Viṣvaksenasaṃhitā · Chapter 2

iti śrīpāñcarātre viṣvaksenasaṃhitāyāṃ bhūparīkṣāvidhirnāma prathamo 'dhyāyaḥ ||
dvitīyo 'dhyāyaḥ
dvitīyo 'dhyāyaḥ viṣvaksenaḥ---
athātaḥsaṃpravakṣyāmi maṇḍapādikriyāṃ kramāta /
maṇḍapaścaiva kuṇḍāni sruksruvaṃ(vau?)cāṣṭamaṅgalam

toraṇaṃ caiva tannāma teṣāṃ pūjāvidhiṃ kramāt /
dvārapālapatākāśca teṣāṃ nyāsavidhiṃ kramāt

śacīpate viviktena guhyādguhyavidhiṃ kramāt /
maṇḍapaṃ pūrvadigbhāge puṣṭiśrīvardhanaṃ bhavet

sarvavighnopaśamanaṃ yāmye caiva yaśaskaram /
jayadaṃ vāruṇe bhāge dhanadaṃ cottare diśi

āgneye naiṛte vāpi vāyavyaiśā(śe?)śacīpate /
kalpayenmaṇḍapaṃ caivaṃ pūrvapūrvā garīyasī

yajamānecchayā kuryāt anyadeśe na kārayet /
maṇḍapaṃ trividhaṃ proktaṃ hīnaṃ madhyamamuttamam

hīne hīnaṃ tu kartavyaṃ madhyame madhyamaṃ punaḥ /
uttame cottamaṃ caiva maṇḍapaṃ vidhinā punaḥ

pañcottaradaśaṃ(?)vāpi daśahastamathāpi vā /
ṣoḍaśastaṃbhasaṃyuktaṃ maṇḍapaṃ kārayet kramāt

adhamaṃ tadvijānīyāt madhyamaṃ śṛṇu suvrata /
ṣoḍaśaṃ dvādaśaṃ(?)vāpi madhyamaṃ maṇḍapaṃ viduḥ

caturviṃśatihastācca viṃśaddhastāntameva vā /
uttamaṃ tadvijñānīyāt sūtrapātavidhiṃ śṛṇu

prāsādamaṇḍapādvāpi prākārāt pīṭhato 'pi vā /
ekahastaṃ dvihastaṃ vā trihastaṃ vā śacīpate

visṛjya deśikaḥ kuryāt pratiṣṭhāmaṇḍapaṃ śubham /
sarvalakṣaṇasaṃyuktaṃ ācāryecchānurūpataḥ

pātayedbrahmasūtraṃ tu yāvanmaṇḍapagocaram /
tribhāgīkṛtya sūtreṇa rekhāścatvāri(?)kārayet

pūrvapaścimataścaiva tathā vai dakṣiṇottaram /
trikūṭaṃ kārayitvā tu bhāgaṃ tatra tu kārayet

koṇeṣu caiva sarveṣu koṇastaṃbhān prakalpayet /
sūtrasandhiṣu sarveṣu stambhānanyān prakalpayet

maṇḍapāṅgāni sarvāṇi cānyāni tu śacīpate /
yuktyā yuktiviśeṣeṇa kārayettu yathāvidhi

caturdvārasamāyuktaṃ vitānādyairvibhūṣitam /
evaṃ tu maṇḍapaṃ kṛtvā saptāhātpūrvameva tu

maṇḍapasyānurūpeṇa madhye vediṃ tu kārayet /
āmeṣṭakābhiḥ pakvābhiḥ vedikāṃ kārayet kramāt

uttame 'pyuttamāṃ kuryānmadhyame madhyamāṃ kuru /
adhame 'pyadhamāṃ kṛtvā tanmāne puṭamānataḥ(?)

dvitākocchrāyasaṃyuktāṃ darpaṇodarasaṃnibhām /
vedikāṃ kramaśaḥ kṛtvā kuṇḍāni parikalpayet

tritālaṃ vedikāyāṃ tu dūrībhūtāni sarvaśaḥ /
catustālaṃ dvitālaṃ vā visṛjya paritaḥ kramāt

