Vishnudharmottara Purana · Chapter 2.181.183

2.181
puṣkara uvāca //
jitahasto jitamatirjitadṛglakṣyasādhaka //
niyatāṃ siddhimāsādya tato vāhanamāruhet

eṣa tatraiva ca vidhiḥ kārtsyena parikīrtitaḥ //
adhikaṃ bhramatastasya bhāge grahaṇameva ca

eteṣāṃ caiva yogānāṃ vidhiryastryaiṣukasya ca //
vāhāśritasya vakṣyāmi saviśeṣeṇa lakṣaṇam

pāśāsiyaṣṭidaṇḍānāṃ vidhiryaḥ pariniṣṭhitaḥ //
kṣepa eva yathānyāyaṃ tasya vakṣyāmi yā kriyā

daśahasto bhavetpāśo vṛtaḥ karamukhastathā //
śaṇakārpāsapuñjānāṃ bhagna snāyvasthicarmaṇām

anyeṣāṃ sudṛḍhānāṃ ca sukṛtaṃ pariveṣṭitam //
trayastriṃśatsamaṃ cāpaṃ budhaḥ kuryātsuvartitam

kartavyā śibikaistasya sthānaṃ kakṣyāsu vai tadā //
vāmahastena saṃgṛhya dakṣiṇenoddharettu saḥ

kuṇḍalasyākṛtiṃ kṛtvā grāmaikaṃ mastakopari //
kṣipettṛṇamaye tūrṇaṃ puruṣe carmaveṣṭite

calite ca plutaṃ caiva tathā prajaviteṣu ca //
samāyogavidhiṃ jñātvā prayuñjīta suśikṣitaḥ

vijitya tu yathānyāyaṃ tato bandhaṃ samācaret //
kaṭyāṃ baddhvā tataḥ khaḍgaṃ vāmapārśvāvalambinam

dṛḍhaṃ vigṛhya vāmena vikarme dakṣiṇena tu //
ṣaḍaṅgulaparīṇāhaṃ samahastaṃ samucchritam

ayomayaśalākāśca carmāṇi vividhāni ca //
apahastaṃ samaṃ caiva tiryagūrddhvahataṃ tathā

śodhayedvidhinā yena tathā me gadataḥ śṛṇu //
tārṇaṃ carmāvanaddhāṅgaṃ sthāpayitvā naraṃ dṛḍham

kareṇādāya laguḍaṃ dakṣiṇāṅguṣṭhakānnaraḥ //
udyamya ghātayedyasya nāmnastaṃ śiraso dṛḍham //
ubhābhyāmapi hastābhyāṃ kuryāttasya nipātanam

bimboyaṃ vidhi sahito hitaḥ sumuktiḥ śiṣyāṇāṃ hitamatikurvatā mayā te //
vāhānāṃ śramaraṇapradhāraṇārthaṃ yogyārhaṃ prathamataraṃ budhena vadhyam

iti śrīviṣṇudhamottare dvitīyakhaṇḍe mārkaṇḍeyavajrasaṃvāde rāmaṃ prati puṣkaropākhyāne dhanurvedavidyākathano nāmaikāśītyuttaraśatatamo'dhyāyaḥ

2.182
puṣkara uvāca //
bhrāntamudbhrāntamāviddhamāplutaṃ niḥsṛtaṃ sṛtam //
saṃpātaṃ samudīrṇaṃ ca senāpātamanākulam

udghātamavadhṛtaṃ ca savyadakṣiṇameva ca //
anālakṣiravisphoṭo karālendramahāmukhau

vikarālavipātau ca vibhīṣaṇabhayaṅkarau //
samagrāṃ vā tṛtīyāṃ vā pādapādāvajārijāḥ

pratyālīḍhamanālīḍhaṃ varāhalulitaṃ tathā //
iti dvātriṃśadhā jñeyā khaḍgāścarmavidhāraṇāḥ

ṛjvāyataviśālaṃ ca tiryaṅnamitameva ca //
pañcakarma vinirdiṣṭaṃ vyastre prāsaṃ mahātmabhiḥ

chedanaṃ tarjanaṃ pāto bhramaṇaṃ bhrāmaṇaṃ tathā //
vikartanaṃ kartanaṃ ca cakrabhramaṇameva ca

