Yoga Vasistha · Chapter 2.10

daśamaḥ sargaḥ

śrīvasiṣṭha uvāca /
yathāsthitaṃ brahmatattvaṃ sattāniyatirucyate /
sā vineturvinetṛtvaṃ sā vineyavineyatā

ataḥ pauruṣamāśritya śreyase nityabāndhavam /
ekāgraṃ kuru taccittaṃ śṛṇu coktamidaṃ mama

avāntaranipātīni svārūḍhāni manoratham /
pauruṣeṇendriyāṇyāśu saṃyamya samatāṃ naya

ihāmutra ca siddhyarthaṃ puruṣārthaphalapradām /
mokṣopāyamayīṃ vakṣye saṃhitāṃ sāranirmitām

apunargrahaṇāyāntastyaktvā saṃsāravāsanām /
saṃpūrṇau śamasaṃtoṣāvādāyodārayā dhiyā

sapūrvāparavākyārthavicāraviṣayāhatam /
manaḥ samarasaṃ kṛtvā sānusaṃ'dhānamātmani

sukhaduḥkhakṣayakaraṃ mahānandekakāraṇam /
mokṣopāyamimaṃ rāma vakṣyamāṇaṃ mayā śṛṇu

imāṃ mokṣakathāṃ śrutvā saha sarvairvivekibhiḥ /
paraṃ yāsyasi nirduḥkhaṃ nāśo yatra na vidyate

idamuktaṃ purākalpe brahmaṇā parameṣṭhinā /
sarvaduḥkhakṣayakaraṃ paramāśvāsanaṃ śriyaḥ

śrīrāma uvāca /
kenoktaṃ kāraṇenedaṃ brahmanpūrva svayaṃbhuvā /
kathaṃ ca bhavatā prāptametatkathaya me prabho

śrīvasiṣṭha uvāca /
astyanantavilāsātmā sarvagaḥ sarvasaṃśrayaḥ /
cidākāśo'vināśātmā pradīpaḥ sarvajantuṣu

spandāspandasamākārāttato viṣṇurajāyata /
syandamānarasāpūrāttaraṅgaḥ sāgarādiva

sumerukarṇikāttasya digdalāddhṛdayāmbujāt /
tārakākesaravataḥ parameṣṭhī vyajāyata

vedavedārthaviddevamunimūṇḍalamaṇḍitaḥ /
so'sṛjatsakala saga vikalpaughaṃ yathā manaḥ

jambūdvūpisya koṇe'khiravarṣe bhāratanāmani /
sasaja janasargaudhaṃ hyādhivyādhipariplutam

bhāvābhāvaviṣaṇṇāṅgamutpātadhvasatatparam /
sarge'sminbhūtajātīnā nānāvyasanasakulam

janasyaitasya duḥkhaṃ taddṛṣṭvā sakalalokakṛt /
jagāma karuṇāmīśaḥ putraduḥkhātpitā yathā

ka eteṣāṃ hatāśānāṃ duḥkhasyānto hatāyuṣām /
syāditi kṣaṇamekāgraṃ cintayāmāsa bhūtaye

iti saṃcintya bhagavānsasarja svayamīśvaraḥ /
tapo dharma ca dānaṃ ca satyaṃ tīrthāni caiva hi

etatsṛṣṭvā punadavāścantayāmāsa bhūtakṛt /
puṃsāṃ nānena sargasya duḥkhasyānta iti svayam

nirvāṇaṃ nāma paramaṃ sukhaṃ yena punarjanaḥ /
na jāyate na mriyate tajjñānādeva labhyate

saṃsārottaraṇe jantorupāyo jñānameva hi /
tapo dānaṃ tathā tīrthamanupāyāḥ prakīrtitāḥ

tattāvaduḥkhamokṣārtha janasyāsya hatātmanaḥ /
pratyagraṃ taraṇopāyamāśu prakaṭayāmyaham

iti saṃcintya bhagavānbrahmā kamalasaṃsthitaḥ /
manasā parisaṃkalpya māmutpāditavānimam

kuto'pyutpanna evāśu tato'haṃ samupasthitaḥ /
pitustasya punaḥ śīghramūrmirūrmerivānagha

kamaṇḍaludharo nāthaḥ sakamaṇḍalunā mayā /
sākṣamālaḥ sākṣamālaṃ sa praṇamyābhivāditaḥ

ehi putreti māmuktvā sa svābjasyottare dale /
śuklāśca iva śītāṃśu yojayāmāsa pāṇinā

mṛgakṛttiparīdhāno mṛgakṛttinijāmbaram /
māmuvāca pitā brahmā suhaṃsaḥ sārasaṃ yathā

muhūrtamātraṃ te putra ceto vānaracañcalam /
ajñānamabhyāsraśatu śaśaḥ śaśadharaṃ yathā

iti tenāśu śaptaḥ sanvicārasamanantaram /
ahaṃ vismṛtavānsarve svarūpamamalaṃ kila

athāhaṃ dīnatā yātaḥ sthito'saṃbuddhayā dhiyā /
duḥkhaśokābhisaṃtapto jāto jana ivādhanaḥ

kaṣṭaṃ saṃsāranāmāyaṃ doṣaḥ kathamihāgataḥ /
iti cintitavānantastūṣṇīmeva vyavasthitaḥ

athābhyadhātsa māṃ tātaḥ putra kiṃ duḥkhavānasi /
duḥkhopaghātaṃ māṃ pṛccha sukhī nityaṃ bhaviṣyasi

tataḥ pṛṣṭaḥ sa bhagavānmayā sakalalokakṛt /
hemapadmadalasthena saṃsāravyādhibheṣajam

kathaṃ nātha mahāduḥkhamayaḥ saṃsāra āgataḥ /
kathaṃ ca kṣīyate jantoriti pṛṣṭena tena me

tajjñānaṃ subahu proktaṃ yajjñātvā pāvanaṃ param /
ahaṃ piturabhiprāyaḥ kilādhika iva sthitaḥ

tato viditavedyaṃ māṃ nijāṃ prakṛtimāsthitam /
sa uvāca jagatkartā vaktā sakalakāraṇam

śāpenājñapadaṃ nītvā pṛcchakastvaṃ mayā kṛtaḥ /
putrāsya jñānasārasya samastajanasiddhaye

idānīṃ śāntaśāpastvaṃ paraṃ bodhamupāgataḥ /
saṃsthito'hamivaikānmā'kanaka kanakādivat

gacchedānīṃ mahīpṛṣṭhe jambūdvīpāntarasthitam /
sādho bharatavarṣa tvaṃ lokānugrahahetunā

tatra kriyākāṇḍaparāstvayā putra mahādhiyā /
upadeśvāḥ kriyākāṇḍakrameṇa kramaśālinā

virarktācettāśca tathā mahāprājñā vicāriṇaḥ /
upadeśyāstvayā sādho jñānenānandadāyinā

iti tena niyukto'haṃ pitrā kamalayoninā /
iha rāghava tiṣṭhāmi yāvadbhūtaparamparā

kartavyamasti na mameha hi kiṃcideva
sthātavyamityatimanā bhuvi saṃsthito'smi /
saṃśāntayā satatasuptadhiyeha vṛtyā
kārya karomi na ca kiṃcidahaṃ karomi

ityārṣe śrīvāsiṣṭhamahārāmāyaṇe vālmīkīye mumukṣuvyavahāraprakaraṇe jñānāvataraṇaṃ nāma daśamaḥ sargaḥ