Viṣvaksenasaṃhitā · Chapter 1

om
viṣvaksenasaṃhitā
prathamo 'dhyāyaḥ
viṣvaksenaḥ---
athātaḥ saṃpravakṣyāmi bhūparīkṣāvidhiṃ param /
karṣayecchodhayedbhūmiṃ prāgudakpravaṇāṃ śubhām

asthikeśādirahitāṃ kapālāṅgaravarjitām /
sarīsṛpādyā vyāghrādyā ye cānye duṣṭajantavaḥ

yasyāṃ bhūmau pradṛśyante tāṃ bhūmiṃ varjayet sadā /
ārambhe śvaśṛgālaiśca saṃkīrṇā bandhunāśinī

purīṣabhūmiḥsarveṣāṃ karturduḥkhapradā sadā /
tuṣabhasmāsthikeśaiśca kāṣṭhaloṣṭakapālakaiḥ

krimikīṭapataṅgaiśca śarkaraiśca samanvitā /
aśubhāśrīkarī bhūmiḥ tasmādyatnāt parīkṣayet

evaṃ durlakṣaṇaiścānyairyuktāṃ yatnena varjayet /
brāhmaṇasya sitā bhūmiḥ raktā vai kṣatriyasya tu

pītavarṇā tu vaiśyasya kṛṣṇā śūdrasya kīrtitā /
brāhmaṇī ghṛtagandhā syāt kṣatriyā raktagandhinī

mūtragandhā tu yā veśyā śūdrā viṣṭhānugandhinī /
madhurā brāhmaṇī proktā kaṣāyā kṣatriyā smṛtā

ri(ti?)ktā vaiśyā tu kaṭukā śūdrā ceti prakīrtitā /
evaṃ parīkṣya yatnena varṇagandharasādibhiḥ

khātayedratnimātraṃ tu pāṃsumuddhṛtya pūrayet /
pāṃsurapyadhiko yatra sā bhūmiḥ sarvakāmadā

uttamā yatra vai pāṃsuḥ samo hyardhaphalapradā /
madhyā pāṃsuryatra nṛna sāriṣṭā phaladādhamā

tṛ(u?)ptāni sarvabījāni prarohanti hi yatra vai /
trirātrābhyantareṇaiva sā bhūmiścottamā matā

madhyamā pañcarātreṇa adhamā saptarātrikā /
yasyāṃ tu na prarohanti tāṃ prayatnena varjayet

sasyānāṃ phalakāle tu gavāṃ tṛptiṃ ca kārayet /
tatastu lokapālāṃstu pūjayet sādhakottamaḥ

annairapūpairlājaistu madhyarātre śacīpate /
evaṃ baliṃ prakurvīta pṛthagvā samayogataḥ

tatkṣetraṃ khātayetpaścāt caturaśraṃ samantataḥ /
puruṣadvayaṃ khanitvā tu tadardhaṃ vāpi khātayet

puruṣārdhapramāṇaṃ vā khaḍgamānapramāṇataḥ /
evaṃ kṣitiṃ khanitvā tu tanmadhye se ca(pūra?)yejjalam

tanmadhye tu vidhiṃ pūjya brahmabījena mantravit /
gandhapuṣpairalaṃkṛtya ghaṇṭāśabdasamanvitam

śaṅkhādighoṣasaṃyuktaṃ vīṇāveṇusamanvitam /
evaṃ vidhiṃ samabhyarcya adhivāsanamārabhet

tasya dakṣiṇapārśve tu paścime cottare 'pi vā /
vasvādīnāṃ tu tanmadhye maṇḍapaṃ kalpya sādhakaḥ

pūrṇakumbhaṃ nyasenmadhye pakvabimbaphalākṛtim /
droṇadvayena saṃpūrṇaṃ trisūtraiḥsamalaṃkṛtam

gandhatoyena saṃpūrya gandhapuṣpasamanvitam /
droṇāṣṭaśālīnāstīrya padmamaṣṭadalaṃ likhat

karṇikāyāṃ nyasetkumbhaṃ vastrayugmena veṣṭitam /
navaratnasamāyuktaṃ sauvarṇāyudhapañcayuk (?)

vāsudevasya mantreṇa sthāpayeddeśikottamḥ /
sarvāyudhasamāyuktaṃ sarvadevāvṛtaṃ tataḥ

hiraṇyaṃ sarvabhūtajñaṃ sarvabhūtahṛdi sthitam /
ātmānamantarātmānaṃ paramātmānamavyayam

nārāyaṇamaṇīyāṃsaṃ sṛṣṭisaṃhāravikramam (kāraṇam?) /
evaṃ hi puruṣaṃ viṣṇuṃ dhyāyet kumbhodamadhyame

evaṃ dhyātvā samabhyarcya gandhādyaiḥ sumanoramaiḥ /
pratyekaṃ droṇaśālyūrdhve vidyeśān parito nyaset

pūrvavaddravyasaṃyuktān ghaṭeṣvabhyarcya sādhakaḥ /
svaiḥ svairmantraiśca gandhādyairupacārairmanoharaiḥ

evaṃ saṃpūjya vidyeśān homasaṃskāra(karma sa?)mārabhet /
kumbhasya pūrvadigdeśe kuṇḍaṃ ca caturaśrakam

vṛttaṃ vā śilpinā kuryāt sthaṇḍile vā samācaret /
prāsādārambhakāle tu madhyarātre śacīpate

