Viṣvaksenasaṃhitā · Chapter 18

evaṃ saṃkṣepataḥ prokto (ktā?) bhittibimbasya saṃsthitiḥ //
iti śrīpāñcarātre viṣvaksenasaṃhitāyāṃ (jaṅgamabimbādisthāpanavidhirnāma) saptadaśo 'dhyāyaḥ ||
aṣṭādaśo 'dhyāyaḥ
viṣvaksenaḥ---
athātaḥ saṃpravakṣyāmi devīnāṃ sthāpanaṃ param /
tayorvivāhaṃ homaṃ ca śṛṇu guhyamanukramāt

devaṃ pūrvaṃ pratiṣṭhāpya tatkāle prokṣayenmune /
śriyādīnāṃ(?)svamantreṇa mahākumbhasthavāriṇā

pṛthak cenmuniśārdūla devīsthāpanamācaret /
maṇḍapaṃ pūrvavat kṛtvā daśahastasamanvitam

vedikāṃ pūrvavat kṛtvā maṇḍapasthānurūpataḥ /
hastamātraṃ tadardhaṃ vā kuṇḍāni paritaḥ kramāt

kārayettadvidhānena śilpibhiḥ saha sādhakaḥ /
caturaśrāṇi sarvāṇi kīrtitāni śriyaḥ kramāt

bhūmervṛtāni(?)kuṇḍāni tadaṅgānāṃ tathaiva ca /
śāntiṃ lakṣmīṃ ca vāgdevīṃ ratiṃ pūrvādi cāgniṣu

śvetāṃ padmotpalaśyāmāṃ dhyātvā tu juhuyāt kramāt /
lakṣmīṃ sarasvatī caiva ratiḥ prītisthathaiva ca

kīrtiḥ śāntistathā tuṣṭiḥ puṣṭiścaiva yathādiśam /
pūrvādikalaśānāṃ tu vedikāyāṃ tu devatāḥ

mahāmumbhaṃ tu saṃsthāpya tacchaktiṃ madhyame nayet /
sarvaśaktisamopetāṃ sarvāṅgāṃ sarvakāriṇīm

saṃpūjayet svamantreṇa gandhādyaiḥsumanoramaiḥ /
dhvajānāṃ toraṇānāṃ ca kalaśānāṃ ca devatāḥ

pūrvoktāḥ pūjanīyāśca krameṇaivātra caiva hi /
toraṇadvārakalaśān vedikākalaśānapi

pālikāvedikāyāṃ tu tathā caivāṣṭamaṅgalān(?) /
vastraiḥ krameṇa saṃchādya gandhapuṣpaiśca pūjayet

tattatsvarūpaṃ sauvarṇaṃ kalaśeṣu vinikṣipet /
snapanaṃ śayanaṃ caiva adhivāsanameva ca

pūrvoktaṃ sakalaṃ kuryāddevīmāvāhya yatnataḥ /
pūjāṃ ca mahatīṃ kuryāt kāle prāpte suśobhane

viśeṣamatra vakṣyāmi sarvalokaśubhapradam /
sarveṣāṃ bhaktijananamāyuḥśrīkīrtivadhanam

kartṝṇāṃ puṣṭijananaṃ grāmasyaiva viśeṣataḥ /
sarvaduḥkhaharaṃ puṃsāṃ sarvakāmaphalapradam

kramādvaivāhikaṃ homaṃ kārayettantrapāragaḥ /
vaiṣṇavyaḥ śaktayaḥ proktā mānuṣyo yāśca śaktayaḥ

tāsāṃ vai yatra śaktīnāṃ pūrvā lakṣmyāḥparā kṣitiḥ(teḥ?) /
bhūmeraṃśāvatāraṃ tat(-rastu?)puṣṭirnāma mahāmune

kṣitiṃ vāpyathavā puṣṭiṃ savyapārśve tu yojayet /
devyorvivāhamekasmin kāle tu samupasthite

lakṣmyāḥ pūrvaṃ tato bhūmeḥ kārayitvā vicakṣaṇaḥ /
lagnasyātikrame kṛtvā jaladānaṃ yathāvidhi

tasmin krameṇa śeṣaṃ tu sādhakaḥ sādhayet punaḥ /
kārayet kramayogena caikasmin sthaṇḍile punaḥ

vastrayugmena deveśaṃ devīṃ caiva yathākramam /
bhūṣaṇaiścaiva vividhairalaṃkṛtya prayatnataḥ

devīṃ devāsane nītvā homakarma samārabhet /
puṇyāhaṃ kārayitvā tu brāhmaṇaiḥ svastisaṃyutam

sarvopacārasaṃyuktaṃ jaladānaṃ tu kārayet /
sthaṇḍilaṃ purataḥ kṛtvā devasya purataḥ sthitaḥ

vijñāpyaivaṃ kṛtānujño homaṃ kuryādvicakṣaṇaḥ /
pañcaviṃśatimādāya samidho 'ktāstu sarpiṣā

aṣṭākṣareṇa mantreṇa svāhāntena sakṛt kṣipet /
ājyāhutiśataṃ hutvā gāyatryā viṣṇusaṃjñayā

