Yoga Vasistha · Chapter 1.4

śrīvālmīkiruvāca /
rāmaḥ puṣpāñjalivrātairvikīrṇaḥ puravāsibhiḥ /
praviveśa gṛhaṃ śrīmāñjayanto viṣṭapaṃ yathā

praṇanāmātha pitaraṃ vasiṣṭhaṃ bhrātṛbāndhavān /
brāhmaṇānkulavṛddhāṃśca rāghavaḥ prathamāgataḥ

suhṛdbhirbhrātṛbhiścaiva pitrā dvijagaṇena ca /
muhurāliṅgitācāro rāghavo na mamau mudā ///
tasmingṛhe dāśaratheḥ priyaprakathanairmithaḥ /
jughūrṇurmadhurairāśā mṛduvaṃśastanairiva //

babhūvātha dinānyaṣṭau rāmāgamana utsavaḥ /
sukhaṃ mattajanonmuktakalakolāhalākulaḥ

uvāsa sa sukhaṃ gehe tataḥ prabhṛti rāghavaḥ /
varṇayanvividhākārāndeśācārānitastataḥ

prātarutthāya rāmo'sau kṛtvā saṃdhyāṃ yathāvidhi/ /
sabhāsaṃsthaṃ dadarśendrasamaṃ svapitaraṃ tathā

kathābhiḥ suvicitrābhiḥ sa vasiṣṭhādibhiḥ saha /
sthitvā dinacaturbhāgaṃ jñānagarbhābhirādṛtaḥ

jagāma pitrānujñāto mahatyā senayāvṛtaḥ /
varāhamahiṣākīrṇaṃ vanamākheṭakecchayā

tata āgatya sadane kṛtvā snānādikaṃ kramam /
samitrabāndhavo bhuktvā nināya sasuhṛnniśām

evaṃprāyadinācāro bhrātṛbhyāṃ saha rāghavaḥ /
āgatya tīrthayātrāyāḥ samuvāsa piturgṛhe

nṛpatisaṃvyavahāramanojñayā
sujanacetasi candrikayānayā /
parinināya dināni sa ceṣṭayā
stutasudhārasapeśalayā'nagha

ityārṣe śrīvāsiṣṭhamahārāmāyaṇe vālmīkīye vairāgyaprakaraṇe divasavyavahāranirūpaṇaṃ nāma caturthaḥ sargaḥ