યોગવાસિષ્ઠ · અધ્યાય 1.4

શ્રીવાલ્મીકિરુવાચ ।
રામઃ પુષ્પાઞ્જલિવ્રાતૈર્વિકીર્ણઃ પુરવાસિભિઃ ।
પ્રવિવેશ ગૃહં શ્રીમાઞ્જયન્તો વિષ્ટપં યથા

પ્રણનામાથ પિતરં વસિષ્ઠં ભ્રાતૃબાન્ધવાન્ ।
બ્રાહ્મણાન્કુલવૃદ્ધાંશ્ચ રાઘવઃ પ્રથમાગતઃ

સુહૃદ્ભિર્ભ્રાતૃભિશ્ચૈવ પિત્રા દ્વિજગણેન ચ ।
મુહુરાલિઙ્ગિતાચારો રાઘવો ન મમૌ મુદા ॥।
તસ્મિન્ગૃહે દાશરથેઃ પ્રિયપ્રકથનૈર્મિથઃ ।
જુઘૂર્ણુર્મધુરૈરાશા મૃદુવંશસ્તનૈરિવ ॥

બભૂવાથ દિનાન્યષ્ટૌ રામાગમન ઉત્સવઃ ।
સુખં મત્તજનોન્મુક્તકલકોલાહલાકુલઃ

ઉવાસ સ સુખં ગેહે તતઃ પ્રભૃતિ રાઘવઃ ।
વર્ણયન્વિવિધાકારાન્દેશાચારાનિતસ્તતઃ

પ્રાતરુત્થાય રામોઽસૌ કૃત્વા સંધ્યાં યથાવિધિ। ।
સભાસંસ્થં દદર્શેન્દ્રસમં સ્વપિતરં તથા

કથાભિઃ સુવિચિત્રાભિઃ સ વસિષ્ઠાદિભિઃ સહ ।
સ્થિત્વા દિનચતુર્ભાગં જ્ઞાનગર્ભાભિરાદૃતઃ

જગામ પિત્રાનુજ્ઞાતો મહત્યા સેનયાવૃતઃ ।
વરાહમહિષાકીર્ણં વનમાખેટકેચ્છયા

તત આગત્ય સદને કૃત્વા સ્નાનાદિકં ક્રમમ્ ।
સમિત્રબાન્ધવો ભુક્ત્વા નિનાય સસુહૃન્નિશામ્

એવંપ્રાયદિનાચારો ભ્રાતૃભ્યાં સહ રાઘવઃ ।
આગત્ય તીર્થયાત્રાયાઃ સમુવાસ પિતુર્ગૃહે

નૃપતિસંવ્યવહારમનોજ્ઞયા
સુજનચેતસિ ચન્દ્રિકયાનયા ।
પરિનિનાય દિનાનિ સ ચેષ્ટયા
સ્તુતસુધારસપેશલયાઽનઘ

ઇત્યાર્ષે શ્રીવાસિષ્ઠમહારામાયણે વાલ્મીકીયે વૈરાગ્યપ્રકરણે દિવસવ્યવહારનિરૂપણં નામ ચતુર્થઃ સર્ગઃ