યોગવાસિષ્ઠ · અધ્યાય 1.32

દ્વાત્રિંશઃ સર્ગઃ

શ્રીવાલ્મીકિરુવાચ ।
વદત્યેવં મનોમોહવિનિવૃત્તિકરં વચઃ ।
રામે રાજીવપત્રાક્ષે તસ્મિન્રાજકુમારકે

સર્વે બભૂવુસ્તત્રસ્થા વિસ્મયોત્ફુલ્લલોચનાઃ ।
ભિન્નામ્બરા દેહરુહૈર્ગિરઃ શ્રોતુમિવોદ્ધુરૈઃ

વિરાગવાસનાપાસ્તસમસ્તભવવાસનાઃ ।
મુહૂર્તમમૃતામ્ભોધિવીચીવિલુલિતા ઇવ

તા ગિરો રામભદ્રસ્ય તસ્ય ચિત્રાર્પિતૈરિવ ।
સંશ્રુતાઃ શ્રૃણુકૈરન્તરાનન્દપદપીવરૈઃ

વસિષ્ઠવિશ્વામિત્રાદ્યૈર્મુનિભિઃ સંસદિ સ્થિતૈઃ ।
જયન્તધૃષ્ટિપ્રમુખૈર્મન્ત્રિભિર્મન્ત્રકોવિદૈઃ

નૃપૈર્દશરથપ્રખ્યૈઃ પૌરૈઃ પારશવાદિભિઃ ।
સામન્તૈ રાજપુત્રૈશ્ચ બ્રાહ્મણૈર્બ્રહ્મવાદિભિઃ

તથા ભૃત્યૈઽરમાત્યૈશ્ચ પઞ્જરસ્થૈશ્ચ પક્ષિભિઃ ।
ક્રીડામૃગૈર્ગતસ્પન્દૈસ્તુરંગૈસ્ત્યક્તચર્વણૈઃ

કૌસલ્યાપ્રમુખૈશ્ચૈવ નિજવાતાયનસ્થિતૈઃ ।
સંશાન્તભૂષણારાવૈરસ્પન્દૈર્વનિતાગણૈઃ

ઉદ્યાનવલ્લીનિલયૈર્વિટઙ્કનિલયૈરપિ ।
અક્ષુબ્ધપક્ષતતિભિર્વિહઙ્ગૈર્વિરતારવૈઃ

સિદ્ધૈર્નભશ્ચરૈશ્ચૈવ તથા ગન્ધર્વકિન્નરૈઃ ।
નારદવ્યાસપુલહપ્રમુખૈર્મુનિપુઙ્ગવૈઃ

અન્યૈશ્ચ દેવદેવેશવિદ્યાધરમહોરગૈઃ ।
રામસ્ય તા વિચિત્રાર્થા મહોદારા ગિરઃ શ્રુતાઃ

અથ તૂષ્ણીં સ્થિતવતિ રામે રાજીવલોચને ।
તસ્મિન્રઘુકુલાકાશશશાઙ્કે શશિસુન્દરે

સાધુવાદગિરા સાર્ધં સિદ્ધસાર્થસમીરિતા ।
વિતાનકસમા વ્યોમ્નઃ પૌષ્પી વૃષ્ટિઃ પપાત હ

મન્દારકોશવિશ્રાન્તભ્રમરદ્વન્દ્વનાદિની ।
મધુરામોદસૌન્દર્યમુદિતોન્મદમાનવા

વ્યોમવાતવિનુન્નેવ તારકાણાં પરમ્પરા ।
પતિતેવ ધરાપીઠે સ્વર્ગસ્ત્રીહસિતચ્છટા

વૃષ્યમૂકકચન્મેઘલવાવલિરિવ ચ્યુતા ।
હૈયંગવીનપિણ્ડાનામીરિતેવ પરમ્પરા

હિમવૃષ્ટિરિવોદારા મુક્તાહારચયોપમા ।
ઐન્દવી રશ્મિમાલેવ ક્ષીરોર્મીણામિવાતતિઃ

કિઞ્જલ્કામ્ભોજવલિતા ભ્રમદ્ભૃઙ્ગકદમ્બકા ।
સીત્કારગાયદામોદિમધુરાનિલલોલિતા

પ્રભ્રમત્કેતકીવ્યૂહા પ્રસ્ફુરત્કૈરવોત્કરા ।
પ્રપતત્કુન્દવલયા ચલત્કુવલયાલયા

આપૂરિતાઙ્ગણરસા ગૃહાચ્છાદનચત્વરા ।
ઉદ્ગ્રીવપુરવાસ્તવ્યનરનારીવિલોકિતા

નિરભ્રોત્પલસંકાશવ્યોમવૃષ્ટિરનાકુલા ।
અદૃષ્ટપૂર્વા સર્વસ્ય જનસ્ય જનિતસ્મયા

અદૃશ્યામ્બરસિદ્ધૌઘકરોત્કરસમીરિતા ।
સા મુહૂર્તચતુર્ભાગં પુષ્પવૃષ્ટિઃ પપાત હ

આપૂરિતસભાલોકે શાન્તે કુસુમવર્ષણે ।
ઇમં સિદ્ધગણાલાપં શુશ્રુવુસ્તે સભાગતાઃ

આકલ્પં સિદ્ધસેનાસુ ભ્રમદ્ભિરભિતોદિવમ્ ।
અપૂર્વમિદમસ્માભિઃ શ્રુતં શ્રુતિરસાયનમ્

યદનેન કિલોદારમુક્તં રઘુકુલેન્દુના ।
વીતરાગતયા તદ્ધિ વાક્પતેરપ્યગોચરમ્

અહો બત મહત્પુણ્યમદ્યાસ્માભિરિદં શ્રુતમ્ ।
વચો રામમુખોદ્ભૂતં મહાહ્લાદકરં ધિયઃ

ઉપશમામૃતસુન્દરમાદરા
દધિગતોત્તમતાપદમેષ યત્ ।
કથિતવાનુચિતં રઘુનન્દનઃ
સપદિ તેન વયં પ્રતિબોધિતાઃ

ઇત્યાર્ષે શ્રીવાસિષ્ઠમહારામાયણે વાલ્મીકીયે વૈરાગ્યપ્રકરણે નભશ્ચરસાધુવાદો નામ દ્વાત્રિંશઃ સર્ગઃ