Yoga Vasistha · Chapter 1.18

aṣṭādaśaḥ sargaḥ

śrīrāma uvāca /
ārdrāntratantrīgahano vikārī paripātavān /
dehaḥ sphurati saṃsāre so'pi duḥkhāya kevalam

ajño'pi tajjñasadṛśo valitātmacamatkṛtiḥ /
yuktyā bhavyo'pyabhavyo'pi na jaḍo nāpi cetanaḥ

jaḍājaḍadṛśormadhye dolāyitadurāśayaḥ /
avivekī vimūḍhātmā mohameva prayacchati

stokenānandamāyāti stokenāyāti kheditām /
nāsti dehasamaḥ śocyo nīco guṇabahiṣkṛtaḥ

āgamāpāyinā nityaṃ dantakesaraśālinā /
vikāsasmitapuṣpeṇa pratikṣaṇamalaṃkṛtaḥ

bhujaśākho ghanaskandho dvijastambhaśubhasthitiḥ /
locanālivilākrāntaḥ śiraḥpīṭhabṛhatphalaḥ

śravadantarasagrasto hastapādasupallavaḥ /
gulmavānkāryasaṃghāto vihaṅgamakṛtāspadaḥ

sacchāyo dehavṛkṣo'yaṃ jīvapānthagaṇāspadaḥ /
kasyātmīyaḥ kasya para āsthānāsthe kilātra ke

tāta saṃtaraṇārthena gṛhītāyāṃ punaḥpunaḥ /
nāvi dehalatāyāṃ ca kasya syādātmabhāvanā

dehanāmni vane śūnye bahugartasamākule /
tanūruhāsaṃkhyatarau viśvāsaṃ ko'dhigacchati

māṃsasnāyvasthivalite śarīrapaṭahe'dṛḍhe /
mārjāravadahaṃ tāta tiṣṭhāmyatra gatadhvanau

saṃsārāraṇyasaṃrūḍho vilasaccittamarkaṭaḥ /
cintāmañjaritākāro dīrghaduḥkhaghuṇakṣataḥ

tṛṣṇābhujaṅgamīgehaṃ kopa kāka kṛtālayaḥ /
smitapuṇyodgamaḥ śrīmāñchubhāśubhamahāphalaḥ

suskandhoghalatājālo hastastabakasundaraḥ /
pavanaspanditāśeṣasvāṅgāvayavapallavaḥ

sarvendriyakhagādhāraḥ sujānustambha unnataḥ /
sarasacchāyayā yuktaḥ kāmapānthaniṣevitaḥ

mūrdhasaṃjanitā''dīrghaśiroruhatṛṇāvaliḥ /
ahaṃkāragṛdhrakṛtakulāyaḥ suṣirodaraḥ

vicchinnavāsanājālamūlatvāddurlavākṛtiḥ /
vyāyāmavirasaḥ kāyaplakṣo'yaṃ na sukhāya me

kalevaramahaṃkāragṛhasthasya mahāgṛham /
luṭhatvabhyetu vā sthairyaṃ kimanena mune mama

paṅktibaddhendriyapaśuṃ valattṛṣṇāgṛhāṅganam /
rāgarañjitasarvāṅgaṃ neṣṭaṃ dehagṛhaṃ mama

pṛṣṭhāsthikāṣṭhasaṃghaṭṭaparisaṃkaṭakoṭaram /
āntrarajjubhirābaddhaṃ neṣṭaṃ dehagṛhaṃ mama

prasṛtasnāyutantrīkaṃ raktāmbukṛtakardamam /
jarāmaṅkoladhavalaṃ neṣṭaṃ dehagṛhaṃ mama

cittabhṛtyakṛtānantaceṣṭāvaṣṭabdhasaṃsthiti /
mithyāmohamahāsthūṇaṃ neṣṭaṃ dehagṛhaṃ mama

duḥkhārbhakakṛtākrandaṃ sukhaśayyāmanoramam /
durīhādagdhadāsīkaṃ neṣṭaṃ dehagṛhaṃ mama

malāḍhyaviṣayavyūhabhāṇḍopaskarasaṃkaṭam /
ajñānakṣāravalitaṃ neṣṭaṃ dehagṛhaṃ mama

gulphagugguluviśrāntajānūrdhvastambhamastakam /
dīrghadordārusudṛḍhaṃ neṣṭaṃ dehagṛhaṃ mama

prakaṭākṣagavākṣāntaḥ krīḍatprajñāgṛhāṅganam /
cintāduhitṛkaṃ brahmanneṣṭaṃ dehagṛhaṃ mama

mūrdhajācchādanacchannakarṇaśrīcandraśālikam /
ādīrghāṅgulinirvyūhaṃ neṣṭaṃ dehagṛhaṃ mama

sarvāṅgakuḍyasaṃghātaghanaromayavāṅkuram /
saṃśūnyapeṭavivaraṃ neṣṭaṃ dehagṛhaṃ mama

nakhorṇanābhinilayaṃ saramāraṇitāntaram /
bhāṅkārakāripavanaṃ neṣṭaṃ dehagṛhaṃ mama

praveśanirgamavyagravātavegamanāratam /
vitatākṣagavākṣaṃ tanneṣṭaṃ dehagṛhaṃ mama

