Yoga Vasistha · Chapter 2.16

ṣoḍaśaḥ sargaḥ

śrīvasiṣṭha uvāca /
viśeṣeṇa mahābuddhe saṃsārottaraṇe nṛṇām /
sarvatropakarotīha sādhuḥ sādhusamāgamaḥ

sādhusaṅgatarorjātaṃ vivekakusumaṃ sitam /
rakṣanti ye mahātmāno, bhājanaṃ te phalaśriyaḥ

śūnyamākīrṇatāmeti mṛtirapyutsavāyate /
āpatsaṃpadivābhāti vidvajjanasamāgame

himamāpatsarojinyā mohanīhāramārutaḥ /
jayatyeko jagatyasminsādhuḥ sādhusamāgamaḥ

paraṃ vivardhanaṃ buddherajñānataruśātanam /
samutsāraṇamādhīnāṃ viddhi sādhusamāgamam

vivekaḥ paramo dīpo jāyate sādhusaṃgamāt /
manoharojjvalo nūnamāsekādiva gucchakaḥ

nirapāyāṃ nirābādhāṃ nirvṛtiṃ nityapīvarīm /
anuttamāṃ prayacchanti sādhusaṅgavibhūtayaḥ

api kaṣṭatarāṃ prāptairdaśāṃ vivaśatāṃ gataiḥ /
manāgapi na saṃtyājyā mānavaiḥ sādhusaṃgatiḥ

sādhusaṃgatayo loke sanmārgasya ca dīpikāḥ /
hārdāndhakārahāriṇyo bhāso jñānavivasvataḥ

yaḥ snātaḥ śītasitayā sādhusaṃgatigaṅgayā /
kiṃ tasya dānaiḥ kiṃ tīrthaiḥ kiṃ tapobhiḥ kimadhvaraiḥ

nīrāgāśchinnasaṃdehā galitagranthayo'nagha /
sādhavo yadi vidyante kiṃ tapastīrthasaṃgrahaiḥ

viśrāntamanaso dhanyāḥ prayatnena pareṇa hi /
daridreṇeva maṇayaḥ prekṣaṇīyā hi sādhavaḥ

satsamāgamasaundaryaśālinī dhīmatāṃ matiḥ /
kamalevāpsarovṛnde sarvadaiva virājate

tenāmalavicārasya padasyāgrāvacūlitā /
prathitā yena dhanyena na tyaktā sādhusaṃgatiḥ

vicchinnagranthayastajjñāḥ sādhavaḥ sarvasaṃmatāḥ /
sarvopāyena saṃsevyāste hyupāyā bhavāmbudhau

te ete narakāgnīnāṃ saṃśuṣkendhanatāṃ gatāḥ /
yairdṛṣṭā helayā santo narakānalavāridāḥ

dāridryaṃ maraṇaṃ duḥkhamityādiviṣayo bhramaḥ /
saṃpraśāmyatyaśeṣeṇa sādhusaṃgamabheṣajaiḥ

saṃtoṣaḥ sādhusaṅgaśca vicāro'tha śamastathā /
eta eva bhavāmbhodhāvupāyāstaraṇe nṛṇām

saṃtoṣaḥ paramo lābhaḥ satsaṅgaḥ paramā gatiḥ /
vicāraḥ paramaṃ jñānaṃ śamo hi paramaṃ sukham

catvāra ete vimalā upāyā bhavabhedane /
yairabhyastāsta uttīrṇā mohavāribhavārṇavāt

ekasminneva vai teṣāmabhyaste vimalodaye /
catvāro'pi kilābhyastā bhavanti sudhiyāṃ vara

eko'pyeko'pi sarveṣāmeṣāṃ prasavabhūriha /
sarvasaṃsiddhaye tasmātyatnenaikaṃ samāśrayet

satsamāgamasaṃtoṣavicārāḥ suvicāritam /
pravartante śamasvacche vāhanānīva sāgare

vicārasaṃtoṣaśamasatsamāgamaśālini /
pravartante śriyo jantau kalpavṛkṣāśrite yathā

vicāraśamasatsaṅgasaṃtoṣavati mānave /
pravartante prapūrṇendau saundaryādyā guṇā iva

satsaṅgasaṃtoṣaśamavicāravati sanmatau /
pravartante mantrivare rājanīva jayaśriyaḥ

tasmādekatamaṃ nityameteṣāṃ raghunandana /
pauruṣeṇa mano jitvā yatnenābhyāharedguṇam

paraṃ pauruṣamāśritya jitvā cittamataṅgajam /
yāvadeko guṇo nāntastāvannāstyuttamā gatiḥ

pauruṣeṇa prayatnena dantairdantānvicūrṇayet /
yāvannābhiniviṣṭaṃ te mano rāma guṇārjane

devo bhavātha yakṣo vā puruṣaḥ pādapo'tha vā /
tāvattava mahābāho nopāyo'stīha kaścana

ekasminneva phalade guṇe balamupāgate /
kṣīyante sarva evāśu doṣā vivaśacetasaḥ

guṇe vivṛddhe vardhante guṇā doṣajayapradāḥ /
doṣe vivṛddhe vardhante doṣā guṇavināśanāḥ

manomohavane hyasminveginī vāsanāsarit /
śubhāśubhabṛhatkūlā nityaṃ vahati jantuṣu

sā hi svena prayatnena yasminneva nipātyate /
kūle tenaiva vahati yathecchasi tathā kuru

puruṣayatnajavena manovane
śubhataṭānugatāṃ kramaśaḥ kuru /
varamate nijabhāvamahānadī-
mahaha tena manāgapi nohyase

ityārṣe śrīvāsiṣṭhamahārāmāyaṇe vālmīkīye mumukṣuvyavahāraprakaraṇe sadācāranirūpaṇaṃ nāma ṣoḍaśaḥ sargaḥ