Vishnudharmottara Purana · Chapter 2.101.105

2.101
rāma uvāca //
snānamanyatsamācakṣva bhagavanpuṣṭikārakam //
yena nityaṃ kṛteneha puruṣaḥ puṣṭimāpnuyāt

puṣkara uvāca //
śravaṇarkṣamanuprāpte devadeve nirākare/
bhaktyā samācaretsnānaṃ nadīdvitayasaṅgame

nimnagāyāṃ sarasi yā nadīsāgarasaṅgame //
snātaḥ saṃpūjayeddevaṃ viṣṇuṃ mālyānulepanaiḥ

dhūpadīpanamaskāraistathā caivānnasampadā //
śālyannaṃ dadhisaṃyuktaṃ viṣṇave vinivedayet

pauruṣeṇa ca sūktena pāyasaṃ juhuyāttataḥ //
rajataṃ dakṣiṇāṃ dadyādbrāhmaṇāya bhṛgūttama //
upavāsa vināpyetatsnānaṃ puṣṭipradaṃ param

snātaḥ samāpnoti sadā manuṣyaḥ kāmānabhīṣṭāñchravaṇarkṣayoge //
pāpaṃ samastaṃ vijahāti rāma dharmaṃ samāpnoti yaśaśca mukhyam

iti śrīviṣṇudharmottare dvitīyakhaṇḍe mā०saṃ० rāmaṃ prati puṣkaropākhyāne puṣṭikāraka śravaṇasnānakathanannāmaikottaraśatatamo'dhyāyaḥ

2.102
puṣkara uvāca //
janmanakṣatrage some sarvauṣadhisamanvitam //
kumbhaṃ supūjitaṃ kṛtvā snapanaṃ tena kārayet

snātaścaivārcayeddevaṃ vāsudevaṃ jagatpatim //
nakṣatradaivataṃ candraṃ nakṣatraṃ vāruṇaṃ tathā

vāyuṃ cāyudhapīṭhādyaṃ chatraṃ saṃpūjayettathā //
yathoktadevatāliṅgairmantraiśca juhuyādghṛtam

/
śaktyā ca dakṣiṇā deyā brāhmaṇebhyo bhṛgūttama //
tatonuliptaḥ surabhiḥ sragvī vividhabhūṣaṇaḥ

tiṣṭhanmanujaśārdūla haviṣyāśī jitendriyaḥ ///
upavāsaṃ vināpyetatpavitraṃ pāpanāśam

mātṛsthāne tu jagatāṃ janmatārā vidhīyate //
candrarūpī ca bhagavānpitā viṣṇuḥ prakīrtitaḥ

]
tasmātsarvaprayatnena yamanakṣatrasaṃsthitam //
bhaktyā taṃ pūjayeccandraṃ janmarkṣaṃ ca viśeṣataḥ

pūjāṃ sadā candramasastu kṛtvā janmarkṣasaṃsthasya bhṛgupradhāna //
kāmānavāpnoti narastu sarvānsukhī sadā syādbhuvi naṣṭapāpmā

iti śrīviṣṇudharmottare dvitīyakhaṇḍe mā०sa० rāmaṃ prati puṣkaropākhyāne janmarkṣasnānavarṇanannāma dvyuttaraśatatamo'dhyāyaḥ

2.103
puṣkara uvāca //
candramaṃḍalavṛddhau tu tathā caivottarāyaṇe //
śubhe divasanakṣatre muhūrte ca tathā śubhe

tiṣyāśvinagate candre hastaśravaṇage'pi ca //
prācīṃ vāpyathavodīcīṃ niṣkramya nagarāddiśam

vāstuvidyāvinirdiṣṭe bhūmibhāge manohare //
aṣṭahastaṃ śubhaṃ kuryāccaturasraṃ ca maṇḍalam

balyarthamaparaṃ kuryādvahnivedyarthameva ca //
gomaye nopalipte tu sudhālekhāsamanvite

dhvajātapatravyajanamālyadāmakuśākṣataiḥ //
lājāgandhādibhirmukhyairmaṅgalyaistaṃ samarcayet

lājālājopakaraṇaistathaiva ca vibhūṣayet //
tataḥ prasravaṇebhyastu caturbhyastu ghaṭānnavān

pratyekaṃ kalpayedvidvānkalpite maṇḍaladvaye //
sūktiṣvatha mahābhāga bījamātrasamanvitān

