Viṣvaksenasaṃhitā · Chapter 24

kārayet kramayogena sarvasaṃpatsukhāvaham //
iti śrīpāñcarātre viṣvaksenasaṃhitāyāṃ [pūjāṅgavidhirnāma] trayoviṃśo 'dhyāyaḥ ||
caturviṃśo 'dhyāyaḥ
viṣvaksenaḥ---
atha vakṣye viśeṣeṇa viṣṇorārādhanaṃ mune /
jalagandhādisaṃskāravidhiṃ guhyamanuttamam

brāhmaṇān vedasaṃyuktān vaiṣṇavān sukulodbhavān /
tān krameṇaiva saṃskṛtya prokṣayitvā śiropari

mūlamantreṇa mantrajñaḥ paścāttenaiva kārayet /
gopurasyottare kuryāddakṣiṇe vā jalāśayam

yāmye devagṛhasyaiva cottare vā pramāṇataḥ /
alaṃkṛtya tu tatsthānaṃ praṇavaṃ satataṃ japet

gomayen samālipya prokṣayedgandhavāriṇā /
dvādaśākṣaramantreṇa praṇavādyantasaṃyutam

alaṃkṛtya ca gandhādi dhūpadīpaiḥ samantataḥ /
muktādāmasamāyuktaṃ vitānairupaśobhitam

patākamālāsaṃyuktaṃ śālipiṣṭairalaṃkṛtam /
tatsthānaṃ sādhakaḥ paścāddvādaśākṣaravidyayā

saṃprokṣya dhūpayitvā ca guggulāgarusaṃyutam /
tasmin manorame deśe jalabhāṇḍādikān mune

sthāpayet praṇavenaiva pratyekaṃ taṃ hariṃ smaran /
jalabhāṇḍaṃ tathā kumbhaṃ vardhanīṃ ca bahūni ca

sragdhūpapātrasaṃyuktaṃ sthāpayettu samāhitaḥ /
evamādīni cānyāni tadbhūmau sthāpayet kramāt

sugandhaṃ devapānīyaṃ snānārthaṃ jalameva ca /
gandhadravyaṃ tathośīraṃ māñjaṃ malayajaṃ tathā

evamādīni cānyāni gandhadravyādikān mune /
saṃgṛhya viṣṇugāyatryā praṇavādyantasaṃyutam

jalabhāṇḍādikān sarvān viṣṇugāyatriyā mune /
saṃkṣālyānyān susaṃprokṣya pūritān gālitodakaiḥ

pūrayet praṇavenaiva tān pidhāya pṛthak pṛthak /
elācampakapuṣpāṇi ketakotpalameva ca

uśīramallikājātipuṣpaṃ vakulameva ca /
etān puṣpān samādāya vikṣipettān pṛthak pṛthak

eteṣāmapyalābhe tu jaleṣu munisattama /
yathāsaṃbhavamāhṛtya nikṣipedgandhapuṣpakam

trimātrāt(?)puṣpamuddhṛtya praṇavena visarjayet /
susūkṣmaiḥ sudṛḍhairvastrairveṣṭayedastramantrataḥ

tataścandanasaṃyuktaṃ karpūraṃ peṣayedbudhaḥ /
tathaiva gandhaṃ mālākāṃ(?)rajanīṃ praṇavaiḥ saha

evaṃ saṃskṛtya matimān sarvān devānanusmaran /
vardhanīṃ viṣṇugāyatryā salakṣmyāsmin pṛthak pṛthak

jalabhāṇḍājjalaṃ gṛhya praṇavena tu pūrayet /
evaṃ saṃpūrayitvā tu pidhāya ca suvastrakaiḥ

pūjārambhe muniśreṣṭha praṇavādyantasaṃyutam /
viṣṇugāyatrimantreṇa coddharadvardhanīṃ bahūn(?)

maṇḍapasyottare pārśve sthāpayet praṇavaṃ smaran /
evaṃ dine dine devapūjārthaṃ jalamuttamam

tathaiva candanādīni karpūreṇa vimiśritam /
dūrvākṣatāñjanaṃ caiva mātrātaṇḍulameva ca

tilagohemadadhyājyaṃ madhuparkopahārakam /
snānārthaṃ rajanīpiṣṭaṃ satailāmalakaṃ tathā

evamādīni cānyāni pūjādravyāṇi sarvaśaḥ /
praṇavena tu saṃskṛtya cāstramantreṇa coddharet

mukhavāsaṃ muniśreṣṭha praṇavaṃ satataṃ japan /
saṃskṛtyānte vidhānena coddharedvāgyataḥ śuciḥ

śaṅkhatraya(-tūrya?)samāyuktaṃ praṇavena dine dine /
devasya dakṣiṇe pārśve sthāpayedastramantrataḥ

prātaḥ sandhyādiṣaṭkāle 'pyevameva samācaret /
nitye naimittike 'pyevaṃ saṃskāro munisattama

saṃkṣepeṇa mayā prokto jalagandhādikaḥ kramāt /
anyathā cenmahādoṣo bhaviṣyati na saṃśayaḥ

durbhikṣaṃ jāyate caiva dhanadhānyakṣayo bhavet /
tasmāt sarvaprayatnena kārayedvidhicoditam