Yoga Vasistha · Chapter 2.17

saptadaśaḥ sargaḥ

śrīvasiṣṭha uvāca /
evamantarviveko yaḥ sa mahāniha rāghava /
yogyo jñānagiraḥ śrotuṃ rājeva nayabhāratīm

avadāto'vadātasya vicārasya mahāśayaḥ /
jaḍasaṅgojjhito yogyaḥ śaradindoryathā nabhaḥ

tvametayā khaṇḍitayā guṇalakṣmyā samāśritaḥ /
manomohaharaṃ vākyaṃ vakṣyamāṇamidaṃ śrṛṇu

puṇyakalpadrumo yasya phalabhārānataḥ sthitaḥ /
muktaye jāyate jantostasyedaṃ śrotumudyamaḥ

pāvanānāmudārāṇāṃ parabodhaikadāyinām /
vacasāṃ bhājanaṃ bhūtyai bhavyo bhavati nādhamaḥ

mokṣopāyābhidhāneyaṃ saṃhitā sārasaṃmitā /
triṃśaddve ca sahasrāṇi jñātā nirvāṇadāyinī

dīpe yathā vinidrasya jvalite saṃpravartate /
āloko'nicchato'pyevaṃ nirvāṇamanayā bhavet

svayaṃ jñātā śrutā vāpi bhrāntiśāntyaikasaukhyadā /
āprekṣya varṇitā sadyo yathā svargataraṅgiṇī

yathā rajjvāmahibhrāntirvinaśyatyavalokanāt /
tathaitatprekṣaṇācchāntimeti saṃsāraduḥkhitā

yuktiyuktārthavākyāni kalpitāni pṛthakpṛthak /
dṛṣṭāntasārasūktāni cāsyāṃ prakaraṇāni ṣaṭ

vairāgyākhyaṃ prakaraṇaṃ prathamaṃ parikīrtitam /
virāgo vardhate yena sekeneva marau taruḥ

[ anubandhena sahitaṃ diṣṭatattvanirūpaṇam /
sārdhaṃ sahasraṃ granthasya yasminhṛdi vicārite /
prakāśācchuddhatodeti maṇāviva sumārjite

mumukṣuvyavahārākhyaṃ tataḥ prakaraṇaṃ kṛtam /
sahasramātraṃ granthasya yuktigranthena sundaram

svabhāvo hi mumukṣūṇāṃ narāṇāṃ yatra varṇyate /
athotpattiprakaraṇaṃ dṛṣṭāntākhyāyikāmayam

saptagranthasahasrāṇi vijñānapratipādakam /
jāgatī draṣṭṛdṛśyaśrīrahaṃtvamitirūpiṇī

anutpannaivotthiteva yatreti parivarṇyate /
yasminśrute jagadidaṃ śrotāntarbudhyate'khilam

sāsmadyuṣmatsavistāraṃ salokākāśaparvatam /
piṇḍagrahavinirmuktaṃ nirbhittikamaparvatam

pṛthvyādibhūtarahitaṃ saṃkalpa iva pattanam /
svapnopalambhabhāvābhaṃ manorājyavadātatam

gandharvanagaraprakhyamarthaśūnyopalambhanāt /
dvicandravibhramābhāsaṃ mṛgatṛṣṇāmbuvartanam

nauyānalolaśailābhaṃ satyalābhavivarjitam /
cittabhramapiśācābhaṃ nirbījamapi bhāsuram

kathārthapratibhāsābhaṃ vyomamuktāvalīnibham /
kaṭakatvaṃ yathā hemni taraṅgatvaṃ yathāmbhasi

yathā nabhasi nīlatvamasadevotthitaṃ sadā /
abhittiraṅgarahitamupalabdhimanoharam

svapne vā vyomni vā citramakartṛ cirabhāsuram /
avahnireva vahnitvaṃ dhatte citrānalo yathā

dadhātyevaṃ jagacchabdarūpārthamasadātmakam /
taraṅgotpalamālābhaṃ dṛṣṭanṛtyamivotthitam

cakracītkārapūrṇasya jalarāśimivodyatam /
śīrṇapatraṃ bhraṣṭanaṣṭaṃ grīṣme vanamivārasam