tatastu kalpayetkumbhānsaptamukhyānnadījalaiḥ //
sarvauṣadhiyutaḥ kāryaḥ kumbha eko dvijanmanā

sarvabījayuto dhānyaratnopetastathā paraḥ //
tathā caivāparaṃ yuktaṃ kāryaṃ vṛkṣāgrapallavaiḥ

puṣpaiścaivāparaṃ yuktaṃ phalaiścaivāparaṃ tathā //
sarvagandhayutaṃ cānyaṃ sarvāneva samarcayet

pūrvamantreṇa ca tathā sarvānevābhimantrayet //
tato bhadrāsanaṃ dattvā tatra carmāstared budhaḥ

viprasya snātukāmasya sauramārṣabhakaṃ śubham //
kṣattriyasya tathā saiṃhaṃ vaiyāghraṃ ca tathā viśaḥ

dvīpicarma ca vaiśyasya snāpyastatropaveśayet //
praśastalakṣaṇāṃ bhāryāṃ vāmabhāge tathaiva ca

upoṣitaḥ śiraḥ snātaḥ siddhārthaiḥ kaṅkataṃ vinā //
snāpayedbrāhmaṇo vidvānbahubhirbrāhmaṇaiḥ saha

śaṅkhapuṇyāhaghoṣeṇa vīṇāveṇuraveṇa ca //
jayaśabdena mahatā bandināṃ nisvanena ca

sauvarṇaṃ ca śatacchidraṃ pātraṃ śirasi dhārayet //
tatra dadyādghaṭaistoyaṃ krameṇānena śāstravit

yā auṣadhaya ityeṣa mantraḥ syādauṣadhīghaṭe //
ābrahman brahmaṇetyeṣa bījakumbhe prakīrtitaḥ

āśuḥ śiśāna iti ca tathā ratnaghaṭe bhavet //
mantraḥ puṣpavatītyeṣa puṣpakumbhe prakīrtitaḥ

eṣa eva tathā mantraḥ phalakumbhe prakīrtitaḥ //
gandhadvāreṇa ca tathā gandhakumbhe vidhīyate

evaṃ snātaḥ parīdhāya suśukle vāsasī śubhe //
maṅgalyāni spṛśedrāma saṃpaśyedvadanaṃ ghṛte

vimale ca tathādarśe tataḥ saṃpūjayeddharim //
vaiṣṇavāṃśca tathā mantrāñjuhuyājjātavedasi

tatastūttaradigbhāge vahniṃ tasyopakalpayeta //
bhadrāsanaṃ śubhe deśe yuktaṃ pūrvoktacarmaṇā

śvetānulepanaḥ sragvī maṅgalyābharaṇastathā //
niviśetāsane tasminsabhāryo bhṛgunandana

gandhadvāretimantreṇa tasya rocanayā tataḥ //
kaṇṭhe mūrdhni tataḥ kuryāttilakaṃ brāhmaṇaḥ svayam

yena devā jyotiṣeti darbhārgrairbrāhmaṇastataḥ //
pādatastu prabhṛtyenaṃ sarvāṅgeṣu pramārjayet

gurave dakṣiṇāṃ dadyādbrāhmaṇebhyaśca śaktitaḥ //
gandharatnājyamālyāni kanakaṃ rajataṃ tathā

śatacchidraṃ ca tatpātraṃ gurave vinivedayet //
maṅgalālambhanaṃ kṛtvā gatapāpo dvijāśiṣā

śaṅkhapuṇyāhaghoṣeṇa praviśecca gṛhaṃ svakam //
vināpi bhāryayā rāma snānaṃ kāryamidaṃ tathā

saptarātramidaṃ snānaṃ sarvakalmaṣanāśanam //
madhu māṃsaṃ tathā kṣaudraṃ maithunaṃ ca vivarjayet

alakṣmīśamanaṃ puṇyaṃ rakṣoghnaṃ buddhivardhanam //
ārogyadaṃ dīptikaraṃ yaśasyaṃ śatrusūdanam

maṅgalyaṃ pāpaśamanaṃ kalidusvapnanāśanam //
bṛhaspatiridaṃ cakre snānaṃ maghavataḥ svayam //
brahmahatyābhibhūtasya vṛtte vṛtravadhe purā

tato'sya dattaḥ svayameva vajriṇā varo nṛlokepi varo'sya kārakaḥ //
kāmānabhīṣṭānsamavāpya pūjito mahendralokaṃ sa sukhī prayāsyati

iti śrīviṣṇudharmottare dvitīyakhaṇḍe mā० saṃ० rāmaṃ prati puṣkaropākhyāne bārhaspatyasnānavarṇanannāma tryuttaraśatatamo'dhyāyaḥ

