Scripture Library

Yoga Vasistha · Chapter 1.32

1.32.32

dvātriṃśaḥ sargaḥ

1.32.1

śrīvālmīkiruvāca /
vadatyevaṃ manomohavinivṛttikaraṃ vacaḥ /
rāme rājīvapatrākṣe tasminrājakumārake

1.32.2

sarve babhūvustatrasthā vismayotphullalocanāḥ /
bhinnāmbarā deharuhairgiraḥ śrotumivoddhuraiḥ

1.32.3

virāgavāsanāpāstasamastabhavavāsanāḥ /
muhūrtamamṛtāmbhodhivīcīvilulitā iva

1.32.4

tā giro rāmabhadrasya tasya citrārpitairiva /
saṃśrutāḥ śrṛṇukairantarānandapadapīvaraiḥ

1.32.5

vasiṣṭhaviśvāmitrādyairmunibhiḥ saṃsadi sthitaiḥ /
jayantadhṛṣṭipramukhairmantribhirmantrakovidaiḥ

1.32.6

nṛpairdaśarathaprakhyaiḥ pauraiḥ pāraśavādibhiḥ /
sāmantai rājaputraiśca brāhmaṇairbrahmavādibhiḥ

1.32.7

tathā bhṛtyai'ramātyaiśca pañjarasthaiśca pakṣibhiḥ /
krīḍāmṛgairgataspandaisturaṃgaistyaktacarvaṇaiḥ

1.32.8

kausalyāpramukhaiścaiva nijavātāyanasthitaiḥ /
saṃśāntabhūṣaṇārāvairaspandairvanitāgaṇaiḥ

1.32.9

udyānavallīnilayairviṭaṅkanilayairapi /
akṣubdhapakṣatatibhirvihaṅgairviratāravaiḥ

1.32.10

siddhairnabhaścaraiścaiva tathā gandharvakinnaraiḥ /
nāradavyāsapulahapramukhairmunipuṅgavaiḥ

1.32.11

anyaiśca devadeveśavidyādharamahoragaiḥ /
rāmasya tā vicitrārthā mahodārā giraḥ śrutāḥ

1.32.12

atha tūṣṇīṃ sthitavati rāme rājīvalocane /
tasminraghukulākāśaśaśāṅke śaśisundare

1.32.13

sādhuvādagirā sārdhaṃ siddhasārthasamīritā /
vitānakasamā vyomnaḥ pauṣpī vṛṣṭiḥ papāta ha

1.32.14

mandārakośaviśrāntabhramaradvandvanādinī /
madhurāmodasaundaryamuditonmadamānavā

1.32.15

vyomavātavinunneva tārakāṇāṃ paramparā /
patiteva dharāpīṭhe svargastrīhasitacchaṭā

1.32.16

vṛṣyamūkakacanmeghalavāvaliriva cyutā /
haiyaṃgavīnapiṇḍānāmīriteva paramparā

1.32.17

himavṛṣṭirivodārā muktāhāracayopamā /
aindavī raśmimāleva kṣīrormīṇāmivātatiḥ

1.32.18

kiñjalkāmbhojavalitā bhramadbhṛṅgakadambakā /
sītkāragāyadāmodimadhurānilalolitā

1.32.19

prabhramatketakīvyūhā prasphuratkairavotkarā /
prapatatkundavalayā calatkuvalayālayā

1.32.20

āpūritāṅgaṇarasā gṛhācchādanacatvarā /
udgrīvapuravāstavyanaranārīvilokitā

1.32.21

nirabhrotpalasaṃkāśavyomavṛṣṭiranākulā /
adṛṣṭapūrvā sarvasya janasya janitasmayā

1.32.22

adṛśyāmbarasiddhaughakarotkarasamīritā /
sā muhūrtacaturbhāgaṃ puṣpavṛṣṭiḥ papāta ha

1.32.23

āpūritasabhāloke śānte kusumavarṣaṇe /
imaṃ siddhagaṇālāpaṃ śuśruvuste sabhāgatāḥ

1.32.24

ākalpaṃ siddhasenāsu bhramadbhirabhitodivam /
apūrvamidamasmābhiḥ śrutaṃ śrutirasāyanam

1.32.25

yadanena kilodāramuktaṃ raghukulendunā /
vītarāgatayā taddhi vākpaterapyagocaram

1.32.26

aho bata mahatpuṇyamadyāsmābhiridaṃ śrutam /
vaco rāmamukhodbhūtaṃ mahāhlādakaraṃ dhiyaḥ

1.32.27

upaśamāmṛtasundaramādarā
dadhigatottamatāpadameṣa yat /
kathitavānucitaṃ raghunandanaḥ
sapadi tena vayaṃ pratibodhitāḥ

1.32.32

ityārṣe śrīvāsiṣṭhamahārāmāyaṇe vālmīkīye vairāgyaprakaraṇe nabhaścarasādhuvādo nāma dvātriṃśaḥ sargaḥ

Original text: yogavāsiṣṭhaḥ · Sanskrit Wikisource contributors · Sanskrit Wikisource · CC BY-SA 4.0