Viṣvaksenasaṃhitā · Chapter 23

snāpya bhaktyā hariṃ samyak aśvamedhaphalaṃ labhet //
iti śrīpāñcarātre viṣvaksenasaṃhitāyāṃ [snapanavidhirnāma] dvāviṃśo 'dhyāyaḥ ||
trayoviṃśo 'dhyāyaḥ
viṣvaksenaḥ---
ataḥ paraṃ pravakṣyāmi hareḥ pūjāṅgamuttamam /
puṣpārāmasya deśaṃ ca tasya saṃskārameva ca

evamādīni cānyāni sandhyārakṣāvasānakam /
śṛṇu guhyamanā bhūtvā sādhakānāṃ hitāya vai

devālayasya parito vāyavyāṃ diśi vā mune /
pūrve 'tha dakṣiṇe vāpi kuryādārāmamuttamam

pūrvavadvaiṣṇavairyuktaṃ yajamāno vidhānataḥ /
ācāryaṃ pūjayitvā tu brāhmaṇānāmanujñayā

aṅgulīyakavastrādyaistoṣayitvā hariṃ smaret /
ardhyādisnānaparyantaṃ tenaiva manasāvyayam

ravimaṇḍalamadhyasthaṃ devaṃ nārāyaṇaṃ prabhum /
saṃpūjayitvā tadbhūmau śaṅkhatūryādisaṃyutam

vaiṣṇavaiḥ saha tāṃ bhūmiṃ nirīkṣyāstreṇa mantravit /
karṣayellāṅgalaiḥ śūdraiḥ vaiṣṇavaistu yathākramam

tato mṛcchiṣyaśastraistu tāṃ bhūmiṃ śikṣayeddvija (?) /
yajamāno hariṃ smṛtvā ācāryaṃ pūjayet punaḥ

brāhmaṇān bhojayitvā tu puṇyāhaṃ tatra kārayet /
tasyāṃ bhūmyāṃ śubhāyāṃ tu puṣpavṛkṣādikān kramāt

sthāpayeddevadevasya pūjārthaṃ munisattama /
karavīraṃ tathā jatirmallikāvakulaṃ tathā

campakaṃ karṇikāraṃ tu nandyāvartaṃ tathaiva ca /
tulasīdvamevaṃ ca dalaikaṃ padmamucyate

māgadhīvṛkṣavakulaṃ(-lau?) kramukaṃ(-kaḥ?)panasaṃ(-saḥ?)tathā /
kadalyāmalakaṃ(-kau?)caiva madhukāmraṃ(-mrau?)tathaiva ca

nālikeraṃ ta(-rasta?)thośīraṃ candanaṃ hariberakam /
puṃnāgaṃ vaṃśapuṃnāgaṃ kṣudrapuṃnāgameva ca

dāḍimaṃ ca tathā havyaṃ pālāśaṃ pādapaṃ tathā /
evamādīni cānyāni devodyāne tu darśakān

puṣpārāme krameṇaiva kuryāttu brāhmaṇena vai /
brāhmaṇān jñānasaṃpannān vaiṣṇavān vedapāragān

saṃgṛhya tānalaṃkṛtya sarvadundubhisaṃyutam /
pūrvaṃ vighneśamabhyarcya upahā(-cā?)rasamanvitam

tāmbūlaṃ sūkṣmavastraistu brāhmaṇān pūjya mantravit /
evamādīni cānyāni vaiṣṇavān praṇavaṃ smaret

gandhādibhiḥ samabhyarcya tāmbūṃla dāpayet kramāt /
tasmāddvijavaraśreṣṭhairārāme munisattama

bījāni vāpayedbhūmau praṇavādyantasaṃyutam /
viṣṇugāyatrimantreṇa viṣṇumantramanusmaran

aṅkurādīṃstathā bhūmau cārāme kramayogataḥ /
sarvā(śakrā?)dīśānaparyantaṃ karavīrādikān kramāt

sthāpayet pūrvavanmantrī secayet praṇavairjalam /
yantreṇāhṛtya sacchi(-cchū?)dro vaiṣṇavaistu dine dine

toṣayet puṣpavṛkṣāṃśca patrāṇi vividha ni ca /
evamādīni ca nyāni phalavṛkṣāntameva ca

tālaṃ nimbaṃ tathā rājavṛkṣaṃ khadirameva ca /
viṣṇvālaye tathārāme svṛgṛhe ca vivarjayet

varjyasyāvarjanānyāni(-ne naiva?)vṛddhiḥ syāt kupyate hariḥ /
tasmāt sarvaprayatnena tālādīnāṃ tu varjayet

brāhmaṇārādhane loke parārthe viṣṇumavyayam (?) /
brāhmaṇaireva kartavyaḥ puṣpārāmo mahāmate

tathaiva nṛpaviḍbhyāṃ ca viṣṇorārādhena kramam (-maḥ?) /
śūdrārādhanadevasya śūdrairnandavanaṃ mune

kārayet kramayogena brāhmaṇānāṃ mahattapaḥ /
brāhmaṇārādhane bhūmau pūrvavannandanaṃ mune

sthāpitaṃ brāhmaṇeneva puṣpavṛkṣādikān kramāt (?) /
yathākāmaṃ tu mantreṇa jalaiḥ śūdraistu varjayet