//
2.104
rāma uvāca //
snānamanyatsamācakṣva bhagavanduritāpaham //
sakṛdeva kṛtaṃ yattu pāpebhyo vipramocayet

puṣkara uvāca //
rājayakṣmābhibhūteṣu viṣamajvariteṣu ca //
chāyonmādopatapteṣu viṣamajvariteṣu ca

vināyakagrahārtteṣu mūḍhacitteṣvatīva hi //
yeṣāṃ na sidhyate vidyā sasyaṃ yeṣāṃ na rohati

sīdedyasya kuṭumbaṃ ca paṇyaṃ nāyāti vikrayam //
na labhettu jayaṃ yuddhe balavānapi yo naraḥ

yuktānyapi ca kāryāṇi vipadyante punaḥpunaḥ //
kalahaśca bhavedyeṣāṃ suhṛtsvajanabāndhavaiḥ//

garbhaḥ prasravate yasyā jāto vāpi vinaśyati //
puṣpaṃ yasyāḥ kṣayaṃ yāti na ca kiñcitprajāyate

gṛhṇāti yā na bījaṃ ca janayedvāpyamānuṣān //
nāpnoti ca patiṃ kanyā tasmātsnehamathāpi vā

saubhāgyaṃ ca na cāyāti suhṛtsvajanabandhuṣu //
evamukteṣu cānyeṣu tvanukteṣu ca bhārgava

prasamīkṣya vidhānajñaḥ snānametatsamācaret //
snāpayetsaritastīre grahāviṣṭānvicakṣaṇaḥ

rājayakṣmābhibhūtā ye viṣama jvaritāśca ye //
teṣāṃ devālaye snānaṃ kuryādvā siddhasevite

chāyonmādopataptā ye ye cāpasmāraśoṣiṇaḥ //
teṣāṃ munigaṇāvāse tīrthe vā snānamiṣyate

vināyakagrahārtā ye ye ca mūḍhā vicetasaḥ //
sajjanācarite deśe teṣāṃ snānaṃ vidhīyate

traividyā yena sidhyanti guṇā yeṣāṃ prapūjitāḥ //
teṣāṃ snānamihoddiṣṭaṃ siddhadevasya mandire

yeṣāṃ nāsti jayo yuddhe yeṣāṃ svajanasaṃkṣayaḥ //
kāntāre vā vane tīrthe teṣāṃ snānaṃ praśasyate

satataṃ kalaho yeṣāṃ jāyate ca yatastataḥ //
tripathe vā taḍāge vā snānaṃ teṣāṃ prakalpayet

padminyāṃ snapayennārīṃ garbho yasyāḥ sravettathā //
aśokasannidhau snāpyā jāto yasyāḥ vinaśyati

na ca gṛhṇāti yā śukraṃ snāpyā sā saphale tarau //
mahodadhitaṭe snāpyā yadāpatyaṃ vinaśyati

amānuṣānyā janayetsnāpayettāṃ catuṣpathe //
yādṛśaṃ yā ca bhartāraṃ na labheta varāṅganā

snāpayedekaliṅge tāṃ sthāne vā vṛkṣasaṃkule //
rūpalāvaṇyayuktā yā saubhāgyaṃ yā na vindati

snānaṃ vṛddhikaraṃ tasyā veśyāgāre prakalpayet//
anyeṣāmatha kartavyaṃ sadā snānaṃ manoharam

same sajjanasaṃkīrṇe śucau deśe vikaṇṭake//
sahāyaiḥ prayataiḥ sārdhamahorātroṣito dvijaḥ

snānakarma prayuñjīta sopavāsasya mānada//
ahorātrāsamarthasya kāryaṃ vā haviṣāśanam

śaradvasantayoḥ kāryaṃ snānaṃ svasthasya bhārgava //
sarvakāleṣvathārttasya grahavyādhinibarhaṇam

muhūrte tatra sāvitre brāhmaṇaḥ snāpayeddvija //
maitre'tha vijaye caiva rājanyaṃ snāpayettathā

vaiśyaṃ paitāmahe śūdraṃ śeṣeṣu snāpayettathā //
pañcamī saptamī śreṣṭhā snapane brāhmaṇasya va

trayodaśī tṛtīyā ca kṣattriyasya viśiṣyate //
dvitīyā daśamī caiva tathā vaiśyasya mānada

