Yoga Vasistha · Chapter 2.20

viśaḥ sargaḥ

śrīvasiṣṭha uvāca /
āryasaṃgamayuktyādau prajñāṃ vṛddhiṃ nayedbalāt /
tato mahāpuruṣatāṃ mahāpuruṣalakṣaṇaiḥ

yo yo yena guṇeneha puruṣaḥ pravirājate /
śiṣyate taṃ tamevāśu tasmādbuddhiṃ vivardhayet

mahāpuruṣatā hyeṣā śamādiguṇaśālinī /
samyagjñānaṃ vinā rāma siddhimeti na kāṃcana

jñānācchamādayo yānti vṛddhiṃ satpuruṣakramāḥ /
ślāghanīyāḥ phalenāntarvṛṣṭeriva navāṅkurāḥ

śamādibhyo guṇebhyaśca vardhate jñānamuttamam /
annātmakebhyo yajñebhyaḥ śālivṛṣṭirivottamā

guṇāḥ śamādayo jñānācchamādibhyastathā jñatā /
parasparaṃ vivardhante te abjasarasī iva

jñānaṃ satpuruṣācārājjñānātsatpuruṣakramaḥ /
parasparaṃ gatau vṛddhiṃ jñānasatpuruṣakramau

śamaprajñādinipuṇapuruṣārthakrameṇa ca /
abhyasetpuruṣo dhīmāñjñānasatpuruṣakramau

na yāvatsamamabhyastau jñānasatpuruṣakramau /
eko'pi naitayostāta puruṣasyeha sidhyati

yathā kalamarakṣiṇyā gītyā vitatatālayā /
khagotsādena sahitaṃ gītānandaḥ prasādhyate

jñānasatpuruṣehābhyāmakartrā kartṛrūpiṇā /
tathā puṃsā niricchena samamāsādyate padam

sadācārakramaḥ prokto mayaivaṃ raghunandana /
tathopadiśyate samyagevaṃ jñānakramo'dhunā

idaṃ yaśasyamāyuṣyaṃ puruṣārthaphalapradam /
tajjñādāptācca sacchāstraṃ śrotavyaṃ kila dhīmatā

śrutvā tvaṃ buddhinairmalyādbalādyāsyasi tatpadam /
yathā katakasaṃśleṣātprasādaṃ kaluṣaṃ payaḥ

viditavedyamidaṃ hi mano mune-
rvivaśameva hi yāti paraṃ padam /
yadavabuddhamakhaṇḍitamuttamaṃ
tadavabodhavaśānna jahāti hi

ityārṣe śrīvāsiṣṭhamahārāmāyaṇe dvātriṃśatsāhasrayāṃ saṃhitāyāṃ vālmīkīye mokṣopāye mumukṣuvyavahāraprakaraṇe
sadācāranirūpaṇaṃ nāma viṃśatitamaḥ sargaḥ