āpuṣpakālamatraiva tāvat kuryāddine dine (?) /
puṣpakāle 'ṅkurādīni patrāṇi vividhāni ca

hastaṃ prakṣālya tān chedya(chitvā?)pātre śūdraistu pūrayet /
sapuṣpapātramādāya brahmaṇo vedapāragaḥ

praṇavena samuddhṛtya sāpidhānaṃ hariṃ smaran /
puṣpamaṇḍapamāsādya puṣpabhāṇḍe tu pūrayet

paścācchuddhajalairmantrīṃ saṃprokṣyāsmin mukheṣu tān /
pidhāya tu bahirdeśe niṣkramyāstreṇa mantrataḥ

tatastu phalakāṃ tasmin mantrī vāyumanusmaran /
saṃmṛjya kuśabṛndena prokṣayet praṇavena tu

saṃkṣālya viṣṇuṇāyatryā phalakāṃ gandhavariṇā /
hastaṃ prakṣālya tenaiva praṇavenābhimantrayet

puṣpapātrāt samādāya hastābhyāṃ praṇavena tu /
pūrayet phalakāntaṃ tu navavastraistu vā mune

tathaivāṅkurapatraṇi sarvāṇyetāni vai kramāt /
paścādgandhajalaistasmin prokṣayet praṇavaṃ smaret

manasā satataṃ devamanusmṛtya samāhitaḥ /
namaskāravihīne(-naṃ?)tu sūtreḥ puṣpāṇi sandhayet

utpalādīni cānyāni tulasīdvayameva ca /
nānāvarṇasamāyuktaṃ mālyānyevaṃ samācaret

tataḥ praṇavamuccārya ṣaḍakṣaramanusmaran /
puṣpapātre tu saṃpūrya praṇavenoddharedbudhaḥ

namaskāravihīnena(-naṃ tu?) hariṃ smṛtya śanaiḥ śanaiḥ /
devapārśvaṃ samāsādya sthāpayeddakṣiṇāgrataḥ

paścāttānyastramantreṇa prokṣayet sādhakaḥ kramāt /
tataḥ praṇamya manasā mūlamantramanusmaran

niṣkramya tu bahirdeśe japedvai vaiṣṇavo dvijaḥ /
devālayādbahirdeśe na kuryāt puṣpamaṇḍapam

yo bāhye kurute mohāt puṣpamālyādikān mune /
na pūjāphalamāpnoti tasmāttaṃ parivarjayet

sacchūdravaiṣṇavairmālāmāpadyapi mahāmune /
nitye naimittike caiva na kuryāttu kathaṃcana

brāhmaṇārādhena(?) cāsmin parārthe tu viśeṣataḥ /
ātmārthamavyayaṃ viṣṇu yathākāmaṃ samarcayet

sā pūjā bhuktimuktiḥ syāt tasmāt svārthaṃ viśiṣyate /
yo mohāt kurute mālāṃ śūdro brāhmaṇapūjane

ātmārthe ca parārthe ca sā pūjā niṣphalā bhavet /
tadgrāmaṃ(-mo?)nidhanaṃ yāti tasmādyatnena varjayet

prātarmadhyapradoṣeṣu sāndhyāṣaṭke viśeṣataḥ /
nitye naimittike caiva brāhmaṇārādhane mune

mantrapuṣpādikān sarvān brāhmaṇaireva coddharet /
saṃmārjanaśataṃ puṇyaṃ sahasramanulepanam

mālāḥ śatasahasrāṇi ananto dīpa ucyate /
tasmātteṣāṃ muniśreṣṭha dīpamālā viśiṣyate

gandhaiḥ puṣpaistathā dhūpadīpairmālyairmanoramaiḥ /
devadevaṃ samabhyarcya sandhyārakṣāṃ samācaret

jagatsaṃrakṣaṇārthāya tadgrāmasya viśeṣataḥ /
dine dine tu kartavyaṃ(?)pātre tāmrādike budhaiḥ

puṣpapātraistathā dūrvāmālādyaistilasarṣapaiḥ /
saṃpūryāsmin tadastreṇa dīpānaṣṭadale nyaset

kārpāsatūlagosarpiḥsatailena (tailena ca?)vimiśritam /
karpūrāgarusaṃyuktamaṣṭadigdīpasaṃyutam

saṃgṛhya praṇavenaiva puṣpairastreṇa pūjayet /
mahādīpasamāyuktaṃ chatracāmarasaṃyutam

ṣaḍakṣareṇa mantreṇa bhrāmayettacchiropari /
tatpaścāddāsadāsībhirvaiṣṇavaiḥ saha mantravit

nānāśaṅkharavairyuktaṃ nānāvādyasamanvitam /
pīṭāgre vātha bāhye vā rakṣādīpaṃ nayedbudhaḥ

ṣaḍakṣareṇa mantreṇa praṇavādyantasaṃyutam /
paścādgarbhagṛhāgre tu mahādīpaṃ visarjayet

nitye naimittikepyevaṃ sandhyārakṣāṃ samācaret /
sāyāne 'laṃkṛtānte vā sandhyārakṣāṃ viśeṣataḥ