ṣaṣṭhī caturdaśī caiva śūdrāṇāṃ snānakarmaṇi //
ekādaśī dvādaśī ca tathā kṛṣṇacaturdaśī

sarveṣāmeva varṇānāṃ snānakarmaṇi pūjitā //
dhruveṣu vaiṣṇave puṣye revatyāṃ bhagadaivate

haste punarvasau saumye jyeṣṭhāyāmatha vāruṇe //
dhaniṣṭhāyāṃ tathā snānaṃ sarveṣāmeva pūjitam

vetrāsanaṃ bhadrapīṭhaṃ vaidalaṃ dāravaṃ tathā //
varṇānāmānupūrvyeṇa parikīrtitamāsanam

kṛṣṇājinaṃ ca vaiyāghraṃ rauravaṃ bāstameva ca //
pādopadhānaṃ varṇānāmānupūrvyeṇa kalpayeta

vṛṣāśvaratha pṛṣṭhe ca gajapṛṣṭhe tathaiva ca // //
naraskandheṅganāṅge vā prāyaśaḥ snāpayecchiśūn

snātukāmasya tasyātha pūrvamutsārasaḥ smṛtam //
yairdravyairbhṛguśārdūla tāni vakṣyāmyataḥ param

punarnavāṃ rocanāṃ ca śatāhvāguruṇīṃ tvacam //
madhūkaṃ ca rajanyau dve tagaraṃ nāgakesaram

āsurīṃ sarjikāṃ caiva māṃsīṃ rāmaṭha candanam //
priyaṅguṃ sarṣapānkuṣṭhaṃ kuṃkumaṃ bahuputrikām

balendrahastīṃ brāhmīṃ ca pañcagavyaṃ tathaiva ca //
saktunā miśrayitvā ca kāryamudvartanaṃ bhavet

tataḥ snānadine prāpte prāgvadutsādayetpunaḥ //
tato manohare deśe maṇḍalaṃ kalpayed budhaḥ

caturasraṃ gomayena sarvato'ṣṭadiśaṃ samam //
satoraṇaṃ caturdvāraṃ prākārairupaśobhitam

tatra madhye likhetpadmamaṣṭapatraṃ suśobhitam //
karṇikāyāṃ likhedviṣṇuṃ meghābhaṃ pītavāsasam

kaustubhodbhāsitoraskaṃ śaṅkhacakragadādharam//
brahmāṇaṃ dakṣiṇe nyasya padmavarṇaṃ samālikhet

ajināmbarasaṃyuktaṃ śvetayajñopavītinam //
rajatābhranibhaṃ vāme bhāge rudraṃ samālikhet

vyāghracarmāmbaradharaṃ trinetraṃ śūladhāriṇam //
pūrvapatre likhecchakraṃ savajraṃ ca sudarśanam

gajapṛṣṭhādhirūḍhaṃ tu svarṇābhaṃ pītavāsasam //
prāgdakṣiṇe tathā patre likhedvahniṃ mahāprabham

dhūmābhavasanaṃ devaṃ śukayānagataṃ prabhum //
atasīpuṣpasaṃkāśaṃ pītāmbaradharaṃ śubham

sadaṇḍaṃ mahiṣārūḍhaṃ likhetpatre tu dakṣiṇe //
uṣṭrārūḍhaṃ virūpākṣaṃ likheddakṣiṇapaścime

raktāmbaradharaṃ kṛṣṇaṃ khaḍgapāṇiṃ vibhīṣaṇam //
paścime varuṇaṃ devaṃ sapāśaṃ haṃsavāhanam

saśuklavasanaṃ devaṃ svacchavaiḍūryasannibham //
paścimottarato vāyuṃ vāyumaṇḍalamadhyagam

likhecchubhrāmbaraṃ śvetaṃ sarvābharaṇabhūṣitam //
kuberamuttare patre vyomayānagataṃ likhet

kavacottamasaṃyuktaṃ gadinaṃ kamalaprabham //
vṛṣārūḍhamatheśānaṃ patre pūrvottare likhet

vyāghracarmāmbaradharaṃ bhālacandra vibhūṣitam //
caturbhiḥ sāgaraiḥ padmaṃ caturasraṃ samantataḥ

yādogaṇayutaiścaiva krameṇa parivārayet //
sāgarāṇāṃ tu pūrveṇa likhetpadmaṃ manoharam