āsphoṭakṣveḍanaṃ bhedastrāsollāsitakau tathā //
śūlakarmāṇi jānīhi ṣaṣṭhamāghrātasaṃjñakam

dṛṣṭighātaṃ bhujāghātaṃ pārśvaghātaṃ ca bhārgava //
ṛjvāvakṣopamāghātaṃ tomarasya prakīrtitam

saṃhatāvitataṃ vāmaṃ gomūtraṃ kamalāvilam //
tato'rdhabhāganamitaṃ vāmadakṣiṇameva ca

vyāvṛttaṃ ca parāvṛttaṃ pādoddhūtamaviplutam //
haṃsamārgavimārge ca gadākarma prakīrtitam

karālamaṭhapātaṃ ca daśopaplavameva ca //
kṣiptaṃ hastasthitaṃ śūnyaṃ paraśostu vinirdiśet

tāḍanaṃ chedanaṃ rāma tathā cūrṇanameva ca //
mudgarasya tu karmāṇi laguḍasya ca tānyapi

antyamadhyaṃ parāvṛttaṃ nideśārddhaṃ tathaiva ca //
vajrasyaitāni karmāṇi paṭṭiśasya tathaiva hi

haraṇaṃ chedanaṃ ghāto bhedanaṃ rakṣaṇaṃ tathā //
kṛpāṇīkarma nirdiṣṭaṃ pātanaṃ sphoṭanaṃ tathā

trāsanaṃ rakṣaṇaṃ ghātaṃ taloddharaṇamāyatam //
kṣepaṇīkarma nirdiṣṭaṃ yantrakarmaitadeva tu

santyāgamaṅgamardañca varāhoddhūtakaṃ tathā //
hastārdhahastapālīnamekahastārdhahastakam

dvihastabāhupāśe ca koṭirecitakoddhate //
uro lalāṭaghāte ca bhujādivasanaṃ tathā

karoddhatavimārgaṃ ca pādāhati vipādakam //
gātrasaṃśleṣaṇaṃ kāntaṃ tathā govidhiparyayam

ūrdhvaprahāraṃ ghātaṃ ca gomūtraṃ savyadakṣiṇam //
pādasañcārakaṃ gaṇḍaṃ kabarībandhabhākulam

tiryaggatamapāmārgaṃ bhīmavegaṃ sudarśanam //
siṃhakrāntaṃ gajakrātaṃ vṛṣabhākrāntameva va

gadākarma vijānīyāddhanurvedaviśāradaḥ //
ākarṣaṇaṃ vikarṣaṃ ca bāhunāmanameva ca

grīvāviparivartaṃ ca pṛṣṭhabhaṅgaṃ sudāruṇam //
parṇāsanaṃ viparyāsaḥ paśupāramajāvikam

pādaprahāramāsphoṭaṃ kavirecitakaṃ tathā //
gātraśleṣaṃ kaṇṭhagataṃ mahītyājanameva ca

urolalāṭaghātaṃ ca vispaṣṭakaraṇaṃ tathā //
uddhūtamavadhūtaṃ ca tiryagmārgagataṃ tathā

gajaskandhamavakṣepamavāṅmukhakameva ca //
devamārgamadhomārgamamārgagamanākulama

muṣṭivātamavakṣepo vasudhādāraṇaṃ tathā //
jānubandhaṃ bhujābandhaṃ ūrubandhaṃ sudāruṇam

saṃsṛṣṭaṃ sodaraṃ śubhraṃ bhujāvellitameva ca //
niyuddhakarma jānīyānniyuddhakuśalo janaḥ

pradhānakarmāṇi taveritāni nyastapradhāne puruṣapravīra //
nāmāni rūpāṇi bhavanti tāni jñeyāni sarvāṇi yathānurūpam /

iti śrīvirpṇudharmottare dvitīyakhaṇḍe mārkaṇḍeyavajrasaṃvāde rāmaṃ prati puṣkaropākhyāne dhanurvedavidyāvarṇano nāma dvyaśītyuttaraśatatamo'dhyāyaḥ

2.183
// puṣkara uvāca //
sannaddhaiścarmibhirbhāvyaṃ tathā baddhakṛpāṇibhiḥ //
carmāṇi tatra vaiyāghramāhiṣāṇyṛṣabhāṇi ca

kheṭakādyatha vā rāma carmāṇi prabhavanti tu //
tathā varaṇamukhyāni khaḍgāni vividhāni ca

baddhādibhiḥ satūṇīraistathā rāma satomaraiḥ //
baddhagodhāṅgulitrāṇairbaddhādarśairvibhīṣaṇaiḥ

tathā paraśvadhopetai rāma svāsanayodhibhiḥ

gadādharāstathaivātra sakṛtpāṇiparicchadāḥ //
susaṃnaddhā sumanaso bhaveyurvipulaujasaḥ

yatra yasya viśeṣeṇa śastrāstrairvātakauśalam //
tadeva tasya nirdiṣṭaṃ yathāvanmanujottama