śaṅkhatūryādisaṃyuktaṃ svastisūktasamanvitam /
sarvavighnopaśamanaṃ pālāśaṃ gṛhya deśikaḥ

aṣṭottarasahasraṃ vā aṣṭottaraśataṃ tu vā /
nārasiṃhena mantreṇa madhyame juhuyāt sakṛt

odumbarasamidbhirvā[pyaṭaṣṭāviṃśatisaṃkhyayā /
pratyekaṃ mūlamantreṇa tathaivājyaṃ samācaret

caruṃ puruṣasūktena ṣoḍaśāhutimuttamām /
juhuyāt kuṇḍamadhye tu sarvasaṃpatsukhāvaham

evaṃ kṛtvā vidhānena pūrṇāhutimathācaret /
srucā mūlena mantrajño dvādaśākṣarasaṃjñayā

kuḍubaṃ vā tadardhaṃ vā tasyārdhaṃ vā śacīpate /
kapilājyamathājyaṃ vā saṃgṛhya juhuyāt kriyām(kramāt?)

paridhiprabhṛtīn dagdhvā dakṣiṇāmādadettataḥ /
dakṣiṇānte śacīnātha śaṅkhādyairghoṣayet kramāt

nṛttagītādisaṃyuktaṃ supuṇyāhapuraḥsaram /
vedādhyayanasaṃyuktamadhivāsanamācaret

evaṃ samāpya homāntaṃ pūrvarātre 'dhivāsayet /
prabhātāyāṃ tu śarvaryāṃ snātvācāryaḥ samāhitaḥ

pūrvavat pūjayet kumbhān prokṣayet kṣitimadhyame /
svaiḥ svairmantraistu matimān sīmāyāṃ sarvadikṣu ca

bhūtakrūrabaliṃ dadyāt aṣṭadikṣu samantataḥ /
digbandhaṃ kārayet paścāt astramantreṇa mantravit

kumbhodakādaśeṣaṃ tu kṣitimadhye nayet kramāt /
tato 'vaṭaṃ kramāt pūrya mṛdbhiḥ sikatasaṃyutam

kārayenamudgaraiḥsamyak vaiṣṇavairvedapāragaiḥ /
sūtraśaṅkūn khanitvā tu caitre māse śubhe dine

sūtreṇa sūtrayet paścācchilpinā kuśalena vai /
prāsādaṃ kārayet paścāt ācāryaḥ śilpibhiḥ saha

sādhako mantrayogyastu sthapatiḥkarmayogyataḥ (kaḥ?) /
yadidaṃ bhūmiśuddhyarthaṃ prokṣaṇaṃ paramaṃ śubham

evaṃ saṃkṣepataḥ proktaṃ prāsādārthaṃ śacīpate /
anenaiva vidhānena yaḥ kuryāt puṇyakarmabhāk

sarvapāpavinirmuktaḥ sa yāti paramāṃ gatim /
rāṣṭravṛddhikaraṃ puṇyamāyurārogyavardhanam

dhanadhānyāni vardhante rājarāṣṭrādi vardhate /
ācāryaṃ pūjayet paścāt vastrairābharaṇairapi

śilpinaṃ pūjayet tatra vastraiḥ kanakakuṇḍalaiḥ /
daivajñaṃ pūjayet paścāt navavastrāṅgulīyakaiḥ

sadasyān pūjayet paścāt mukhavāsanapūrvakam /
evaṃkrameṇa saṃpūjya vastrābharaṇasaṃyutam

tatastu kārayedgehaṃ śilpinā kuśalena tu /
sumuhūrte sulagne tu bālasthānamathārabhet

bālasthānaṃ purākalpya paścānmūlālayaṃ kramāt /
kārayettu viśeṣeṇa ratnanyāsasamanvitam

hastamātraṃ khanitvā tu brahmasthāne śacīpate /
sahasraṃ śataniṣkaṃ vā tasyārdhaṃ vārdhameva ca

vinyaset kṣitimadhye tu taptakāñcanamuttamam /
marakatādīni ratnāni saṃgṛhyāstreṇa sādhakaḥ

brahmādīśāvasānaṃ tu vinyaset svasvamantrataḥ /
madhyarātre suguptena yajamānena saṃyutaḥ

śaṅkhādighāṣasaṃyuktaṃ garbhādhānaṃ samācaret /
tāmreṇa phelakāṃ kṛtvāvaṭamācchādya pūrayet

śilābhiriṣṭakābhirvā tu pracchādyāvaṭaṃ kramāt /
gandhapuṣpādinābhyarcya ghaṇṭāśabdasamanvitam

brahmabījena tatsarvaṃ sādhayet sādhakottamaḥ /
paścāddevīṃ samabhyarcya śriyārthaṃ paramāṃ śubhām

vāsudevasya (vaṃ sva?) mantreṇa paścāt saṃpūjayet kramāt /
evaṃ saṃkṣepataḥ proktā bhūparīkṣā hyanuttamā