tataścakraṃ tathā daṇḍaṃ vajraṃ makarameva ca //
śaktiṃ dhvajaṃ triśūlaṃ tu krameṇaiva tu vinyaset

tataḥ prākārasaṃlagnāniṣūndvādaśa vinyaset //
caturaḥ sūktiṣu tathā dvāreṣvaṣṭau bhṛgūttama

susaṃhatānsamāñślakṣṇānduraṅgānpatranirgatān //
vyāmārdhasammitāṃstīkṣṇānpārśve takṣavibhūṣitān

pañcaraṅgaṃ tataḥ sūtraṃ badhnīyātteṣu bhārgava //
arundhandvāramārgāṃstu sudṛḍhaṃ sumanoharam

vitānaṃ maṇḍalīkuryācchvetavarṇaṃ manoharam //
dhvajaṃ chatrāṇi khaḍgāṃśca ghaṇṭādarśāṃścaturdiśam

prākāropari daṇḍeṣu sudṛḍheṣvanirodhayet//
snāne maṇḍalakānkuryātprākārasya tato bahiḥ

trisamānbhṛguśārdūla caturasrānmanoharān //
jvālāmālyārgharacitāndiśāsu vidiśāsu ca

snānamaṇḍalakānāṃ tu samīpe susamantataḥ //
gāvaḥ savatsāḥ saṃsthāpyā vṛṣabhāśca supūjitāḥ

ajāścārbhakasampannā jīvamokṣāśca pakṣiṇaḥ //
prākārasyottare bhāge vediṃ kuryātsuśobhitām

darbhairācchādya tānsarvānsalilena samukṣayet //
tatrāgniṃ juhuyānmantrairmahāvyāhṛtipūrvakam

yathoktadevatāliṃgaistathā mantraiśca bhārgava //
ॐkāreṇa tathāstrāṇāṃ nāmayuktena vai pṛthak

aśvatthodumbaraplakṣabilvārkakhadirāḥ śamī //
svarāhvayamapāmārgaṃ palāśayavakānyapi

vaṃśikā cāśvagandhā ca kadambaścārjunāsanau //
eteṣāṃ samidhaḥ śastāḥ kiṣkumātrā ghṛtaplutāḥ

ekaikamapyaṣṭaśataṃ havyaṃ sarṣapasaṃyutam //
tilānyavāṃstathākṣoṭām̐llājāścāgnau samāvapet

tataścāvapayecchāntiṃ brāhmaṇānguṇasaṃyutān //
abhyarcya dakṣiṇābhiśca puṣpākṣataphalaistathā

tatastu sthāpayetkumbhānmaṇḍale sāgaropari //
yathā digdevanāmāṅkāndiśāsu vidiśāsu ca

/
kāñcanānrājatāṃstāmrānatha vāpi mahīmayān //
nāmānyathaiṣāṃ vakṣyāmi tāni me gadataḥ śṛṇu

bhadraḥ subhadraḥ siddhārthaścaturthaḥ puṣṭivardhanaḥ //
amokaścitrabhānuśca parjanyo'tha sudarśanaḥ

vāpīkūpasaridbhyaśca pūjayitvā jalena tān //
vanaspatisamāyuktānarghyamālyādipūjitān

mantrānumantritānetāṃstatra mantraṃ nibodha me //
sthāpayantu ghaṭānetānsāśvirudramarudgaṇāḥ

viśvedevāstathādityā vasavo munayastathā //
adhiśrayantu suprītāstathānyā api devatāḥ

evaṃ saṃsthāpya tānkumbhānsthāpyā maṇḍalakeṣvatha//
aindrādikramaśaḥ sthāpyāstvāsane pūrvacodite

pūrve maṇḍalake sthāpyaḥ śuklapuṣpānvarānvitaḥ //
sarvatra grāhayedviprairvakṣyamāṇaguṇānghaṭān

pratyekaṃ syāccaturbhistu dvārasyopari bhārgava //
apāṃ pūrṇaṃ ghaṭaṃ tatra yathāśaṃ ca yathāsvakam

tathā dadyādyathāsnānaṃ samyaksnāpyasya jāyate //
oṣadhīścātra vakṣyāmi yāstu kumbheṣu nikṣipet

asthāpiteṣu dharmajña tataḥ saṃsthāpanaṃ bhavet //
jayāṃ jayantīṃ vijayāṃ sūkarīṃ markaṭīṃ vacām