ācāryo 'gniṃ parikramya yathā rājñāṃ purohitaḥ /
tathā lājaistu juhuyāt praṇavenāhutitrayam

madhye madhye parikramya pāvakaṃ pāvanaṃ hareḥ /
śāntihomaṃ tu kurvīta sarpiṣāṃ praṇavena tu

pratyekaikaṃ muniśreṣṭha ṣoḍaśāhutimuttamam /
homaṃ samāpya vidhivat nṛttageyādi kārayet

evaṃ vaivāhikaṃ kṛtvā pūjayet puruṣottamam /
anenaiva vidhānena pratiṣṭhāmātrayā(?)pi vā

devena saha saṃyojya pūjayet tantravittamaḥ /
lohabimbasya devīnāṃ saṃproktaṃ munisattama

lakṣmyādikramayogena pūjayettu dine dine /
sarvāsāmeva devīnāṃ eṣa eva vidhirbhavet

mūlaberasya devīnāṃ pratiṣṭhāmātrayā(-ma?) pyalam /
vivāhādikramastatra neṣyate munisattama

svabījaireva kartavyaṃ sthāpanaṃ munisattama /
medhā sarasvatīdurgetyevamādiṣu mūrtiṣu

evamāduṣu kartavyaḥ pratiṣṭhādikramo mune /
prokṣayet svasvamantraistu brahmakumbhasthavāriṇā

svaiḥ svairmantraistu saṃsthāpya pūjayettu vidhānataḥ /
evaṃ saṃkṣepataḥ proktaḥ devīnāṃ sthāpanakramaḥ

evaṃ yaḥ kārayedbhaktyā śaktīnāṃ sthāpanaṃ param /
āyuraiśvaryaputrādīn sarvān kāmānavāpnuyāt

iha loke sukhaṃ labdhvā paraloke tathaiva ca /
rājyalakṣmīṃ parāṃ prāpya punaḥ prājño bhaviṣyati

atra kaścidviśeṣo 'sti śrīvatsasya haripriyam /
lakṣaṇaṃ sthānabhedaṃ ca mantramārādhanaṃ tathā

evamādīni cānyāni viśeṣāṇi(!)mahāmune /
saṃkṣepataḥ pravakṣyāmi śṛṇu guhyamanuttamam

sarvasaṃpatsamṛddhyarthaṃ sarvakāmaśubhapradam /
suvarṇarajatenāpi tathā tāmramayena tu

uttamadikrameṇaiva kārayet phalakāspadam /
ṣaḍaṅgulaṃ tathāyāmaṃ tasya vistārameva ca

pañcāṅgulāyataṃ vāpi tanmadhye tatsamaṃ bhavet /
dvyaṅgulaṃ tasya vistāraṃ maulerekāṅgulaṃ tu vā

evaṃ jñātvā muniśreṣṭha kuryādāspadamuttamam /
evaṃ hi lakṣaṇaṃ proktaṃ uttamaṃ phalakākṛteḥ

ekāṅgulavihīnaṃ tu madhyamaṃ paripaṭhyate /
dvyaṅgulaṃ tadvihīnaṃ tu kanīyasamudāhṛtam

tryaṅgula(-lena?)vihīnaṃ tat kuryāttasyādhamādhamam /
madhyamādhamakārye 'smin adhamādhamameva ca

tasyānurūpataḥ kuryāt vistāraṃ munisattama /
tanmadhye cintacitvā tu sādhakaḥ paramārthavit

sādhayet kamalāṃ devīṃ taptakāñcanasaṃnibhām /
sarvalakṣaṇasaṃyuktāṃ padmāsanasamanvitām

padmahastāṃ śriyaṃ devīṃ padmanābhapriyāṃ śubhām /
maṇimauktikasaṃyuktāṃ sarvābharaṇabhūṣitām

evaṃ saṃcintya tāṃ devīṃ śriyaṃ trailokyanāyakīm /
harervakṣasi pārśve tu dakṣiṇe munisattama

sthāpayettāṃ śriyaṃ devīṃ jagatsaṃrakṣaṇārthakam /
sarvasaṃpatsamṛddhyarthamiti śāstrasya niścayaḥ

jalādhivāsane cāsmin viśeṣaṃ kathayāmi te /
bhāradvayena saṃpūrṇaṃ jalabhājanamuttamam

saṃgṛhya muniśārdūla tasmin pātre 'dhivāsayet /
pūrvoktajalamānīya pūrayitvā tu bhājanam