(tritālaṃ vedikāyāstu visṛjya paritaḥ kramāt /
catustālaṃ dvitālaṃ vā dūrībhūtāni savarśaḥ?) // Vis_2.21* //
kārayedvahnikuṇḍāni turyāśrādīni sādhakaḥ /
prākpūrvaṃ..................pratyaksaṃsthitamantataḥ

tasyāmāsphālayet paścādāyataṃ dakṣiṇottaram /
ekahastaṃ dvihastaṃ vā jñātvā mānaṃ tu lāñchayet

dvābhyāṃ dvābhyāmathaikaikaṃ lāñchayet koṇamatsyakam /
diksūtrāṇi kramātteṣu prasāryāsphālya yatnataḥ

caturaśrīkṛtaṃ kṣetraṃ catuṣkoṇasamaṃ śubham /
caturabhyadhikaṃ viṃśadaṅgulaṃ caturaśrakam

sūtreṇa sūtrayitvā tu kṣetraṃ tāvat khanet kṣitim /
tasyārdhaṃ vā khanitvā tu śilpinā kuśalena tu

kārayeccaturaśrādikuṇḍāni vidhivat kramāt /
tālamānena sarvatra kuṇḍāni paritaḥ kramāt

kārayeccaturaśrādi vistārāyāmatādṛśam (taḥ samam?) /
sūtreṇa sūtrayitvā tu kṣetraṃ tāvat khanet kṣitima

khātasya mekhalāḥ kāryāḥtyaktvā caivāṅgulidvayam /
prathamā sātvikī proktā dvitīyā rājasī matā

tṛtīyā tāmasī pūrvā dvādaśāṅgulamucchritā /
aṣṭāṅgulā dvitīyā tu tṛtīyā caturaṅgulā

caturaṅgulavistārāḥ sarvāḥ kāryāstu santatam /
yonirdaśāṅgulā ramyā ṣaṭcatudvaryaṅgulāgrakā

yoniryonirivā(samā?)kārā gajoṣṭhasadṛśāpi(śī tu?)vā /
kramānnimnā tu kartavyā caturaṅgulamāyatā

mūlaṃ tu tryaṅgulaṃ jñeyamagraṃ tasya ṣaḍaṅgulam /
ekahastādi(stasya?)kuṇḍasya lakṣaṇaṃ kathitaṃ tvidam

dvihaste dviguṇaṃ proktaṃ nābhiścaiva tu mekhalā /
ekamekhalakaṃ vāpi kuṇḍaṃ saṃkṣepakarmaṇi

kuṇḍārdhaṃ koṇabhāgārdhaṃ diśi cottarato bahiḥ /
pūrvapaścimato yatnāt lāñchayitvā tu madhyataḥ

sarvato bhrāmitaṃ kuṇḍamardhacandraṃ bhavet sphuṭam /
tatkuṇḍaṃ sarvasiddhyarthaṃ sarvasaṃpadvivardhanam

sarvavighnopaśamanaṃ dakṣiṇe kārayeda budhaḥ /
kuṇḍādyevaṃ(dyava?)sthitaṃ sūtraṃ koṇe yadatiricyate

tadarthaṃ diśi saṃsthāpya bhrāmitaṃ vartulaṃ bhavet /
vṛttaṃ tu paramaṃ jñeyaṃ sarvaduḥkhanivāraṇam

anāvṛṣṭibhayaṃ nāsti ativṛṣṭibhayaṃ tathā /
padmākāraṃ tu sarvatra mekhalāyāṃ tu vartulam

pratyekaikaṃ śacīnātha mekhalopari sādhakaḥ /
dvādaśaṃ vā dalaṃ likhya cāṣṭapatraṃ sakarṇikam

tatkuṇḍaṃ padmamityuktaṃ sarvaśāstraviśāradaiḥ /
brahmavṛddhikaraṃ jñeyaṃ yajñasvādhyāyavṛddhidam

tathaiva caturaśraṃ tu iti śāstrasya niścayaḥ /
trikoṇaṃ vābjakuṇḍaṃ vā sādhakecchānurūpataḥ

some tu kārayeddhīmān sarvavighnopanāśanam /
pañcatriṃśāṅgulaṃ vāpi dvādaśāṅgulameva vā

saṃgṛhyācāryataḥsūtraṃ prasāryāsphālya yatnataḥ /
naiṛte hyanile caiva lāñchayet koṇamatsyakam

tathaiva lāñchayedaindre tattrikoṇaṃ bhavecchubham /
kārayedavaṭaṃ dhīmān śilpinā kuśalena tu

