Viṣvaksenasaṃhitā · Chapter 12

sarvān kāmānavāpnoti viṣṇulokaṃ sa gacchati //
iti śrīpāñcarātre viṣvaksenasaṃhitāyāṃ [varṇāyudhavinyāsavidhirnāma] ekādeśo 'dhyāyaḥ
dvādaśo 'dhyāyaḥ
dvādaśo 'dhyāyaḥ viṣvaksenaḥ---
śṛṇu devamuniśreṣṭha mantrānukramaṇaṃ param /
soddhāraṇaṃ ṛṣiśchando daivaṃ varṇādimeva ca

saṃkṣepeṇa pravakṣyāmi yathāmati mahāmune /
anyaṃ tathāgatādyaṃ syādagnimāyudhasaṃhṛtiḥ

paramātmā dvitīyaṃ tu tṛtīyaṃ vāsudevakam /
saṃkarṣaṇaṃ tato mantraṃ pradyumnasya tathaiva ca

aniruddhasya vidyā ca matsyamantramanantaram /
kūrmavidyā tataḥ kroḍaṃ daśamaṃ nārasiṃhakam

paścādvāmanamantraṃ ca jāmadagnyamataḥ param /
vidyā dāśaratherūrdhvaṃ balarāmamanantaram

kṛṣṇaṃ ca kalkīviṣṇośca keśavasya punaḥ punaḥ /
nārāyaṇasya vidyāṃ tāṃ mādhavasya punaḥ kramāt

govindasyāpi viṣṇośca madhusūdanavidyayā /
traivikramaṃ vāmanaṃ ca śrīdharākhyamatho mune

hṛṣīkeśaṃ ca mantraṃ ca padmanābhamataḥ param /
brahmamantraṃ tathā caiva dāmodaramanukramāt

viśvarūpasya mantraṃ ca yajñamūrterataḥ param /
vedamūrteratho mudrāmantraṃ śrīmantrameva ca

puṣṭividyā tathā medhāvidyā sarasvatī tathā /
durgāvighneśayoścāpi vidyā yā parameṣṭhinaḥ

puruṣasya ca vidyā ca viśvamantramataḥ param /
nivṛttisarvaiśvaryayormantraṃ mantravidāṃ vara

yathoktamuddhariṣyāmi bhaktānāṃ hitakāmyayā /
mantroddhāraṃ pravakṣyāmi yathāvadanupūrvaśaḥ

śṛṇuṣvāvahito bhūtvā guhyādguhyataraṃ mune /
viṣṇupañcakamuddhṛtya bhānumantamataḥ param

yajuṣāmāntalāntaṃ ca sāntamāntena yojayet /
praṇavena puṭīkṛtya dvitīyaṃ bindunā yutam

namasā bhagavānekādaśayuktaṃ paraḥ param /
ṇāntamāntātmane viśveśāntaṇāntaṃ salāntakam

ekādaśadvitīyena vāsudevāt samuddharet /
senāyutādyalāntena yanāṃghrimaneryutām

mantrādyāmuddharedvidvān guhyaṃ guhyārthasādhakam /
ādyantaṃ praṇavaṃ kṛtvā namaḥ śabdamanantaram

prathamāntaṃ tathā mādi makārāntaṃ kalāntakam /
turīyādi sahaihāraṃ sacūḍāmaṇiṣāntakam

vargādimanyakāreṇa śāntaṇonantaraṃ tathā /
māntamāntaṃ tathākāramuddharet sādhakottamaḥ

amityādyuparataṃ me kuryānnamaḥ śabdamanantaram /
bhagavantaṃ caturthyantaṃ pañcamānilamātiyuk

caturthasya tṛtīyena vāyupañcamabheditam /
pañcamāntaṃ caturthyantaṃ dvikalaṃ vāyumādinā

savisargamakāraṃ ca praṇavaṃ ca namastathā /
pañcamaṃ ca caturthaṃ ca prathamasya tṛtīyakam

lāntaṃ tu turyapūrvā ca svaraikādaśasaṃyutam /
viṣṇuṃ ca turyavargāntaṃ tṛtīyaṃ svarabhūṣitam

pañcamasvarayuktyā tu turīyaṃ tricaturthakam /
āntāntamanilaṃ paścāt ṣoḍaśasvaramuddharet

anilādimathāddhṛtyānalamaukārameva ca /
pibantaṃ tu namaḥ śabdaṃ svaiḥ pūrvaiḥ samasvaram

kāntāntalāntatevī ca yaṣathādicaturthakam /
ekādaśaṃ dvitīyena lāntaṃ pañcamayojitam

vāntadevāyamatpūrvaṃ ṣāntavāyuṃ tathāyakaḥ /
tato vāyuṃ ca rūpāya mantrādīṃśca tatoddharet

dvitīyaṃ binduśīrṣeṇa lānto nāthopari nyaset /
namasā bhagavacchabdaṃ viṣṇuśabdaṃ ca pūrvavat

ṣaṭśikhaṃ kaṃ ca vahniṃ ca makāreṇātha kūrparam /
ṣaṣṭhasvaraṃ ca pānteyamuddharenmantravittamaḥ

nikāmādibakārāntaṃ ṣaṣṭhasvaravibhūṣitam /
savisargaṃ namaḥ śabdaṃ bhagavacchabdamuddharet

ekārāntaṃ śakārādi makārāntaṃ ca yāntakam /
sāntaṃ dvitīyasaṃyuktaṃ vāyumāntaṃ ca bhūriti

āntāyaṃ mukhamuddhṛtya lāntaṃ binducaturdaśaiḥ /
yathāmatau tathāntepi namo bhagavate tathā

prathamena tu yāntāni viyadādīni binduyuk /
dvitīyena viyaccāpi vāyusādimatho 'mbare

analādi turīyāntaṃ bindunādavibhūṣitam /
trayodaśāntaṃ svāntādi vāntaṃ gavamataḥ param

ekādaśe ca ṇāntaṃ ca ṇāntaṃ śāntaṃ ca vai param /
ekādaśadvitīyena lāntaṃ bhāntamanantaram

nāntaṃ māntaṃ samuddhṛtya carame prathamaṃ likhet /
mantrasyāsya muniśreṣṭha jāmadagnyamatho śṛṇu

yāntamīśvarabindū ca ādāvante namastathā /
bhagavadviṣṇuśabdau ca turyāntau[tu]punaḥ punaḥ

vāntaṃ bhūtalakāyuktamanalaṃ bhāskaraṃ tathā /
dvitīyayā prathamayā kalayā vāyumuddharet

pañcamāntena sahitaṃ rāntaṃ samaṇiyojitam /
pāde ca śikhare caiva namaśca sakalaṃ tathā

lokāya śriyā rāmamanilānalalāntakān /
prathamadvitīyavādyena ṇāntaṃ kāntayakaṃ tathā

rakṣātmajāyāṃ sarvaṃ ca rakṣoghnāyetyanantaram /
tasya saṃdhāya viśvāpi śāṇāntena ve prabhāt

parato viṣatāṃghraśca sahaikādaśakalaṃ tathā /
lāntaṃ nyasenmuniśreṣṭha balavidyoddhṛtiṃ śṛṇu

oṃ padaṃ prathamaṃ kṛtvā vidhāya tacchriyā punaḥ /
vābhraṃ tayādāvante ca namo bhagavate punaḥ

gānādyaṃ tu nādyena vahimānaṃ ca vāyuyuk /
uddharet kṛṣṇavidyāyā saṃśṛṇutaḥ param