gandhapuṣpaistu saṃpūjya saṃsmaredamṛtārṇavam /
tanmadhye pūrvavat kuryāt jalavāsaṃ vidhānataḥ

etat krameṇa vā kuryāt acyutasya mahāmune /
darpaṇe saṃsthite bere citrādīnāṃ viśeṣataḥ

hrastaṃ lohajabimbasya mune svārthaparārthayoḥ /
kārayejjalavāsaṃ tat kanīyasamudāhṛtam

jalādhivāsane prokto viśeṣo munisattama /
dviprakāraṃ mayā proktaṃ yathāyogaṃ samācaret

mūlaberāttu tāṃ devīmāvāhyātraiva yojayet /
mūlamantreṇa matimān kumbhatoyena hastayoḥ

saṃyojyātraiva mantreṇa sādhakaḥ paramārthavit /
mantrakośe mayā proktastantre 'smin munisattama

saṃproktaṃ paramaṃ mantraṃ guhyadguhyaṃ varapradam /
tenaiva prokṣayeddevīṃ mahākumbhasthavāriṇā

taddehe nyāsamārgeṇa vinyasettantravittamaḥ /
pañcaviṃśatitattvāni tatpañcākṣarameva ca

śaṅkhacakrābjamudrāṃ tu darśayettantravittamaḥ /
tatastvārādhayeddevīmardhyādyaṣṭopacārakaiḥ

arghyaṃ pādyaṃ tathācāmaṃ gandhapuṣpaṃ tathaiva ca /
dhūpadīpaṃ nivedyaṃ ca pāyasaṃ gulasaṃyutam

evamuktaprakāreṇa ghaṇṭādundubhisaṃyutam /
kārayed balidānaṃ tu sarvakāmapradaṃ śubham

bilvapatrākṣatairyuktaṃ padmaṃ pālāśamutpalam /
karavīrādisaṃyuktaṃ pūjayet kamalālayām

dine dine muniśreṣṭha evameva samarcayet /
pāyasānnaṃga gulopetaṃ bilvapatrāṅkurairyutam

candanodakasaṃyuktaṃ balidravyamihocyate /
evamuktaprakāreṇa ghaṇṭādundubhisaṃyutam

kārayedbalidānaṃ tu sarvakarma(-kāma ?) pradaṃ śubham /
bilvamūlasya pālāśaṃ mūlāśvatthasya vā mune

caturaśraṃ tu vṛttaṃ vā pīṭhaṃ kṛtvā tu mantravit /
tanmadhye pūjayellakṣmīṃ lakṣmayai nama iti bruvan

praṇavādisamāyuktaṃ pañcākṣaramiti smṛtam /
tasyāgre tu baliṃ kuryāt pūvoktena vidhānataḥ

gandhapuṣpasamāyuktaṃ dhūpadīpasamanvitam /
evaṃ saṃpūjayitvā tu mukhavāsaṃ pradāpeyat

balyante tu muniśreṣṭha śrīsūktaṃ tu paṭhet tridhā /
śrīmantraṃ tatstutiṃ vāpi paṭhettantravicakṣaṇaḥ

tataḥ pañcamahāśabdaṃ ghoṣayecca punaḥ punaḥ /
pūrvavat pūjayeddevīṃ sāyāhne munisattama

pūjānte kārayeddhomaṃ samidājyacarūnapi /
bilvādyanyatamasyātha padmakuṇḍe yathecchayā

saṃkalpyaikaṃ muniśreṣṭha tanmadhye homamācaret /
bilvapālāśasamidhaḥ pratyekaṃ ṣoḍaśāhutīḥ

juhuyānmūlamantreṇa kapilājyena homayet /
tathaiva pāyasaṃ brahman juhuyāt ṣoḍaśāhutīḥ

tathaiva bilvapatraiśca padmairekadalairapi /
sākṣataiḥ karavīraistu juhuyāttu punaḥ punaḥ

homaṃ kṛtvā tu vidhivat kuṇḍāddevīṃ samuddharet /
taddhomaḥ paramo guhyaḥ grāmarājñorvivṛddhikṛt

sarvarogavinirmuktarṃ(-moktā?)sarvakāmapradaḥ śubhaḥ /
tasmāt sarvaprayatnena rātrau homaṃ samācaret

homānte dakṣiṇāṃ dadyāt yathāvittāmusārataḥ(?) /
ācāryaṃ pūjayet paścāddhemavastrāṅgulīyakaiḥ

brāhmaṇān pūjayet paścāddaivajñamanupūjayet /
uktalakṣaṇahīnena yadi kuryāt pramādataḥ

grāmarājñośca rāṣṭrasya yajamānasya nāśanam /
na phalanti kriyāstatra nātra kāryā vicāraṇā

tasmāt sarvaprayatnena kārayedvidhicoditam /
iti saṃkṣepataḥ proktamātmārthasya parasya ca