વિષ્ણુધર્મોત્તરપુરાણમ્ · અધ્યાય 3.176.180

3.176
માર્કણ્ડેય ઉવાચ ॥
ક્રતુર્દક્ષો રિપુઃ સત્યઃ કાલકામૌ ધ્વનિસ્તથા ॥
કુલવાન્મનુજો વિશ્વો રોચમાનશ્ચ તે દશ

વિશ્વેદેવા સમાખ્યાતા દશાત્મા કેશવો વિભુઃ ॥
તસ્ય સંપૂજનં કાર્યં સિતપક્ષે નરાધિપ

આરભ્ય કાર્તિકાન્માસાદ્દશમ્યાં નૃપપુઙ્ગવ ॥
મણ્ડલેષુ ચ મુખ્યેષુ યદિ વાર્ચાસુ યાદવ

ગન્ધમાલ્યનમસ્કારધૂપદીપાન્નસંપદા ॥
વ્રતાન્તે કનકં દદ્યાદ્યથાશક્તિ દ્વિજાતયે

કૃત્વા વ્રતં વત્સરમેતદિષ્ટં પ્રાપ્નોતિ તેષાં સુચિરં ચ લોકાન્ ॥
તત્રોષ્ય લોકે પુરુષત્વમેત્ય રાજા ભવેદ્બ્રાહ્મણપુઙ્ગવો વા

ઇતિ શ્રીવિષ્ણુધર્મોત્તરે તૃતીયખણ્ડે માર્કણ્ડેયવજ્રસંવાદે વિશ્વેદેવદશમીપૂજાવર્ણનો નામ ષટ્સપ્તત્યુત્તરશતતમોઽધ્યાયઃ

3.177
માર્કણ્ડેય ઉવાચ॥
આત્મા હ્યાયુર્મનો દક્ષો મદઃ પ્રાણસ્તથૈવ ચ ॥
હવિષ્માંશ્ચ ગતીષ્ટશ્ચ ઋતઃ સત્યશ્ચ તે દશ

દેવસ્ત્વઙ્ગિરસો નામ દશમ્યાં પૂજયેન્નરઃ॥
સોપવાસઃ કૃષ્ણપક્ષે પૂર્વોક્તવિધિના નરઃ

કૃત્વા વ્રતં વત્સરમેતદિષ્ટાન્પ્રાપ્નોતિ તેષાં સુચિરં ચ લોકાન્ ॥
તત્રોષ્ય લોકે પુરુષત્વમેત્ય રાજા ભવેદ્બ્રાહ્મણ પુઙ્ગવો વા

ઇતિ શ્રીવિષ્ણુધર્મોત્તરે તૃતીયખણ્ડે મા૦ વજ્રસંવાદે અઙ્ગિરાવ્રતવર્ણનો નામ સપ્તસપ્તત્યુત્તરશતતમોઽધ્યાયઃ

3.178
માર્કણ્ડેય ઉવાચ ॥
શુક્લપક્ષે દશમ્યાં તુ સોપવાસસ્તથા નરઃ ॥
માર્ગશીર્ષાદથારભ્ય નિત્યમેતદરિન્દમ

ગન્ધમાલ્યનમસ્કારધૂપદીપાન્નસંપદા ॥
ઘૃતેન જુહુયાદ્વહ્નિં બ્રાહ્મણાઁશ્ચાત્ર ચ પૂજયેત્॥૨।
વ્રતાવસાને દદ્યાચ્ચ તથા ધેનું પયસ્વિનીમ્॥
વ્રતમેતદ્વિનિર્દિષ્ટમશ્વમેધફલપ્રદમ્