jihvāmarkaṭikākrāntavadanadvārabhīṣaṇam /
dṛṣṭadantāsthiśakalaṃ neṣṭaṃ dehagṛha mama

tvaksudhālepamasṛṇaṃ yantrasaṃcāracañcalam /
manaḥ sadākhunotkhātaṃ neṣṭaṃ dehagṛhaṃ mama // ३२ ākhu
smitadīpaprabhodbhāsi kṣaṇamānandasundaram /
kṣaṇaṃ vyāptaṃ tamaḥpūrairneṣṭaṃ dehagṛhaṃ mama

samastarogāyatanaṃ valīpalitapattanam /
sarvādhisāragahanaṃ neṣṭaṃ dehagṛhaṃ mama

akṣarkṣakṣobhaviṣamā śūnyā niḥsārakoṭarā /
tamogahanadikkuñjā neṣṭā dehāṭavī mama

dehālayaṃ dhārayituṃ na śaknomi munīśvara /
paṅkamagnaṃ samuddhartuṃ gajamalpabalo yathā

kiṃ śriyā kiṃ ca rājyena kiṃ kāyena kimīhitaiḥ /
dinaiḥ katipayaireva kālaḥ sarvaṃ nikṛntati

raktamāṃsamayasyāsya sabāhyābhyantaraṃ mune /
nāśaikadharmiṇo brūhi kaiva kāyasya ramyatā

maraṇāvasare kāyā jīvaṃ nānusaranti ye /
teṣu tāta kṛtaghneṣu kaivāsthā vada dhīmatām

mattebhakarṇāgracalaḥ kāyo lambāmbubhaṅguraḥ /
na saṃtyajati māṃ yāvattāvadenaṃ tyajāmyaham

pavanaspandataralaḥ pelavaḥ kāyapallavaḥ /
jarjarastanuvṛttaśca neṣṭo me kaṭunīrasaḥ

bhuktvā pītvā ciraṃ kālaṃ bālapallavapelavām /
tanutāmetya yatnena vināśamanudhāvati

tānyeva sukhaduḥkhāni bhāvābhāvamayānyasau /
bhūyo'pyanubhavankāyaḥ prākṛto hi na lajjate

suciraṃ prabhutāṃ kṛtvā saṃsevya vibhavaśriyam /
nocchrāyameti na sthairyaṃ kāyaḥ kimiti pālyate

jarākāle jarāmeti mṛtyukāle tathā mṛtim /
sama evāviśeṣajñaḥ kāyo bhogidaridrayoḥ

saṃsārāmbhodhijaṭhare tṛṣṇākuharakāntare /
suptastiṣṭhati mukteho mūko'yaṃ kāyakacchapaḥ

dahanaikārthayogyāni kāyakāṣṭhāni bhūriśaḥ /
saṃsārābdhāvihohyante kaṃcitteṣu naraṃ viduḥ

dīrghadaurātmyavalayā nipātaphalapātayā /
na dehalatayā kāryaṃ kiṃcidasti vivekinaḥ

majjankardamakośeṣu jhaṭityeva jarāṃ gataḥ /
na jñāyate yātyacirātkaḥ kathaṃ dehadarduraḥ

niḥsārasakalārambhāḥ kāyāścapalavāyavaḥ /
rajomārgeṇa gacchanto dṛśyante neha kenacit

vāyordīpasya manaso gacchato jñāyate gatiḥ /
āgacchataśca bhagavañcharīrasya kadācana

baddhāsthā ye śarīreṣu baddhāsthā ye jagatsthitau /
tānmohamadironmattāndhigdhigastu punaḥpunaḥ

nāhaṃ dehasya no deho mama nāyamahaṃ tathā /
iti viśrāntacittā ye te mune puruṣottamāḥ

mānāvamānabahulā bahulābhamanoramāḥ /
śarīramātrabaddhāsthaṃ ghnanti doṣadṛśo naram

śarīraśvabhraśāyinyā piśācyā peśalāṅgayā /
ahaṃkāracamatkṛtyā chalena chalitā vayam

prajñā varākā sarvaiva kāyabaddhāsthayānayā /
mithyājñānakurākṣasyā chalitā kaṣṭamekikā

na kiṃcidapi dṛśye'sminsatyaṃ tena hatātmanā /
citraṃ dagdhaśarīreṇa janatā vipralabhyate

dinaiḥ katipayaireva nirjharāmbukaṇo yathā /
patatyayamayatnena jaraṭhaḥ kāyapallavaḥ

kāyo'yamacirāpāyo budbudo'mbunidhāviva /
vyarthaṃ kāryaparāvarte parisphurati niṣphalaḥ

mithyājñānavikāre'sminsvapnasaṃbhramapattane /
kāye sphuṭatarāpāye kṣaṇamāsthā na me dvija

taḍitsu śaradabhreṣu gandharvanagareṣu ca /
sthairyaṃ yena vinirṇītaṃ sa viśvasitu vigrahe

satatabhaṅgurakāryaparamparā
vijayijātajayaṃ haṭhavṛttiṣu /
prabaladoṣamidaṃ tu kalevaraṃ
tṛṇamivāhamapohya sukhaṃ sthitaḥ

ityārṣe śrīvāsiṣṭhamahārāmāyaṇe vālmīkīye vairāgyaprakaraṇe kāyajugupsānāmāṣṭādaśaḥ sargaḥ