tattudrūpeṇa kuṇḍeṣu mekhalāṃ paritaḥ kramāt /
kārayettu śacīnātha sādhakaḥ paramārthavit

etattrikoṇamuddiṣṭaṃ śeṣaṃ sādhāraṇaṃ bhavet /
kuṇḍapaṅktiḥ samākhyātā prakṛtistriguṇātmikā

sā yoniḥ sarvabhūtānāṃ siddhyarthaṃ tu śacīpate /
vidyāmantragaṇānāṃ tu vimukteścaiva kāraṇam

prācyāṃ śiraḥsamākhyātaṃ bāhū koṇe vyavasthitau /
aiśānyāgneyasaṃjñe tu yaṅghā vāyavyanaiṛte

udaraṃ kuṇḍamityuktaṃ yoniryonirvidhīyate /
mekhalātritayaṃ caiva guṇatrayamudāhṛtam

evaṃ saṃkṣepataḥ proktaṃ kuṇḍānāṃ lakṣaṇaṃ kramāt /
sruksruvau maṅgalāṃścaiva (lānyaṣṭau?)toraṇāni tathaiva ca

pravakṣyāmyadhunā caiva teṣāṃ lakṣaṇamucyate /
aśvatthakhadirādyairvā caturviṃśadbhi (?)raṅgulaiḥ

pratiṣṭhādyutsave caiva homārthaṃ kārayet sruvam (cam?) /
saptapañcāṅgulaṃ vāpi vistāraṃ caturaśrakam

tribhāgena bhavedgartaṃ madhye vṛttaṃ suśobhanam /
tiryagūrdhvaṃ samaṃ vāpi tadardhaṃ vā khanet sruvam (cam?)

aṅgulasya caturthāṃśaṃ vyapohyānte 'vaṭasya tu /
tasyānte mekhalāṃ samyak gartaṃ vai paritaḥ kramāt

kārayenmekhalāmekāmutsedhaṃ tu tathaiva ca /
mekhalāyāstu paritaḥ likhedabjadalākṛtim

dvādaśāṣṭadalaṃ vāpi kārayenmekhalādhare /
karṇikāṃ gartamadhye tu likhecchilpapramāṇataḥ

dalānte valayaṃ kuryāt caturaśraṃ samantataḥ /
tadaṅgulārdhavistāraṃ kalābinduvibhūṣitam

sarvālaṃkārasaṃyuktaṃ dvirekhāyuksamācaret /
dvādaśāṣṭakamevaṃ vā yathāruci lekhit kramāt

kaṇṭhaṃ tribhāgavistāraṃ sārdhāṅgulasamāyatam /
dviraṅgulāyataṃ vāpi tadagre tu mukhaṃ bhavet

caturaṅgulavistāraṃ pañcāṅgulamathāpi vā /
trikaṃ dvyaṅgulamātraṃ syānmadhye dhārāṃ suśobhanām

suṣiraṃ kaṇṭhadeśe syāt praviśecchibika(?) yathā /
dhārāyā dakṣiṇe vāme mukhe vṛttaṃ samālikhet

kaṇṭhordhve tu likhedāsyaṃ suśobhanamataḥ param /
nāsikāmukhamekaṃ vā varāhānanameva ca

vyāghragomukhameva syāt yathāruci samācaret /
srukpṛṣṭhaṃ śodhayitvā tu parito 'ṣṭadalaṃ likhet

vṛttāpādaṃ tato bāhye nyaseddvyaṅgulameva tu /
tathaiva daṇḍamūle tu padanyāsaṃ yathāvidhi

aṅguṣṭhāṅgulamānena tadvṛttāṅghriṃ samācaret /
daṇḍadvitīyamadhyānte tṛtīyasyādhare 'mbujam

aṣṭapatrasamāyuktamālikhet phalakāyutam /
ghṛtādimadhyame bhāge kārayet paritaḥ kramāt

daṇḍamūle 'bjamukulaṃ trilekhāyuksamācaret /
caturabhyadhikaṃ viṃśadaṅgulaṃ tacchacīpate

sruvaṃ tu kārayetpaścāt ānanena samanvitam /
cara(ṣa?)kaṃ dvyaṅgulaṃ vṛttaṃ kartavyaṃ tu suśobhanam

goṣpadaṃ tu yathāmagnamalpapaṅke tathā bhavet /
sruva(sruco?) mūle mukhādye ca trirekhā yavamānataḥ

