Viṣṇusmṛti · Chapter 54

pañcagavyaṃ pibec chūdro brāhmaṇas tu surāṃ pibet
ubhau tau narakaṃ yāto mahārauravasaṃjñitam //

japitvā trīṇi sāvitryāḥ sahasrāṇi samāhitaḥ
māsaṃ goṣṭhe payaḥ pītvā mucyate 'satpratigrahāt //

ayājyayājanaṃ kṛtvā pareṣām antyakarma ca
abhicāram ahīnaṃ ca tribhiḥ kṛcchrair vyapohati //

yeṣāṃ dvijānāṃ sāvitrī nānūcyeta yathāvidhi
tāṃś cārayitvā trīn kṛcchrān yathāvidhy upanāyayet //

prāyaścittaṃ cikīrṣanti vikarmasthās tu ye dvijāḥ
brāhmaṇyāc ca parityaktās teṣām apy etad ādiśet //

yad garhitenārjayanti karmaṇā brāhmaṇā dhanam
tasyotsargeṇa śudhyanti japyena tapasā tathā //

vedoditānāṃ nityānāṃ karmaṇāṃ samatikrame
snātakavratalope ca prāyaścittam abhojanam //

avagūrya caret kṛcchram atikṛcchraṃ nipātane
kṛcchrātikṛcchraṃ kurvīta viprasyotpādya śoṇitam //

enasvibhir nirṇiktair nārthaṃ kiṃcit samācaret
kṛtanirṇejanāṃś caitān na jugupseta dharmavit //

bālaghnāṃś ca kṛtaghnāṃś ca viśuddhān api dharmataḥ
śaraṇāgatahantṝṃś ca strīhantṝṃś ca na saṃvaset //

aśītir yasya varṣāṇi bālo vāpy ūnaṣoḍaśaḥ
prāyaścittārdham arhanti striyo rogiṇa eva ca //

anuktaniṣkṛtīnāṃ tu pāpānām apanuttaye
śaktiṃ cāvekṣya pāpaṃ ca prāyaścittaṃ prakalpyet //