kāyasthāṃ ca vayasthāṃ ca bṛhatīṃ bahuputrikām //
sahastaśatavīrye ca trāyamāṇāṃ kaṭumbarām

aticchatrāṃ tathā cchatrāṃ jīvantīmaparājitām //
jaṭilāṃ pūtanāṃ kīśāṃ surāṃ yakṣasurāṃ tathā

avītarākṣasīṃ vīrāṃ sthirāṃ bhadrāṃ yaśobalām //
śaṅkhapuṣpīṃ viṣṇudattāṃ nākulīṃ gandhanākulīm

golomyatibale caiva vyāghrīmaśvavatīṃ tathā //
śyāmāṃ jyotiṣmatīṃ caiva teṣu kumbheṣu nikṣipet

candanośīratagarakumbhamāgurukesarān//
tvakpatramustahrīberapriyaṅgvelārasāṃstathā

gandhamāṃsīṃ tathā spṛkkāṃ rocanaṃ rāmakaṃ buṭim//
kaśīrukāmṛtānaṃ ca kakubhaṃ padmakaṃ tathā

kastūrikāṃ taruṣkaṃ ca karpūraṃ nāḍikaṃ tathā //
jātīphalaṃ lavaṅgāśca kakkolaiḥ saha cūrṇitāḥ

gandhadravyāṇi cānyāni yathālābhaṃ vinikṣipet //
śvetā raktā tathā pītā kṛṣṇā caiva hi mṛttikā

yāścānyā vividhāḥ śastā mṛttikāstā nibodha me //
vṛṣāgraśṛṅgādvalmīkāddevatāyatanādvrajāt

agnyāgārāddhastidantātsubhagāgaṇikāgṛhāt //
rājadvārātpuradvārātkūpāddānagṛhāttathā

kumbhakāragṛhānnadyāḥ padminyāḥ śrotriyālayāt //
indranīlataḍāgācca hradātprasravaṇādapi

catuṣpathātsaptapathānmṛttikāśakaṭāttathā //
gajāśvagaṇaśālābhyastathātharvaṇaveśmanaḥ

ajāvikānvitāgārādrājakośānmahāsanāt //
aśokātkṣīravṛkṣāṇāṃ samīpātsaphalasya ca

sadādhyayanaśālāto yajñabhūmeśca mṛttikāḥ //
pragṛhya sarvāḥ sambhṛtya pañcagavyasamanvitāḥ //

sarvabījaiḥ samāyojya snānakumbheṣu nikṣipet //
tataḥ kumbhānpratiṣṭhāpya snāpyaṃ saṃsthāpayeddvijaḥ

maṇḍaleṣu krameṇaiva diśāsu vidiśāsu ca //
pūrve maṇḍalake snāpyaḥ śvetamālyānulepanaḥ

śvetaścaiva paṭo dhāryaścaturbhirbrāhmaṇairbhavet //
evaṃ dakṣiṇatastasya sarvaṃ nīlaṃ prakalpayet

kṛṣṇaṃ ca kalpayetsarvaṃ tathā dakṣiṇapaścime //
( pītaṃ prakalpayetsarvaṃ tathā bhāge tu paścime //)
paścimottarayoḥ sarvaṃ śuklavarṇaṃ prakalpayet

tathaivottaradigbhāge padmavarṇaṃ prakalpayet //
prāguttare tathā bhāge citraṃ sarvaṃ prakalpayet

rājyābhiṣekavihito mantraścātra vidhīyate //
pratyekamatha kumbheṣu diśāsu vidiśāsu ca

evaṃ snāpyo mahābhāga śaṅkhapuṇyāhanisvanaiḥ //
snātaḥ śuklāmbaradharaḥ śvetamālyānulepanaḥ

maṇḍale tu niviṣṭānāṃ surāṇāṃ pūjanaṃ tataḥ //
kurvīta prayataḥ śuddhiṃ gandhamālyārghasampadā

dīpairdhūpairnamaskārairvastrairābharaṇaistathā //
apūpānpāyasaṃ bhakṣyāñśuklamālyānulepanam

vividhaṃ ca phalaṃ kṣīraṃ brahmaṇebhyo nivedayet //
dadhnā ca paramānnena śvetamālyānulepanaiḥ

phalaiḥ prasūnaiśca tathā keśavāya haredbalim //
kṣīreṇa paramānnena dadhnā sakṛsareṇa ca

phalaiḥ kālodbhavaiḥ puṣpaiḥ śaṅkarāya haredbalim //
apūpaiḥ paramānnena bhakṣyaiḥ kṣīreṇa sarpiṣā

mālyānulepanaiḥ śuklairmahendrāya haredbalim //
yavānāṃ ca tilānāṃ ca godhūmānāṃ tathā sakṛt

bhakṣyaiḥ saguḍasarpiṣkairbaliṃ kuryāttu vahnaye //
guḍodanaguḍāpūpānpakvamāṃsaṃ tathāmiṣam

