattvaṃ jagatpaśyādya rāghava /
sa ātmā sarvago nāma nityoditamahāvapuḥ

yanmanāḍmananīṃ śaktiṃ dhatte tanmana ucyate /
picchabhrāntiryathā vyomni payasyāvartadhīryathā

pratibhāsakalāmātraṃ mano jīvastathātmani /
yadetanmanaso rūpamuditaṃ mananātmakam

brāhmī śaktirasau tasmādbrahmaiva tadariṃdama /
idaṃ tadahamityeva vibhāgaḥ pratibhāsajaḥ

manaso brahmaṇo'nyacca mohe paramakāraṇam /
yadyaccaitanmanasyeva kiṃcitsadasadātmakam

vyāśabditaṃ sarvaśaktestāṃ śaktiṃ brahmatāṃ viduḥ /
manaḥ sattātmakaṃ nāma yathaitanmanasi sthitam

yathartoḥ śaktayastadvajjīvehā brahmaṇi sthitāḥ /
vyāptasarvartukusumā kṣmādeśavidhibhedataḥ

yathā dadhāti puṣpāṇi tathā cittāni lokakṛt /
kvacitkvacitkadāciddhi tasmādāyānti śaktayaḥ //
deśakālādivaicitryātkṣmātalādiva śālayaḥ /
na jātaṃ pratibhāsena tenaivānyena paśyati

pratiyogivyavacchedasaṃkhyārūpādayaśca ye /
manaḥśabdaiḥ prakalpyante brahmajānbrahma viddhi tān

yathā yathāsya manasaḥ pratibhāsaḥ pravartate /
tathā tathaiva bhavati dṛṣṭānto'tra kilaindavāḥ

svayamakṣubdhavimale yathā spando mahāmbhasi /
saṃsārakāraṇaṃ jīvastathāyaṃ paramātmani

jñasya sarvaṃ citaṃ rāma brahmaivāvartate sadā /
kallolormitaraṅgaughairabdherjalamivātmani

dvitīyā nāsti sattaikā nāmarūpakriyātmikā /
pare nānātaraṅge'bdhau kalpaneva jaletarā

jāyate naśyati tathā yadidaṃ yāti tiṣṭhati /
tadidaṃ brahmaṇi brahma brahmaṇā ca vivartate

svātmanyevātapastīvro mṛgatṛṣṇikayā yathā /
vicitreṇa vicitro'pi prasphuratyātmanā tathā

karaṇaṃ karma kartā ca jananaṃ maraṇaṃ sthitiḥ /
sarvaṃ brahmaiva nahyasti tadvinā kalpanetarā

na lobho'sti na moho'sti na tṛṣṇāsti na rañjanā /
ka ātmanyātmanolobhastṛṣṇāmoho'thavākutaḥ

ātmaivedaṃ jagatsarvamātmaiva kalanākramaḥ /
hemāṅgadatayevāyamātmodeti manastayā

abuddhaṃ yatparaṃ dhāma taccittaṃ jīva ucyate /
aparijñāta evāśu bandhurāyātyabandhutām

cinmayenātmanā'jñena svasaṃkalpanayā svayam /
śūnyatā gaganeneva jīvatā prakaṭīkṛtā

ātmaivānātmavadiha jīvo jagati rājate /
dvīndutvamiva durdṛṣṭeḥ saccāsacca samutthitam

mohārthaśabdārthadṛśoretayoratyasaṃbhavāt /
satyatvādātmanaścaiva kvātmā baddhaḥ kva mucyate

nityāsaṃbhavabandhasya baddho'smīti kukalpanā /
yasya kālpanikastasya mokṣo mithyā na tattvataḥ

śrīrāma uvāca /
mano yaṃ niścayaṃ yāti tattadbhavati nānyathā /
tena kālpaniko nāsti bandhaḥ kathamiha prabho

śrīvasiṣṭha uvāca /
mithyā kālpanikīveyaṃ mūrkhāṇāṃ bandhakalpanā /
mithyaivābhyuditā teṣāmitarā mokṣakalpanā

evamajñānakādeva bandhamokṣadṛśo'smṛteḥ /
vastutastu na bandho'sti na mokṣo'stimahāmate

kalpanāyā avastutvaṃ saṃprabuddhamatiṃ prati /
rajjvaheriva he prājña tattvabuddhamatiṃ prati

bandhamokṣādisaṃmoho na prājñasyāsti kaścana /
saṃmohabandhamokṣādi hyajñasyaivāsti rāghava

ādau manastadanu bandhavimokṣadṛṣṭī
paścātprapañcaracanā bhuvanābhidhānā /
ityādikā sthitiriyaṃ hi gatā pratiṣṭhā-
mākhyāyikā subhaga bālajanoditeva

ityārṣe śrīvāsiṣṭhamahārāmāyaṇe vālmīkīye utpattiprakaraṇe cittacikitsāpūrvakaṃ cittotpattivarṇanaṃ nāma śatatamaḥ sargaḥ