Yoga Vasistha · Chapter 2.19

ekonaviṃśaḥ sargaḥ

śrīvasiṣṭha uvāca /
viśiṣṭāṃśasamarthatvamupamāneṣu gṛhyate /
ko bhedaḥ sarvasādṛśye tūpamānopameyayoḥ

dṛṣṭāntabuddhāvekātmajñānaśāstrārthavedanāt /
mahāvākyārthasaṃsiddhā śāntinirvāṇamucyate

tasmāddṛṣṭāntadārṣṭāntavikalpollasitairalam /
yayā kayācidyuktyā tu mahāvākyārthamāśrayet

śāntiḥ śreyaḥ paraṃ viddhi tatprāptau yatnavānbhava /
bhoktavyamodanaṃ prāptaṃ kiṃ tatsiddhau vikalpitaiḥ

akāraṇaiḥ kāraṇibhirbodhārthamupamīyate /
upamānaistūpameyaiḥ sadṛśairekadeśataḥ

sthātavyaṃ neha bhogeṣu vivekarahitātmanā /
upalodarasaṃjātaparipīnāndhabhekavat

dṛṣṭāntairyatnamāśritya jetavyaṃ parame padam /
vicāraṇavatā bhāvyaṃ śāntiśāstrārthaśālinā

śāstropadeśasaujanyaprajñātajjñasamāgamaiḥ /
antarāntarasaṃpannadharmārthopārjanakriyaḥ

tāvadvicārayetprājño yāvadviśrāntimātmani /
saṃprayātyapunarnāśāṃ śāntiṃ turyapadābhidhām

turyaviśrāntiyuktasya pratīpasya bhavārṇavāt /
jīvato'jīvataścaiva gṛhasthasya tathā yateḥ

na kṛtenākṛtenārtho na śrutismṛtivibhramaiḥ /
nirmandara ivāmbhodhiḥ sa tiṣṭhati yathāsthitam

ekāṃśenopamānānāmupameyasadharmatā /
boddhavyaṃ bodhyabodhāya na stheyaṃ bodhacañcunā

yayā kayācidyuktyā tu boddhavyaṃ bodhyameva te /
yuktāyuktaṃ na paśyanti vyākulā bodhacañcavaḥ

hṛdaye saṃvidākāśe viśrānte'nubhavātmani /
vastunyanarthaṃ yaḥ prāha bodhacañcuḥ sa ucyate

abhimānavikalpāṃśairajño jñaptiṃ vikalpayet /
bodhaṃ malinayatyantaḥ svaṃ khamabda ivāmalam

sarvapramāṇasattānāṃ padamabdhirapāmiva /
pramāṇamekameveha pratyakṣaṃ tadataḥ śṛṇu

sarvākṣasāramadhyakṣaṃ vedanaṃ viduruttamāḥ /
nūnaṃ tatpratipatsiddhaṃ tatpratyakṣamudāhṛtam

anubhūtervedanasya pratipatteryathābhidham /
pratyakṣamiti nāmeha kṛtaṃ jīvaḥ sa eva naḥ

sa eva saṃvitsa pumānahaṃtāpratyayātmakaḥ /
sa yayodeti saṃvittyā sā padārtha iti smṛtā

sasaṃkalpavikalpādyaiḥ kṛtanānākramabhramaiḥ /
jagattayā sphuratyambu taraṅgāditayā yathā

prāgakāraṇamevāśu sargādau sargalīlayā /
sphuritvā kāraṇaṃ bhūtaṃ pratyakṣaṃ svayamātmani

kāraṇaṃ tvavicārotthajīvasyāsadapi sthitam /
sadivāsyāṃ jagadrūpaṃ prakṛtau vyaktimāgatam

svayameva vicārastu svata utthaṃ svakaṃ vapuḥ /
nāśayitvā karotyāśu pratyakṣaṃ paramaṃ mahat

vicāravānvicāro'pi ātmānamavagacchati /
yadā tadā nirullekhaṃ paramevāvaśiṣyate

manasyanīhite śānte svabuddhīndriyakarmabhiḥ /
nahi kaścitkṛtairartho nākṛtairapyabhāvanāt

manasyanīhite śānte na pravartanta eva te /
karmendriyāṇi karmādāvasaṃcāritayantravat

manoyantrasya calane kāraṇaṃ vedanaṃ viduḥ /
praṇālīdārumeṣasya rajjurantargatā yathā

rūpālokamanaskārapadārthavyākulaṃ jagat /
vidyate vedanasyāntarvātāntaḥ spandanaṃ yathā

sarvātmavedanaṃ śuddhaṃ yathodeti tadātmakam /
bhāti prasṛtadikkālabāhyāntārūpadehakam

dṛṣṭvaiva dṛśyatābhāsaṃ svarūpaṃ dhārayansthitaḥ /
svaṃ yathā yatra yadrūpaṃ pratibhāti tathaiva tat

sa sarvātmā yathā yatra samullāsamupāgataḥ /
tiṣṭhatyāśu tathā tatra tadrūpa iva rājate

sarvātmakatayā draṣṭurdṛśyatvamiva yujyate /
dṛśyatvaṃ draṣṭṛsadbhāve dṛśyatāpi na vāstavī

akāraṇakamevāto brahma siddhamidaṃ sthitam /
pratyakṣameva nirmātṛ tasyāṃśāstvanumādayaḥ

svayatnamātre yadupāsako ya-
staddaivaśabdārthamapāsya dūre /
śūreṇa sādho padamuttamaṃ tat
svapauruṣeṇaiva hi labhyate'ntaḥ

vicārayācāryaparamparāṇāṃ
matena satyena sitena tāvat /
yāvadviśuddhaṃ svayameva buddhayā
hyanantarūpaṃ paramabhyupaiṣi

ityārṣe śrīvāsiṣṭhamahārāmāyaṇe vālmīkīye mumukṣuvyavahāraprakaraṇe pramāṇanirūpaṇaṃ nāmaikonaviśaḥ sargaḥ