Viṣvaksenasaṃhitā · Chapter 3

iti śrīpāñcarātre viṣvaksenasaṃhitāyāṃ maṇḍapādilakṣaṇavidhirnāma dvitīyo 'dhyāyaḥ
tṛtīyo 'dhyāyaḥ
tṛtīyo 'dhyāyaḥ viṣvaksenaḥ---
athātaḥ saṃpravakṣyāmi dārusaṃgrahaṇaṃ param /
brāhmaṇān bhojayitvā tu ācāryaḥśuddhamānasaḥ

ācāryaḥsamalaṃkṛtya navavastrāṅgulīyakaiḥ /
yajamānaḥ śacīnātha śuddhāntaḥkaraṇaḥśuciḥ

śilpinaṃ pūjayitvā tu gandhapuṣpāmbarādibhiḥ /
vaiṣṇavān samalaṃkṛtya bhojanācchādanādibhiḥ

kuṭhārādīni saṃgṛhya vaiṣṇavaiḥsaha mantravit /
śucirnavāmbaradharaḥ sottaryo(?)ṣṇīṣavān kramāt

nirgacchedvṛkṣamāsādya śilpibhiḥsaha sādhakaḥ /
aṣṭākṣaraṃ mahāmantraṃ japtvā cāṣṭottaraṃ śatam

kuśahastaḥ praṇamyātha dāruṃ paśyet samāhitaḥ /
śucau tale vivikte tu keśāṅgāravivarjite

sthāpitaṃ vṛkṣamudvīkṣya taṃ praṇamya hariṃ smaran /
tadvṛkṣaṃ manasā gṛhya kaṇṭakaṃ parivarjayet

kārtikyādyaṣṭamāseṣu dārusaṃgrahamuttamam /
uktakāle mahāprājño nirīkṣya śubhavṛkṣakam

kaṇṭakāt khadiraṃ grāhyamasāraṃ parivarjayet /
vṛkṣānukramaṇaṃ vakṣye saṃkṣepāt sāramuttamam

khadiro devadāruśca badarī candanadvayam /
śiṃśupā rājavṛkṣaśca bilvayūpavanastathā

madhuko lohitaścaiva svandanasvandakastathā /
tumbakaṃ caiva śāmalyaṃ śālavṛkṣastathaiva ca

asano vakulaścaiva śirīṣāmalakastathā /
sarve ca yājñikā vṛkṣāḥ pratimārthamudāhṛtāḥ

sāravantaśca ye cānye kṛmikīṭavivarjitāḥ /
dagdho 'gninā svayaṃ śuṣkaḥ patitaśca svayaṃ tathā

tathā cāśaninār dadhaḥ sphuṭito bhinna eva ca /
dakṣiṇapravaṇaścaiva varjitā anyadeśajāḥ

saṃkalpya pratimāmekāṃ śilāyāṃ vṛkṣa eva vā /
krameṇa parigṛhṇīyāt kartavyaikaivamatra tu

nānyatra pratimāṃ kuryāt kriyā bhavati niṣphalā /
śilādārvostu vakṣyāmi adhivāsabalikramam

tasyādhastāddharāṃ paścādāśāyāṃ maṇḍalaṃ kuru /
saṃprokṣya gandhatoyena viṣṇugāyatriyā budhaḥ

tadvṛkṣamūle mantrajño parigṛhya navāmbaram /
ācāryaśca caturdikṣu patākāstatra lambayet

tatra viṣṇuṃ samāvāhya ravimadhyagataṃ harim /
sūktena puruṣeṇaiva pūjayet puruṣottamam

śilāgrahaṇadeśe 'pi gomayenānulepayet /
pūrvavat samalaṃkṛtya chādayennavavastrakaiḥ

atra pūrvoktamārgeṇa pūjayeddharimavyayam /
tatpūrvabhāge tantrajñaḥ sāyāhne cādhivāsayet

caturdikṣu mahādīpaṃ prajvālyākṣatadhūpakaiḥ /
alaṃkṛtya janān sarvānūrdhvapuṇḍradharonmukhān

ācāryaḥ kumbhamādāya nirdeṣaṃ sūtraveṣṭitam /
aśvatthapallavairyuktaṃ saratnaṃ toyasaṃyutam

vastrayugmena saṃveṣṭya dhānyarāśau vinikṣipet /
tasmin brahmāṇamabhyarcya parito 'ṣṭaghaṭān nyaset

sāpidhānān savastrāṃśca dhānyarāśau pṛthaṅnyaset /
indrādīśānaparyantaṃ dikpatīnarcayet kramāt

pūrvādisomaparyantaṃ homakarma samācaret /
vāsudevādimūrtīnāṃ svanāmnā ca pṛthakpṛtham

samidājyacarūṃścaiva aṣṭāttaraśataṃ kramāt /
juhuyādvahnijihvāyāṃ vāsudevādividyayā