maraṇavyagracittābhaṃ śilāgṛhaguhāspadam /
andhakāraguhaikaikanṛttamunmattaceṣṭitam

praśāntājñānanīhāraṃ vijñānaśaradambaram /
samutkīrṇamiva stambhe citraṃ bhittāvivoditam

paṅkādivābhiracitaṃ sacetanamacetanam /
tataḥ sthitiprakaraṇaṃ caturthaṃ parikalpitam

trīṇi granthasahasrāṇi vyākhyānākhyāyikāmayam /
itthaṃ jagadahaṃbhāvarūpasthitimupāgatam

draṣṭṛdṛśyakramaṃ prauḍhamityatra parikīrtitam /
daśadiṅmaṇḍalābhogabhāsuro'yaṃ jagadbhramaḥ

itthamabhyāgato vṛddhimiti tatrocyate ciram /
upaśāntiprakaraṇaṃ tataḥ pañcasahasrakam

pañcamaṃ pāvanaṃ proktaṃ yuktisaṃtatisundaram /
idaṃ jagadahaṃ tvaṃ ca sa iti bhrāntirutthitā

itthaṃ saṃśāmyatītyasminkathyate ślokasaṃgrahaiḥ /
upaśāntiprakaraṇe śrute śāmyati saṃsṛtiḥ

prabhraṣṭacitraseneva kiṃcillabhyopalambhanā /
śatāṃśaśiṣṭā bhavati saṃśāntabhrāntarūpiṇī

anyasaṃkalpacittasthā nagaraśrīrivāsatī /
alabhyavastupārśvasthasvapnayuddhacirāravā

śāntasaṃkalpamattābhrabhīṣaṇāśaniśabdavat /
vismṛtasvapnasaṃkalpanirmāṇanagaropamā

bhaviṣyannagarodyānaprasūvandhyāmalāṅgikā /
tasyā jihvocyamānograkathārthānubhavopamā

anullikhitacitrasya citravyāpteva bhittibhūḥ /
parivismaryamāṇārthakalpanānagarīnibhā

sarvartumadanutpannavanaspandāsphuṭākṛtiḥ /
bhāvipuṣpavanākāravasantarasarañjanā

antarlīnataraṅgaughasaumyavārisaritsamā /
nirvāṇākhyaṃ prakaraṇaṃ tataḥ ṣaṣṭhamudāhṛtam

śiṣṭo granthaḥ parīmāṇaṃ tasya jñānamahārthadaḥ /
buddhe tasminbhavecchreyo nirvāṇaṃ śāntakalpanam

acetyacitprakāśātmā vijñānātmā nirāmayaḥ /
paramākāśakośācchaḥ śāntasarvabhavabhramaḥ

nirvāpitajagadyātraḥ kṛtakartavyasusthitaḥ /
samastajanatārambhavajrastambho nabhonibhaḥ

vinigīrṇayathāsaṃkhyajagajjālātitṛptimān /
ākāśībhūtaniḥśeṣarūpālokamanaskṛtiḥ

kāryakāraṇakartṛtvaheyādeyadṛśojjhitaḥ /
sadeha iva nirdehaḥ sasaṃsāro'pyasaṃsṛtiḥ

cinmayo ghanapāṣāṇajaṭharāpīvaropamaḥ /
cidādityastapam̐llokānandhakāroparopamam

paraprakāśarūpo'pi paramāndhyamivāgataḥ /
ruddhasaṃsṛtidurlīlaḥ prakṣīṇāśāviṣūcikaḥ

naṣṭāhaṃkāravetālo dehavānakalevaraḥ /
kasmiṃścidromakoṭyagre tasyeyamavatiṣṭhate /
jagallakṣmīrmahāmeroḥ puṣpe kvacidivālinī

paramāṇau paramāṇau cidākāśaḥ svakoṭare /
jagallakṣmīsahasrāṇi dhatte kṛtvātha paśyati

vitatatā hṛdayasya mahāmate-
rhariharāñjajalakṣaśatairapi /
tulanameti na muktimato yataḥ
pravitatāsti niruttamavastunaḥ

ityārṣe śrīvāsiṣṭhamahārāmāyaṇe vālmīkīye mumukṣuvyavahāraprakaraṇe granthasaṃkhyādivarṇanaṃ nāma saptadaśaḥ sargaḥ