Viṣṇusmṛti · Chapter 55

yathāśvamedhaḥ kraturāṭ sarvapāpāpanodakaḥ
tathāghamarṣaṇaṃ sūktaṃ sarvapāpāpanodakam //

prāṇāyāmaṃ dvijaḥ kuryāt sarvapāpāpanuttaye
dahyante sarvapāpāni prāṇāyāmair dvijasya tu //

savyāhṛtiṃ sapraṇavāṃ gāyatrīṃ śirasā saha
triḥ paṭhed āyataprāṇaḥ prāṇāyāmaḥ sa ucyate //

akāraṃ cāpy ukāraṃ ca makāraṃ ca prajāpatiḥ
vedatrayān niraduhad bhūr bhuvaḥ svar itīti ca //

tribhya eva tu vedebhyaḥ pādaṃ pādam adūduhat
tad ity ṛco 'syāḥ sāvitryāḥ parameṣṭhī prajāpatiḥ //

etad akṣaram etāṃ ca japan vyāhṛtipūrvikām
saṃdhyayor vedavid vipro vedapuṇyena yujyate //

sahasrakṛtvas tv abhyasya bahir etat trikaṃ dvijaḥ
mahato 'py enaso māsāt tvacevāhir vimucyate //

etattrayavisaṃyuktaḥ kāle ca kriyayā svayā
viprakṣatriyaviḍjātir garhaṇāṃ yāti sādhuṣu //

oṃkārapūrvikās tisro mahāvyāhṛtayo 'vyayāḥ
tripadā caiva gāyatrī vijñeyā brāhmaṇo mukham //

yo 'dhīte 'hany ahany etāṃ trīṇi varṣāṇy atandritaḥ
sa brahma param abhyeti vāyubhūtaḥ khamūrtimān //

ekākṣaraṃ paraṃ brahma prāṇāyāmāḥ paraṃ tapaḥ
sāvitryās tu paraṃ nānyan maunāt satyaṃ viśiṣyate //

kṣaranti sarvā vaidikyo juhotiyajatikriyāḥ
akṣaraṃ tv akṣaraṃ jñeyaṃ brahmā caiva prajāpatiḥ //

vidhiyajñāj japayajño viśiṣṭo daśabhir guṇaiḥ
upāṃśuḥ syāc chataguṇaḥ sahasro mānasaḥ smṛtaḥ //

ye pākayajñāś catvāro vidhiyajñasamanvitāḥ
te sarve japayajñasya kalāṃ nārhanti ṣoḍaśīm //

japyenaiva tu saṃsidhyed brāhmaṇo nātra saṃśayaḥ
kuryād anyan na vā kuryān maitro brāhmaṇa ucyate //