Scripture Library

Yoga Vasistha · Chapter 1.7

1.7.7

saptamaḥ sargaḥ

1.7.1

śrīvālmīkiruvāca /
tacchrutvā rājasiṃhasya vākyamadbhutavistaram /
hṛṣṭaromā mahātejā viśvāmitro'bhyabhāṣata

1.7.2

sadṛśaṃ rājaśārdūla tavaivaitanmahītale /
mahāvaṃśaprasūtasya vasiṣṭhavaśavartinaḥ

1.7.3

yattu me hṛdgataṃ vākyaṃ tasya kāryavinirṇayam /
kuru tvaṃ rājaśārdūla dharmaṃ samanupālaya

1.7.4

ahaṃ dharmaṃ samātiṣṭhe siddhayarthaṃ puruṣarṣabha /
tasya vighnakarā ghorā rākṣasā mama saṃsthitāḥ

1.7.5

yadā yadā tu yajñena yaje'haṃ vibudhavrajān /
tadā tadā tu me yajñaṃ vinighnanti niśācarāḥ

1.7.6

bahuśo vihite tasminmayā rākṣasanāyakāḥ /
akiraṃste mahīṃ yāge māṃsena rudhireṇa ca

1.7.7

avadhūte tathābhūte tasminyāgakadambake /
kṛtaśramo nirutsāhastasmāddeśādupāgataḥ

1.7.8

na ca me krodhamutsraṣṭuṃ buddhirbhavati pārthiva /
tathābhūtaṃ hi tatkarma na śāpastasya vidyate

1.7.9

īdṛśī yajñadīkṣā sā mama tasminmahākratau /
tvatprasādādavighnena prāpayeyaṃ mahāphalam

1.7.10

trātumarhasi māmārtaṃ śaraṇārthinamāgatam /
arthināṃ yannirāśatvaṃ sattame'bhibhavo hi saḥ

1.7.11

tavāsti tanayaḥ śrīmāndṛptaśārdūlavikramaḥ /
mahendrasadṛśo vīrye rāmo rakṣovidāraṇaḥ

1.7.12

taṃ putraṃ rājaśārdūla rāmaṃ satyaparākramam /
kākapakṣadharaṃ śūraṃ jyeṣṭhaṃ me dātumarhasi

1.7.13

śakto hyeṣa mayā gupto divyena svena tejasā /
rākṣasā ye'pakartārasteṣāṃ mūrdhavinigrahe

1.7.14

śreyaścāsya kariṣyāmi bahurūpamanantakam/
trayāṇāmapi lokānāṃ yena pūjyo bhaviṣyati

1.7.15

na ca te rāmamāsādya sthātuṃ śaktā niśācarāḥ /
kruddhaṃ kesariṇaṃ dṛṣṭvā vaneraṇa ivaiṇakāḥ

1.7.16

teṣāṃ na cānyaḥ kākutsthādyoddhumutsahate pumān /
ṛte kesariṇaḥ kruddhānmattānāṃ kariṇāmiva

1.7.17

vīryotsiktā hi te pāpāḥ kālakūṭopamā raṇe /
kharadūṣaṇayorbhṛtyāḥ kṛtāntāḥ kupitā iva

1.7.18

rāmasya rājaśārdūla sahiṣyante na sāyakān /
anāratagatā dhārā jaladasyeva pāṃsavaḥ

1.7.19

na ca putrakṛtaṃ snehaṃ kartumarhasi pārthiva /
na tadasti jagatyasminyanna deyaṃ mahātmanām

1.7.20

hanta nūnaṃ vijānāmi hatāṃstānviddhirākṣasān /
nahyasmadādayaḥ prājñāḥ saṃdigdhe saṃpravṛttayaḥ

1.7.21

ahaṃ vedmi mahātmānaṃ rāmaṃ rājīvalocanam /
vasiṣṭhaśca mahātejā ye cānye dīrghadarśinaḥ

1.7.22

yadi dharmo mahattvaṃ ca yaśaste manasi sthitam /
tanmahyaṃ samabhipretamātmajaṃ dātumarhasi

1.7.23

daśarātraśca me yajño yasminrāmeṇa rākṣasāḥ /
hantavyā vighnakartāro mama yajñasya vairiṇaḥ

1.7.24

atrāpyanujñāṃ kākutstha dadatāṃ tava mantriṇaḥ /
vasiṣṭhapramukhāḥ sarve tena rāmaṃ visarjaya

1.7.25

nātyeti kālaḥ kālajña yathāyaṃ mama rāghava /
tathā kuruṣva bhadraṃ te mā ca śoke manaḥ kṛthāḥ

1.7.26

kāryamaṇvapi kāle tu kṛtametyupakāratām /
mahadapyupakāro'pi riktatāmetyakālataḥ

1.7.27

ityevamuktvā dharmātmā dharmārthasahitaṃ vacaḥ /
virarāma mahātejā viśvāmitro munīśvaraḥ

1.7.28

śrutvā vaco munivarasya mahānubhāva-
stūṣṇīmatiṣṭhadupapannapadaṃ sa vaktum /
no yuktiyuktakathanena vinaiti toṣaṃ
dhīmānapūritamano'bhimataśca lokaḥ

1.7.7

ityārṣe śrīvāsiṣṭhamahārāmāyaṇe vālmīkīye vairāgyaprakaraṇe viśvāmitravākyaṃ nāma saptamaḥ sarga

Original text: yogavāsiṣṭhaḥ · Sanskrit Wikisource contributors · Sanskrit Wikisource · CC BY-SA 4.0