Yoga Vasistha · Chapter 2.12

śrīvasiṣṭha uvāca /
paripūrṇamanā mānyaḥ praṣṭuṃ jānāsi rāghava /
vetsi coktaṃ ca tenāhaṃ pravṛtto vaktumādarāt

rajastamobhyāṃ rahitā śuddhasattvānupātinīm /
matimātmani saṃsthāpya jñānaṃ śrotuṃ sthirau bhava

vidyate tvayi sarvaiva pracchakasya guṇāvalī /
vakturguṇāścaiva mayi ratnaśrīrjaladhau yathā

āptavānasi vairāgyaṃ vivekāsaṅgajaṃ suta /
candrakānta ivārdratvaṃ lagnacandrakarotkaraḥ

ciramāśaiśavādeva tavābhyāso'sti sadguṇaiḥ /
śuddhaiḥ śuddhasya dīrghaiśca padmasyevātisaṃtataiḥ

ataḥ śṛṇu kathāṃ vakṣye tvamevāsyā hi bhājanam /
na hi candraṃ vinā śuddhā savikāsā kumudvatī

ye kecana samārambhā yāśca kāścana dṛṣṭayaḥ /
te ca tāśca pade dṛṣṭe niḥśeṣe yānti vai śamam

yadi vijñānaviśrāntirna bhavedbhavyacetasaḥ /
tadasyāṃ saṃsṛtau sādhuścintāmauḍhyaṃ saheta kaḥ

paraṃ prāpya vilīyante sarvā mananavṛttayaḥ /
kalpāntārkagaṇāsaṅgātkulaśailaśilā iva

duḥsahā rāma saṃsāraviṣāveśaviṣūcikā /
yogagāruḍamantreṇa pāvanena praśāmyati

sa ca yogaḥ sajjanena saha śāstravicāraṇāt /
paramārthajñānamantro nūnaṃ labhyata eva ca

avaśyamiha hi vicāre kṛte sakaladuḥkhaparikṣayo bhavatīti mantavyaṃ nāto vicāradṛṣṭayo'vahelayā draṣṭavyāḥ

vicāravatā puruṣeṇa sakalamidamādhipañjaraṃ sarpeṇa tvacamiva paripakvāṃ saṃtyajya vigatajvareṇa śītalāntaḥkaraṇena vinodādindrajālamiva jagadakhilamālokyate samyagdarśanavatā asamyagdarśanavato hi paraṃ duḥkhamidam

viṣamo hyatitarāṃ saṃsārarāgo bhogīva daśati asiriva cchinatti kunta iva vedhayati rajjurivāveṣṭayati pāvaka iva dahati rātririvāndhayati aśaṅkitaparipatitapuruṣānpāṣāṇa iva vivaśīkaroti harati prajñāṃ nāśayati sthitiṃ pātayati mohāndhakūpe tṛṣṇā jarjarīkaroti na tadasti kiṃcidduḥkhaṃ saṃsārī yanna prāpnoti

duranteyaṃ kila viṣayaviṣūcikā yadi na cikitsyate tannitarāṃ narakanagaranikaraphalānubandhinī tattatkaroti

yatra śilāśitāsiśātaḥ pāta upalatāḍanamagnidāho himāvaseko'ṅgāvakartanaṃ candanacarcātaruvanāni ghuṇavṛttāntaḥpariveṣo'ṅgaparimārjanamanavaratānalavi-
calitasamaranārācanipāto nidāghavinodanaṃ dhārāgṛhasīkaravarṣaṇaṃ śiraśchedaḥ sukhanidrāmūkīkaraṇamānanamudrābāndhurya mahānupacayaḥ

tadevaṃvidhakaṣṭaceṣṭāsahasradāruṇe saṃsāracalayantre'smin rāghava nāvahelanā kartavyā avaśyameva vidhāraṇīyamevaṃ cāvaboddhavyaṃ yathā kila śāstravicārācchreyo bhavatīti

anyasya raghukulendo yadi caite mahāmunayo maharṣayaśca viprāśca rājānaśca jñānakavacenāvaguṇṭhitaśarīrāste kathamaduḥkhakṣamā api duḥkhakarīṃ tāṃ tāṃ vṛttipūrvikāṃ saṃsārakadarthanāmanubhavantaḥ satatameva muditamanasastiṣṭhanti

iha hi /
vikautukā vigatavikalpaviplavā yathā sthitā hariharapadmajādayaḥ /
narottamāḥ samadhigatātmadīpakāstathā sthitā jagati viśuddhabuddhayaḥ

parikṣīṇe mohe vigalati ghane jñānajalade parijñāte tattve samadhigata ātmanyatitate /
vicāryāryaiḥ sārdhaṃ calitavapuṣo vai sadṛśato dhiyā dṛṣṭe tattve ramaṇamaṭanaṃ jāgatamidam

anyacca rāghava /
prasanne cittattve hṛdi śamabhave valgati pare
śamābhogībhūtāsvakhilakalanādṛṣṭiṣu puraḥ /
samaṃ yāti svāntaḥkaraṇaghaṭanāsvāditarasaṃ
dhiyā dṛṣṭe tattve ramaṇamaṭanaṃ jāgatamidam

anyacca /
rathaḥ sthāṇurdehasturagaracanā cendriyagatiḥ
parispando vāto vahanakalitānandaviṣayaḥ /
paro'ṇurvā dehī jagati viharāmītyanaghayā
dhiyā dṛṣṭe tattveramaṇamaṭanaṃ jāgatamidam

ityārṣe śrīvāsiṣṭhamahārāmāyaṇe vālmīkīye mumukṣuvyavahāraprakaraṇe tattvamāhātmyavarṇanaṃ nāma dvādaśaḥ sargaḥ

ātmānaṃ rathinaṃ viddhi śarīraṃ rathameva tu ityādirūpakadṛṣṭyā vā ramaṇamupapannamityāha - ratha iti / sthāṇuśchinnatarurivācetano deho rathaḥ indriyāṇāṃ viṣayābhimukhī gatisturagāṇāṃ racanāgaticāturī paritaḥ spandaścālanaṃ yena sa pragraho vātaḥ prāṇapradhānaṃ manaḥ arthādrathādibhirvahanena prāpaṇena kalitāḥ prāptā ānandarūpā viṣayā yena tathāvidho dehī ātmā samādhau paraḥ paramātmaiva vyavahārakāle buddhyupādhiparicchedādaṇuḥ sūkṣmo vā rathīti śeṣaḥ / evaṃbhūto'haṃ jagati viharāmīti dhiyāpi ramaṇamevetyarthaḥ //२ २// iti śrīvāsiṣṭamahārāmāyaṇatātparyaprakāśe mumukṣubyavahāraprakaraṇe tattvamāhātmyavarṇanaṃ nāma dvādaśaḥ sargaḥ