કૃષ્ણપક્ષે તથાપ્યેતત્કૃત્વા સંવત્સરં વ્રતમ્॥
રાજસૂયમવાપ્નોતિ ફલમુદ્ધરતિ સ્વકમ્

કૃત્વા પક્ષદ્વયેપ્યેતદ્વ્રતં મનુજસત્તમ॥
રાજસૂયાશ્વમેધાનાં ફલં પ્રાપ્નોત્યસંશયમ્।૫।
સ્વર્ગલોકમવાપ્નોતિ કુલમુદ્ધરતિ સ્વકમ્॥
ધર્મે મતિર્ભવેત્તસ્ય ધર્મમાપ્નોત્યસંશયમ્।૬॥
યત્રયત્રાભિજાયેત તત્ર ધર્મપરો ભવેત્॥
પ્રધાનં તં તયા રાજન્યત્ર ધર્મપરો ભવેત્

આરોગ્યમાયુષ્યકરં યશસ્યં સ્થાનપ્રદં પાપવિનાશકારિ ॥
કર્તવ્યમેતત્પુરુષૈર્યથાવત્પૂજ્યો હિ વિષ્ણુર્ભગવાન્સધર્મઃ

ઇતિ શ્રીવિષ્ણુધર્મોત્તરે તૃતીયખણ્ડે માર્કણ્ડેયવજ્રસંવાદે ધર્મવ્રતવર્ણનો નામાષ્ટસપ્તત્યુત્તરશતતમોઽધ્યાયઃ

3.179
માર્કણ્ડેય ઉવાચ ॥ અઙ્ગારકં તથા સૂર્યં નિરૃતિં વાદ્યશસ્તથા ॥
હવનં ચેશ્વરં મૃત્યું કપાલિમથ કિંકિણમ્

તત્ર ચૈકાદશાંશૈસ્તુ દેવાંસ્ત્રિભુવનેશ્વરાન્ ॥
એકાદશ્યાં સોપવાસઃ સોમં સંપૂજયેત્તથા

ગન્ધમાલ્યનમસ્કારધૂપદીપાન્નસમ્પદા ॥
માર્ગશીર્ષાદથારભ્ય યાવત્સંવત્સરં ભવેત્

સંવત્સરાન્તે દદ્યાચ્ચ તથા ધેનું પયસ્વિનીમ્ ॥
કૃત્વા વ્રતં વત્સરમેતદિષ્ટં ભદ્રત્વમાપ્નોતિ નરસ્તુ રાજન્ ॥
રુદ્રેણ સાર્ધ સુચિરં રમિત્વા કામાનવાપ્યાથ મનોભિરામાન્

ઇતિ શ્રીવિષ્ણુધર્મોત્તરે તૃ૦ ખ૦ મા૦વ૦સં૦ રુદ્રવ્રતવર્ણનો નામૈકોનાશીત્યુત્તરશતતમોઽધ્યાયઃ

3.180
માર્કણ્ડેય ઉવાચ ॥
ભુવનો ભાનવશ્ચૈવ સુજન્યઃ સુજનસ્તથા ॥
ક્રતુઃ સર્વશ્ચ મૂર્ધા ચ ત્યાજશ્ચ વ્યમ્નકસ્તથા

પ્રસવશ્ચાપ્યયશ્ચૈવ દક્ષો દ્વાદશકસ્તથા ॥
ભૃગવો નામ નિર્દિષ્ટા દેવા દ્વાદશ યાજ્ઞિયાઃ

તેષાં સમ્પૂજનં કુર્યાદ્દ્વાદશ્યાં નિત્યમેવ તુ ॥
માર્ગશીર્ષાદથારભ્ય કૃષ્ણપક્ષે સદૈવ તુ

ગન્ધમાલ્યનમસ્કારધૂપદીપાન્નસમ્પદા ॥
સંવત્સરાન્તે દદ્યાચ્ચ બ્રાહ્મણાય પયસ્વિનીમ્

કૃત્વા વ્રતં વત્સરમેતદિષ્ટં પ્રાપ્નોતિ તેષાં ચ સલોકમેવ ॥
તત્રોષ્ય કાલં સુચિરં મનુષ્યો રાજા ભવેદ્વા દ્વિજપુઙ્ગવો વા

ઇતિ શ્રીવિષ્ણુધર્મોત્તરે તૃતીયખણ્ડે મા૦ વ૦ સં૦ ભૃગુવ્રતવર્ણનો નામાશીત્યુત્તરશતતમોઽધ્યાયઃ ।