sakhalīnāḥ saparyāṇāstathā sāstaraṇā hayāḥ //
kāryāḥ sakavacā yuddhe cāmarāpīḍadhāriṇaḥ

aśvī bhavetsusannaddho raśmipragrahakovidaḥ //
tathā sāvaraṇo rāma sakṛpāṇī paricchadaḥ

baddhāsirbaddhajīvaśca turagārūḍhapiṇḍakaḥ //
sasuprāso bhavedrāma nānāyudhadharastathā

rathaḥ kāryastathā yuktaḥ īṣādaṇḍakabandhuraiḥ //
sucakropaskarayutaḥ sarvarūpaḥ patākarāṭ

triveṇusaṃtataścaiva vaiyāghraparivāraṇaḥ //
kiṃkiṇījālanirghoṣastathā vai supratiṣṭhitaḥ

upāsaṅgairniṣaṅgaiśca tūṇīrairvarakārmukaiḥ //
sarvāyudhairupetaśca tathā vṛkṣādanīyutaḥ

toyajīrakapiṇḍībhiryuktaḥ śṛṅgaistathaiva ca //
sannaddhaḥ sārathistatra bhavedrāma pratodavān

raśmigrahaṇaviccāpi tathā maṇḍalakovidaḥ //
tathāśvahṛdayajñaśca dūradṛṣṭiḥ suyantritaḥ

svāsanaḥ kālaviccaiva baddhāsiḥ pāśasaṃyutaḥ //
pārṣṇiḥ syādāyudhajñasya tathaivāyudhakovidaḥ

cireṇa mūle yasya syādavasthānaṃ mahābhujaḥ //
patākāvaraṇaṃ yasya āyudhānāṃ samarpaṇam

samāyāntaṃ mahābhāgaṃ tathā sārathirakṣaṇama //
syātāṃ dhanurdharau tatra tathā ca rathināvubhau

yodhau dhanurbhṛtāṃ śreṣṭha sarvāyudhaviśāradau //
turagāśca susaṃnaddhā dāntāḥ kāryāstathā rathe //

tulyavegabalāścaiva tathā laghuparicchadāḥ //
ataḥ paraṃ pravakṣyāmi tava nāgendrakalpanam

kuñjaraḥ syātsusannaddhaḥ saparyāṇaḥ kuthā vṛtaḥ //
sarvāyudhadharaścaiva tathā yodhā varāyudhāḥ

paraśvadhakarāścaiva toyajīrakasaṃyutāḥ //
samyagvibhājyāśca tathā śṛṅkhalāvatatāstathā

patākā ca tathā kāryā kuñjarasya suśobhanā //
varāṅkuśadharau tatra syātāṃ manujapuṅgavau

ekaḥ pṛṣṭhasthitastatra dvitīyaḥ skandhago bhavet //
yodhau dvau varadhānuṣkau dvau ca khaḍgadharau darau

tayoranubhavetāṃ vai tathā rakṣāparāyaṇau //
ekaḥ pārṣṇisthitastatra varaśaktipatākadhṛk

pālayejjaghanaṃ yadvatkuñjarasya mahāmate //
evaṃ parasparāyattā rakṣā teṣāṃ yathā bhavet

mahāmātrasya dharmajña tathā ca gajayodhinaḥ //
evameva tathā rakṣyo rathinaḥ sa rathī bhavet

kuñjarasya tu rakṣārthaṃ bhavedrathacatuṣṭayam //
ratherathe gaje vāpi turagāṇāṃ trayaṃ bhavet

dhānuṣkāṇāṃ trayaṃ proktaṃ rakṣārthaṃ turagasya ca //
dhanvino rakṣaṇārthāya varmiṇo'pi niyojayet

kāryaṃ sarvaṃ susaṃbādhaṃ tathā toraṇarakṣaṇam //
yojanā ca tathā kāryā yathā tu syāddhṛtikramaḥ

saṃbādhaśca tathā rāma na bhavecca parasparam

nāgendrakalpaṃ tava sarvayuktaṃ saṃkṣepato bhārgavavaṃśa mukhya//
etattu kṛtvāpi naraḥ sayuddhe jayatyavaśyaṃ samupārjane ca

iti śrīviṣṇumahāpurāṇe dvitīyabhāge śrīviṣṇudharmottare dvitīyakhaṇḍe mārkaṇḍeyavajrasaṃvāde rāmaṃ prati puṣkaropākhyāne dhanurvede vāhanasajjīkaraṇo nāma tryaśītyuttaraśatatamo'dhyāyaḥ

//
samāpto'yaṃ viṣṇudharmottaradvitīyakhaṇḍaḥ /