વિષ્ણુસ્મૃતિ · અધ્યાય 54

પઞ્ચગવ્યં પિબેચ્ છૂદ્રો બ્રાહ્મણસ્ તુ સુરાં પિબેત્
ઉભૌ તૌ નરકં યાતો મહારૌરવસંજ્ઞિતમ્ ॥

જપિત્વા ત્રીણિ સાવિત્ર્યાઃ સહસ્રાણિ સમાહિતઃ
માસં ગોષ્ઠે પયઃ પીત્વા મુચ્યતે ઽસત્પ્રતિગ્રહાત્ ॥

અયાજ્યયાજનં કૃત્વા પરેષામ્ અન્ત્યકર્મ ચ
અભિચારમ્ અહીનં ચ ત્રિભિઃ કૃચ્છ્રૈર્ વ્યપોહતિ ॥

યેષાં દ્વિજાનાં સાવિત્રી નાનૂચ્યેત યથાવિધિ
તાંશ્ ચારયિત્વા ત્રીન્ કૃચ્છ્રાન્ યથાવિધ્ય્ ઉપનાયયેત્ ॥

પ્રાયશ્ચિત્તં ચિકીર્ષન્તિ વિકર્મસ્થાસ્ તુ યે દ્વિજાઃ
બ્રાહ્મણ્યાચ્ ચ પરિત્યક્તાસ્ તેષામ્ અપ્ય્ એતદ્ આદિશેત્ ॥

યદ્ ગર્હિતેનાર્જયન્તિ કર્મણા બ્રાહ્મણા ધનમ્
તસ્યોત્સર્ગેણ શુધ્યન્તિ જપ્યેન તપસા તથા ॥

વેદોદિતાનાં નિત્યાનાં કર્મણાં સમતિક્રમે
સ્નાતકવ્રતલોપે ચ પ્રાયશ્ચિત્તમ્ અભોજનમ્ ॥

અવગૂર્ય ચરેત્ કૃચ્છ્રમ્ અતિકૃચ્છ્રં નિપાતને
કૃચ્છ્રાતિકૃચ્છ્રં કુર્વીત વિપ્રસ્યોત્પાદ્ય શોણિતમ્ ॥

એનસ્વિભિર્ નિર્ણિક્તૈર્ નાર્થં કિંચિત્ સમાચરેત્
કૃતનિર્ણેજનાંશ્ ચૈતાન્ ન જુગુપ્સેત ધર્મવિત્ ॥

બાલઘ્નાંશ્ ચ કૃતઘ્નાંશ્ ચ વિશુદ્ધાન્ અપિ ધર્મતઃ
શરણાગતહન્તૄંશ્ ચ સ્ત્રીહન્તૄંશ્ ચ ન સંવસેત્ ॥

અશીતિર્ યસ્ય વર્ષાણિ બાલો વાપ્ય્ ઊનષોડશઃ
પ્રાયશ્ચિત્તાર્ધમ્ અર્હન્તિ સ્ત્રિયો રોગિણ એવ ચ ॥

અનુક્તનિષ્કૃતીનાં તુ પાપાનામ્ અપનુત્તયે
શક્તિં ચાવેક્ષ્ય પાપં ચ પ્રાયશ્ચિત્તં પ્રકલ્પ્યેત્ ॥