pūrṇāhutiṃ tato hutvā śeṣamasminna vidyate /
uttare 'sminmahāmantre(tantre?)vaiṣṇavīkaraṇaṃ kramāt

saṃproktaṃ nāradasyaiva tadvadutpādayediha /
utpādya vaiṣṇavāgniṃ tu tadagnau homamācaret

athavā pūrvabhāge tu caturmūrtimanusmaran /
kārayeddhomakarmāṇi pūrvāgnau pūrvavat kramāt

parito balidānaṃ tu bhūtakrūrabaliṃ kṣipet /
pāyasānnaṃ guḍopetaṃ saghaṇṭāsvarasūkṣmayuk

puṇyāhaṃ vācayitvā tu ādāvante tu ca kramāt /
kuṭhāraṃ navavastrādyairalaṃkṛtyādhivāsayet

droṇataṇḍulamadhye tu padmaṣṭadalaṃ likhet /
tanmadhye śāyayedastramantreṇāṣṭākṣareṇa vā

navavastreṇa saṃchādya sādhako mantravittamaḥ /
gandhapuṣpādinābhyarcya mantreṇāstreṇa mantravit

ācāryaḥ susthito bhūtvā imaṃ mantramudīrayet /
oṃ namaḥ sarvalokāya viṣṇave prabhaviṣṇave

viśvāya viśvarūpāya svapnādhipataye namaḥ /
rakṣaḥ piśācā nāgāśca ye 'tra tiṣṭhanti nityaśaḥ

vyapagacchantu te sarve sannidhattāṃ sadā hariḥ /
hatyuktvā svapnamākāṅkṣan paścime śāyayenniśi

śubhāśubhaṃ nirīkṣyātra svapnādhyāye prakīrtitam /
adarśane 'pi gṛhṇīyāt viparīte nivartayet

ācāryaḥ prātarutthāya vidhivat snānamācaret /
vṛkṣamūle śilāyāṃ vā kumbhamādāya mantravit

abhiṣicyāstramantreṇa sudarśanamanuttamam /
sahasrāreti saṃkīrtya huṃkāraṃ tadanantaram

phaṭkārāntaṃ mahāhetiṃ sudarśanamakhaṇḍitam /
astrarājasya mantro 'yaṃ śrīkīrtijayadaṃ param

abhiṣicya trirācamya paridhāya(pya?) navāmbaraiḥ /
arcayedgandhapuṣpādyaiḥ sāntvanaṃ tu samācaret

vṛkṣa lokasya śāntyarthaṃ gaccha devālayaṃ śubham /
devatvaṃ yāsyate tatra dāhacchedavivarjitaḥ

jalapuṣpapradānena sudhūpairbalibhistathā /
lokāstvāṃ pūjayiṣyanti tato yāsyasi nirvṛtim

evaṃ tu sāntvanaṃ kṛtvā vṛkṣamūlasthito mukhaḥ(?) /
śilāyāmapi kartavyaṃ sāntvanaṃ tu śacīpate

śilānāma samuccārya sāntvanaṃ tu śilā bhavet (?) /
kuṭhāraṃ tu namaskṛtya mantreṇāstreṇa sādhakaḥ

taṃ samādāya hastābhyāṃ vṛkṣaṃ chidya(tvā?)punaḥ punaḥ /
evaṃ dārumayaṃ gṛhya vane vanacaraiḥ saha

śaṅkhatūryādinādaistu paṭahaistālanisvanaiḥ /
geyanṛttasamāyuktamālayaṃ tu vrajet kramāt

yadā dārumayaṃ gṛhya tadā prabhṛti nityaśaḥ /
pratimāṃ kārayettatra tatkarmāntaṃ haviṣyabhuk

karmāntaraṃ na kurvīta yajamānaḥsamāhitaḥ /
śilpācāryasya vaṃśyaśca śāstraprāmāṇyakovidaḥ

sārāsāraṃ parīkṣyātra śilpinā kuśalena tu /
tasyābhāve śacīnātha dārusaṃgrahaṇaṃ śṛṇu

brāhmaṇaḥ kṣatriyo vāpi vaiśyo vā śūdra eva vā /
tān samānīya mantrajño mūlavidyāḥ pradāpayet

taṃ gṛhītvā racīnātha vṛkṣārthaṃ tu vrajedvane /
vaiṣṇavān bhagavadbhaktān balinaḥ karmatatparān

nirgacchedvanamāsādya chitvā vṛkṣaṃ hariṃ smaran /
tadvṛkṣaṃ śirasi sthāpya smarannārāyaṇaṃ prabhum

tato yāgagṛhaṃ gacchecchaṅkhatūryādibhiḥ saha /
mūlālayasya pūrve tu pūrṇakumbhaṃ nidhāpayet

aśvatthapallavairyuktaṃ sāpidhānaṃ savastrakam /
satoyaṃ ratnasaṃyuktaṃ sthāpayeddhānyarāśiṣu

tatkumbhe cānayenmantrān mūlamantrādikān kramāt /
nārāyaṇopaniṣadaṃ sṛṣṭyādipratipādikām