kārayettu śacīnātha sā ca sruk sarvasiddhidā /
mukhāditryaṅgulaṃ hitvā tadante 'ṅghriṃ samācaret

vṛttaṃ suśobhanaṃ pṛṣṭhe taddehāṅgulamānataḥ /
tathaiva sruvamūle 'ṅghriṃ vistārāyāmatādṛśam

padmasya mukulākāraṃ sruvamūle 'tha kārayet /
parasyākṣyaṅghrihīnena(?) kārayedvātha sruksruvau

etat sruksruvamākhyātaṃ maṅgalāṣṭakamucyate /
lohajānyeva kurvīta alābhe kāṣṭhajāni ca

aśvatthaṃ vā palāśaṃ vā khadiraṃ vaṭameva vā /
pañcaviṃśāṅgulāyāmaṃ dvādaśāṅgulavistṛtam

dvyaṅgulaṃ tu ghanaṃ jñeyaṃ pīṭhaṃ tu caturaṅgulam /
tasyopari likhetpadmamaṣṭapatraṃ sakarṇikam

śaṅkhaṃ cakraṃ patākaṃ ca śrīvatsaṃ darpaṇaṃ vṛṣam /
matsyayugmaṃ ca kumbhaṃ ca maṅgalāṣṭakamiṣyate

dvādaśāṅgulamāyāmaṃ śaṅkhādīnāṃ pracakṣate /
tattadrūpānusāreṇa vistāraṃ kārayedbudhaḥ

cāmare ca mahādīpe teṣāṃ pārśveṣu kalpayet /
śaṅkhādimaṅgalānāṃ tu chatraṃ copari vinyaset

adhunā toraṇānāṃ tu vakṣyate lakṣaṇa kramāt /
aśvatthatoraṇaṃ prācyāṃ ṛgvedaścaindradaivataḥ

audumbaraṃ tathā yāmye yajuśca yamadaivatam /
nyagrodhaṃ tu pratīcyāṃ vai sāmaṃ(?)varuṇadaivatam

uttare somadaivatyaḥ plakṣaścātharvaṇo bhavet /
aśvatthaṃ vāpyabhāve tu pūrvādi caturodiśi

kalpayet svasvanāmnā tu tattadvṛkṣasvarūpakam /
saptahastasamāyuktaṃ pañcahastamathāpi vā

caturhastāyataṃ vāpi yathāruci samācaret /
tadardhaṃ paṭṭikā tiryak tritriśūlasamanvitam

śūlāyāmaṃ dvitālaṃ vā pādonaṃ vā śacīpate /
pādaśūlaṃ mayā proktaṃ nāhamekādaśāṅgulam

navāṅgulaṃ vā devendra yathāruci samācaret /
pādau tau paṭṭikā tiryak dvābhyāṃ dvāviṃśadaṅgulam

vattaṃ vā caturaśraṃ vā yuktyā kuryādyathāvidhi /
toraṇān sthāpayeddvāre svasthāne ca svavṛkṣajān

khātvā bhūmau dvitālaṃ tu maṇḍape mūlavidyayā /
athaikatālamānaṃ vā khātayedavaṭaṃ dharām

tattadgarteṣu saṃsthāpya toraṇāni yathākramam /
suśobhanaṃ tu pūrvaṃ syāt subhadraṃ nāma dakṣiṇe

subandhuṃ vāruṇe caiva suhotraṃ nāma cottare /
etatsvanāmamantreṇa pūjayeddeśikottamaḥ

kumudaḥ kumudākṣaśca prācyāṃ dauvārikau smṛtau /
dakṣiṇadvārapālākhyau puṇḍarīko 'tha vāmanaḥ

śaṅkukarṇaḥ sarpanetraḥ pratīcyāṃ dvārapālakau /
uttaradvārapālau tu sumukhaḥ supratiṣṭhitaḥ

toraṇābhyantare sthāpya yathāṣṭau ca yathādiśi /
rakte patāke pūrvasyāṃ dakṣiṇasyāṃ tu pītake

paścime 'ñjanasaṃkāśe śuklavarṇe tathottare /
kumudādyāṃśca bhūteśān dhvajeṣu parikīrtitān

evaṃ saṃkṣepataḥ proktaṃ maṇḍapādi ca sruksruvam /
patākāntaṃ śacīnātha dārusaṃgrahaṇaṃ śṛṇu