વિષ્ણુધર્મોત્તરપુરાણમ્ · અધ્યાય 3.181.185

3.181
માર્કણ્ડેય ઉવાચ ॥
મનો મન્તસ્તથા પ્રાણો નરો યાનશ્ચ વીર્યવાન્ ॥
ચિતિર્હયો નયશ્ચૈવ હંસો નારાયણસ્તથા

વિભુશ્ચાપિ પ્રભુશ્ચૈવ સાધ્યા દ્વાદશ કીર્તિતાઃ ॥
પૂજયેચ્છુક્લલપક્ષે તાન્દ્વાદશ્યાં માર્ગશીર્ષતઃ

કૃત્વા વ્રતં વત્સરમેતદિષ્ટં પ્રાપ્નોતિ તેષાં તુ સલોકમેવ ॥
તત્રોષ્ય કાલં સુચિરં નરેન્દ્ર રાજા ભવેદ્બાહ્મણપુઙ્ગવો વા

ઇતિ શ્રીવિષ્ણુ૦ધ૦ તૃતીયખણ્ડે મા૦વ૦સં૦ સાધ્યવ્રતવર્ણનો નામૈકાશીત્યુત્તર શતતમોઽધ્યાયઃ

3.182
માર્કણ્ડેય ઉવાચ ॥
ધાતા મિત્રોર્યમા પૂષા શક્રેશો વરુણો ભગઃ ॥
ત્વષ્ટા વિવસ્વાન્સવિતા વિષ્ણુર્દ્વાદશકસ્તથા

પૂજયેદ્દ્વાદશાદિત્યાઞ્છુક્લપક્ષે હ્યુપોષિતઃ ॥
માર્ગશીર્ષાદથારભ્ય ગન્ધમાલ્યાન્નસમ્પદા

દત્ત્વા વ્રતાન્તે પુરુષઃ સુવર્ણમાપ્નોતિ લોકાન્સવિતુર્નૃવીર ॥
માનુષ્યમાસાદ્ય ભવત્યરોગો જિતેન્દ્રિયશ્ચૈવ ધનાન્વિતશ્ચ

ઇતિ શ્રીવિષ્ણુધર્મોત્તરે તૃતીયખણ્ડે માર્કણ્ડેયવજ્રસંવાદે કામદેવ વ્રતવર્ણનો નામ દ્વ્યશીત્યુત્તરશતતમોઽધ્યાયઃ

3.183
માર્કણ્ડેય ઉવાચ ॥
શુક્લપક્ષે મહારાજ ત્રયોદશ્યામુપોષિતઃ ॥
પૂજયેત્કામદેવન્તુ વૈશાખાત્પ્રભૃતિ પ્રભો

ગન્ધમાલ્યનમસ્કારધૂપદીપાન્નસમ્પદા ॥
દદ્યાદ્વ્રતાન્તે વિપ્રાય ગન્ધવસ્ત્રયુગં તથા

કૃત્વા વ્રતં વત્સરમેતદિષ્ટમાસાદ્ય લોકં સુચિરં મનુષ્યઃ ॥
માનુષ્યમાસાદ્ય ભવત્યરોગો સુખાન્વિતો રૂપસરૂપતા ચ

ઇતિ શ્રી વિ૦ધ૦ તુ૦ખ૦ મા૦વ૦સં૦ કામદેવવ્રતવર્ણનો નામ ત્ર્યશીત્યુત્તરશતતમોધ્યાયઃ

3.184
માર્કણ્ડેય ઉવાચ ॥
શુક્લપક્ષે મહારાજ ત્રયોદશ્યામુપોષિતઃ ॥
ફાલ્ગુનાત્તુ સમારભ્ય નિત્યં સંપૂજયેન્નરઃ

ગન્ધમાલ્યનમસ્કારધૂપદીપાન્નસમ્પદા ॥
સુવર્ણં બ્રાહ્મણેન્દ્રાય વ્રતાન્તે પ્રતિપાદયેત્

કૃત્વા વ્રતં વત્સરમેતદિષ્ટં યક્ષેષુ રાજન્સુચિરં તથોષ્ય ॥
માનુષ્યમાસાદ્ય ધનાન્વિતઃ સ્યાત્સૌભાગ્યયુક્તશ્ચ તથા વિરોગઃ

ઇતિ શ્રીવિષ્ણુધર્મોત્તરે તૃતીયખણ્ડે માર્કણ્ડેયવજ્રસંવાદે ધનવ્રતવર્ણનો નામ ચતુરશીત્યુત્તરશતતમોઽધ્યાયઃ

3.185
શુક્લપક્ષચતુર્દશ્યાં જ્યેષ્ઠા દારભ્ય યાદવ॥
વાયું સંપૂજયેદ્દેવં સોપવાસો જિતેન્દ્રિયઃ

ગન્ધમાલ્યનમસ્કારધૂપદીપાન્નસંપદા॥
સંવત્સરાન્તે દાતવ્યં વસ્ત્રયુગ્મં દ્વિજાતયે

કૃત્વા વ્રતં વત્સરમેતદિષ્ટં ચાસાદ્ય લોકં મરુતાં મનુષ્યઃ ।
સુખાનિ ભુક્ત્વા સુચિરં મહીપ માનુષ્યમાસાદ્ય ભવત્યરોગઃ

ઇતિ શ્રીવિષ્ણુધર્મોત્તરે તૃતીયખણ્ડે માર્કણ્ડેયવજ્રસંવાદે વાયુવ્રતવર્ણનો નામ પઞ્ચાશીત્યુત્તરાશીતિતમોઽધ્યાયઃ