/
yamāya ca baliṃ dadyādraktamālyānulepanam //
pakvamāṃsaṃ tathā māṃsaṃ kṛṣṇamālyānulepanam

virūpākṣāya tu surāṃ dadyātsauvīrakaṃ tathā //
mudgāpūpāṃstilāpūpāñjalajānmandirāṃstathā

varuṇāya baliṃ dadyātpītaṃ mālyādikaṃ tathā //
yavagodhūmacaṇakamāṣasaktūnsagorasān //

kulmāṣaghṛtasaṃyuktānbaliṃ dadyāttu vāyave //
bhakṣyāṃśca madhusaṃyuktānmudgamiśrāṃstathāmiṣam

citraṃ mālyaṃ kuṃkumaṃ ca kuberāya haredbalim //
śimbidhānyabhavānbhakṣyāñśālyannaṃ saguḍaṃ dadhi

īśānāya baliṃ dadyācchuklamālyānulepanaiḥ //
śuklaudanaṃ śuklamālyaṃ śūlāyopaharedbalim

tathā pañcarasaiḥ siddhaṃ dadyādvijñāya buddhimān //
kṛsaraṃ gandhapuṣpāḍhyaṃ dadyācchakrāya pāyasam

phalodanaṃ raktamālyaṃ dadyācchaktyai tathā balim //
snānamaṇḍalakebhyo'pi baliṃ dadyāttato balim

bālakrīḍanakānbhakṣyānphalāni vividhāni ca //
matsyāmiṣaṃ sarudhiraṃ pāyasaṃ tilataṇḍulam

sakṛdantrāṇi hṛdayaṃ bhūtebhyo balimāharet //
ॐkārādyaiścaturthyantaiḥ svāhākārasamanvitaiḥ

rājyābhiṣekamantroktadevatānāṃ pṛthakpṛthak //
nāmabhirjuhuyādvahnau yathāśraddhaṃ yathāghṛtam

pūrṇāhutiṃ tato dattvā deyā vipreṣu dakṣiṇā //
kanakaṃ rajataṃ gāvo vāsāṃsi vividhāni ca

kartre ca dakṣiṇā deyā tathā rāma viśeṣataḥ //
dattaṃ vastrādi devebhyastathā stānaghaṭādikam

kartā yatheṣṭaṃ vibhajettasya bhāgo hi sa smṛtaḥ //
ghṛte'tha vadanaṃ dṛṣṭvā namaskṛtya ca devatāḥ

maṅgalyālambhanaṃ kṛtvā phalapāṇirudaṅmukhaḥ //
tasmāddeśādvinirgatya gṛhaṃ yāyāttataḥ svakam

tatra tiṣṭheddhaviṣyāśī brahmacārī ca tāṃ niśām //
snāpito brahmapūtena snānenāyaṃ yathā bhavet

sarvānkāmānavāpnoti svargalokaṃ ca gacchati //
purā devāsure yuddhe śakrāyaitadbṛhaspatiḥ

kṛtavānpuruhūtāya tataḥ śakraḥ surādhipaḥ //
jaghāna daityamukhyānāṃ navatīrnava bhārgava

dhanyaṃ yaśasyaṃ ripunāśakāri rakṣohaṇaṃ pāpaharaṃ pavitram //
rogāpahaṃ vighnavināśakāri snānaṃ mayā te vihitaṃ yathārtham

iti śrīviṣṇudharmottare dvitīyakhaṃḍe mā०saṃ० rāmaṃ prati puṣkaropākhyāne dikpālasnānavarṇanannāma caturuttara
śatatamo'dhyāyaḥ