tathā puraṣasūktaṃ tu japedvai vaiṣṇavaiḥ saha /
kumbhāntaragatāṃbhaḥsu viṣṇuṃ sakalamavyayam

dhyātvā gandhādinābhyarcya sūktena puruṣeṇa ca /
kumbhasya pūrvabhāge tu gomayenānulepayet

droṇadvayaṃ tadardhaṃ vā vikirettaṇḍulān kramāt /
tanmadhye 'ṣṭadalaṃ padmaṃ likhyānāmikayāpi ca

aṣṭākṣaraṃ mahāmantraṃ karṇikādiṣu yojayet /
tatra madhye tu kuṃbhasya saṃprokṣyāstreṇa mantrataḥ

prokṣayenmūlamantreṇa kambūdarajalaiḥ punaḥ /
punaḥ punastridhā prokṣya viṣṇurūpamanusmaran

pañcopaniṣadairmantraiḥ punaḥ prokṣya samāhitaḥ /
saṃprokṣya mūlamantrābhyāṃ kumbhātoyena sādhakaḥ

pūrvādhivāsitairmantraiḥ snāpayeddārumuttamam /
sudhūpagandhapuṣpādyairarcayet pūrvavat kramāt

navavastreṇa saṃchādya parito balimācaret /
sudarśanena mantreṇa pūrvādikramayogataḥ

haviṣā balidānaṃ tu sarvaśāntyarthameva ca /
tadbaliṃ śubhadaṃ ṛddhiṃ(viddhi?)sarvavighnanivāraṇam

tasmātsarvaprayatnena balimasmin samācaret /
prabhātāyāṃ tu śarvaryāmālayaṃ tu paribhramet

śaṅkhatūryādisaṃyuktaṃ gṛhītvā vṛkṣamuttamam /
vaiṣṇavaiḥsaha śiṣyaistu ācāryo mantravittamaḥ

garbhagehe tu saṃsthāpya kavāṭaṃ bandhayet punaḥ /
trirātraṃ pañcarātraṃ vā saptarātramathāpi vā

navarātraṃ tu vā cāsmin kavāṭaṃ na vimocayet /
aṅkurārpaṇamārabhya tadrātrau tu śacīpate

ālayeśānabhāge tu dakṣiṇe cottare 'tha vā /
maṇḍapaṃ vātha kūṭaṃ vā prapāṃ vākalpya sādhakaḥ

vitānavastrasaṃchannamalaṃkārairalaṃkṛtam /
muktādāmasamāyuktaṃ puṣpamālyairalaṃkṛtam

pālikā cāṅkuro(ṅkurako?)petamaṣṭadigdīpasaṃyutam /
nālikerulairyuktaṃ cāmarairupaśobhitam

evaṃ lakṣaṇasaṃyuktaṃ maṇḍapaṃ cānayettarum /
aparāhṇe śacīnātha vaiṣṇavaiḥsaha mantravit

śaṅkhatūryādisaṃyuktaṃ nṛttageyasamanvitam /
garbhagehaṃ samāsādya kavāṭaṃ pravimocayet

dārumabhyarcya gandhādyaiḥ mūlamantramanusmaran /
saṃprokṣya gandhatoyena puṇyāhaṃ kārayet sudhīḥ

maṇḍape madhyabhāge tu khānayevadavaṭaṃ kramāt /
dvihastaṃ vā tadardhaṃ vā tasyārdhaṃ vā śacīpate

pradhānatarumādāya mantreṇāstreṇa sādhakaḥ /
sthāpayenmūlamantreṇa dakṣiṇe tu śriyaṃ nyaset

uttare tu nyaset puṣṭiṃ tattanmūlaṃ yathākramam /
saṃvatsarasahasrāyurgataṃ smṛtya taruṃ param

tanmūle salilaṃ nyasya puṇḍarīkākṣavidyayā /
tattanmūlena vā paścājjaladānaṃ yathāruci

sitapuṣpaiḥ samārādhya tasmātsakalamavyayam /
mantrahīnaṃ kriyāhīnaṃ sarvaṃ vai kṣantumarhasi

evamuktvā namaskṛtya dārumūlaṃ tu mantravit /
evaṃ kṛtvā tato dārusaṃgrahaṃ punarārabhet

adhivāsādisarvāṇi cāsmin pūrvavadācaret /
śilpinaṃ pūjayitvā tu dāruṃ chidya (tvā?) panuḥ punaḥ

tenaiva (taireva?) vaiṣṇavairyukto mūlamūrtimanusmaran /
anyathā phalamāpnoti grāmanāśo dhanakṣayaḥ

sthānanāśo bhavettatra saṃbhavennātra saṃśayaḥ /
evaṃ dārumayaṃ gṛhya punaḥsaṃskāravat kramāt

śilpaśāstrānusāreṇa kārayenmūlamuttamam /
ācāryaṃ pūjayet paścāt hemavastrāṅgulīyakaiḥ