Viṣvaksenasaṃhitā · Chapter 19

viśeṣaścātra saṃproktaḥ śeṣaṃ pūrvāvadācaret //
iti śrīpāñcarātre viṣvaksenasaṃhitāyāṃ [devīsthāpanādividhirnāmaṭa aṣṭādaśo 'dhyāyaḥ ||
ekonaviṃśo 'dhyāyaḥ
viṣvaksenaḥ---
ataḥ paraṃ pravakṣyāmi cāṅganyāsādilakṣaṇam /
śṛṇu guhyamanā bhūtvā sādhakānāṃ hitāya vai

aṅganyāsakramaṃ caiva mudrāyā lakṣaṇaṃ tathā /
phalāni vividhānyatra sarvavidyāprakāśakam (?)

ācāryaḥ prayato bhūtvā prāṅmukho vāpyudaṅmukhaḥ /
paṅkajaṃ vāsanaṃ baddhvā svastikaṃ vā yathecchayā

pūjārambhe 'ñjaliṃ kṛtvā namaskṛtya yathāvidhi /
uttāne vāmahastāgre tiryagdakṣiṇamañjasā

maṇḍalākṛti saṃspṛśya(?)vāmāntamitareṇa tu /
vāmāṅguṣṭhaṃ tato baddhvā muṣṭyordhvāṅguṣṭhayā mune

muṣṭiṃ kṛtvā gato dhāma dhyātvā mantraṃ samāhitaḥ /
saṃspṛśya hṛdayaṃ devaṃ trimātre śirasā tathā

praṇamya pāṇivyatyāsaṃ baddhvā mudrāṃ tathā punaḥ /
praviśyāñjalimudrāṃ tu pūjāmantreṇa mantravit

namo 'ntaṃ hṛdayaṃ mūrdhni śikhāyāṃ kavace tathā /
astre netre tato dhyātvā taccihnena nyasedbudhaḥ

mudrāyā lakṣaṇaṃ cāpi niruktaṃ ca tataḥ śṛṇu /
labdhayā tu yayā yasmāt sādhako devavairiṇām

drāvayīta mudaṃ tasmāt mudrā tallakṣaṇaṃ śṛṇu /
baddhāyāstu bahirmuṣṭyā ṛjumaṅguṣṭhamāyatam

kṛtvāto madhyamāyāṃ tu tanmūlaṃ hṛdaye spṛśet /
āhṛtya tarjanīṃ samyak baddhvāṅguṣṭhena muṣṭikam

athāṅguṣṭhalalāṭānte śikhordhvamahatīṃ tathā (?) /
bṛhadagradvayenaiva kṣudramudrasya(?) bandhanam

hastābhyāmūrdhvamāyamya kṛtvā cānābhimaṇḍalam /
kavacasya dhiyā nyasya kavacasya tu mudrikā

aparāstrasya mudraiṣā kathyate dakṣiṇāgrakam /
muṣṭiṃ baddhvā tatastarjanyagramaṅguṣṭharekhayā

spṛṣṭvā sphoṭamudakṣepaḥ pūrvādi daśadikṣvapi /
kaniṣṭhānāmike baddhvā nahatā talamadhyage

tarjanīmadhyamāgrābhyāṃ netrayornetramudrikā /
madhyamutthāpitaṃ kṛtvā hastaṃ saṃkocya yatnataḥ

kanīyasaṃ tu saṃhṛtya śeṣayorubhayorapi /
atho vaktramukhāṃ śeṣāṅgulinā vāmakena tu (?)

kareṇa dakṣiṇaṃ spṛṣṭvā bhrāmayeddīpamudrikā /
lalāṭe hṛdi vā samyak saṃpuṭo 'ñjalirūrdhvagaḥ

nāmnā mudreyaṃ vijñeyā praṇāme 'ñjalimudrikā /
uktānāmiha vānyeṣvapyanuktānāṃ prayatnataḥ

pradarśane 'pyaśaktaḥ san añjaliṃ tu pradarśayet /
añjalirnāma mudreyaṃ sarvamudrāmayā priyā

viṣṇoḥ praṇāmamudraiṣā sarvakāmān pradāpayet /
etābhirnyastasarvāṅgo japahomādikān mune

yaḥ karoti svarakṣāṃ ca dīrghamāyuryaśaskaram /
sukhamaiśvaryabalatāṃ kalpyatāṃ ca labhet parām

vidyā hi vividhāṃ śreṣṭhāṃ bhuktimuktistathaiva ca /
rāṣṭro yasyoditānāṃ tu vidyānāmekayā mune

mūrtimantraprakāreṇa sādhakaḥ sakṛdarcayet /
tasya sarvamabhiprāyaṃ siddhyatyeva na saṃśayaḥ

anāvṛṣṭibhayaṃ nāsti ativṛṣṭibhayaṃ tathā /
vyādhidurbhikṣacorādi pīḍākālamṛtistathā

bahunātra pralāpena kiṃ sarvān sādhayiṣyati /
yadyat kāmayate svasya samṛddhaṃ puruṣo bhuvi

tattadeva labhet samyak harestasya nivedayet /
sādhakaścāpi vā bhaktyā prayataḥ samyagarcayet

tattatsarvaṃ labhedevaṃ mṛṣṭānnaṃ nātra saṃśayaḥ /
nṛpo vā nṛpamātro vā vedamantraistathā mune

mūrtimantrairaśakto vā svadravyairarcanādikān /
kārayīta muniśreṣṭha sādhakena yathāvidhi