2.105
rāma uvāca //
snānamanyatsamācakṣva bhagavanduritāpaham //
vināyakopasṛṣṭānāṃ sarvakarmaprasādhakam

puṣkara uvāca //
vināyakaḥ karmavighnasidhyarthaṃ viniyojitaḥ //
gaṇānāmadhipatye ca keśavena pitāmahaiḥ

tenopasṛṣṭo yastasya lakṣaṇāni nibodha me //
svapne'vagāhate'tyarthaṃ jalaṃ muṇḍaṃ ca paśyati

kāṣāyavāsasaścaiva kravyādāṃścādhirohati //
antyajairgardabhairuṣṭraiḥ sahaikatrāvatiṣṭhate

vrajamānastathātmānaṃ manyate'nugataṃ paraiḥ //
vimanā viphalārambhaḥ saṃsīdannanimittataḥ

tenopasṛṣṭo labhate na rājyaṃ rājanandanaḥ //
yā kumārī ca bhartāramapatyaṃ garbhamaṅganā

ācāryatvaṃ śrotriyaśca na śiṣyo'dhyayanaṃ tathā //
vaṇiṅ na lābhamāpnoti na kṛṣiṃ tu kṛṣīvalaḥ

snapanaṃ tasya kartavyaṃ puṇyehni vidhipūrvakam //
hastapuṣyāśvayuksaumyavaiṣṇavānyatame śubhe

nakṣatre ca muhūrte ca maitre vā brahmadaivate //
carmaṇyānuḍuhe rakte sthāpyaṃ bhadrāsanaṃ bhavet

bhadrāsanopaviṣṭasya svasti vācyaṃ dvijottamān //
gaurasarṣapakalkena medhyenotsāditasya ca

sarvauṣadhaiḥ sarvagandhaiḥ praliptaśirasastathā //
caturbhiḥ kalaśaiḥ kāryaṃ snapanaṃ mantrasaṃyutam

tathaikavarṇāḥ kalaśāḥ kartavyāste hradāmbhasā //
aśvasthānādgajasthānādvalmīkātsaṅgamāddhṛdāt

mṛttikāṃ rocanaṃ gandhānguggulaṃ teṣu nikṣipet //
sarvauṣadhīśca bījāni snānamantrānataḥ śṛṇu

sahasrākṣaṃ śatadhāramṛṣibhiḥ pāvanaṃ kṛtam //
tena tvāmabhiṣiñcāmaḥ pāvamānīḥ punantu te

bhagaṃ te varuṇo rājā bhagaṃ śukro bṛhaspatiḥ //
bhagamindraśca vāyuśca bhagaṃ saptarṣayo daduḥ

yatte keśeṣu daurbhāgyaṃ sīmante yacca mūrdhani //
lalāṭakarṇayorakṣṇorāpastaddhantu te sadā

darbhapiñjalamādāya vāmahaste tato guruḥ //
snātasya sārṣapaṃ tailaṃ suveṇaudumbareṇa tu

juhuyānmūrdhni dharmajña caturthyantaiśca nāmabhiḥ //
ॐkārapūtairdharmajña svāhākārasamanvitaiḥ

mitāya saṃmitāyātha sālaṅkaṭakaṭāya ca //
kūṣmāṇḍarājaputrāya tathaiva ca mahātmane

nāmabhirbalimantraiśca vaṣaṭkārasamanvitaiḥ//
dadyāccatuṣpathe śīrṣe kuśānāstīrya sarvataḥ

/
kṛtaraktāṃstaṇḍulāṃśca palalaudanameva ca //
matsyānpakvāṃstathaivāmānmāṃsametāvadeva tu

puṣpaṃ citraṃ sugandhaṃ tu surāṃ ca trividhāmapi //
mūlakaṃ pūrikāpūpāstathaivaiṇḍaryakāṇi ca

etānsarvānupāhṛtya bhūmau kṛtvā tataḥ śiraḥ//
vināyakasya jananīmupatiṣṭhettato'mbikām

rūpaṃ dehi yaśo dehi saubhāgyaṃ subhage mama//
putrāndehi dhanaṃ dehi sarvānkāmāṃśca dehi me

tataḥ śuklāmbaradharaḥ śuklamālyānulepanaḥ//
bhojayedbrāhmaṇāndadyādvastrayugmaṃ gurorapi

vināyakasnānamidaṃ yaśasyaṃ rakṣohaṇaṃ vighnavināśakāri//
sarvāmayaghnaṃ ripunāśakaṃ ca kartavyametanniyamena rāma

iti śrīviṣṇudharmottare dvitīyakhaṇḍe mā० saṃ० rāmaṃ prati puṣkaropākhyāne vināyakasnānavarṇanannāma pañcottaraśatatamo'dhyāyaḥ