વિષ્ણુધર્મોત્તરપુરાણમ્ · અધ્યાય 1.77

વજ્ર ઉવાચ ॥
મહાકલ્પક્ષયે બ્રહ્મન્સમવસ્થાં વદસ્વ મે ॥
ભવાઞ્જ્ઞાનનિધિઃ સ્ફીતો યથા બ્રહ્મા પિતામહઃ

માર્કણ્ડેય ઉવાચ॥
પૂર્ણે સંવત્સરશતે સંહૃત્ય સકલં જગત્ ।
શેતે બ્રહ્મા મહારાજ પ્રાગ્વદેકાર્ણવે તદા । ૨ ।
સંન્યસ્ય દેહં યોગેન પુરુષં પ્રતિપદ્યતે ॥
મોક્ષસ્થાનમનુપ્રાપ્તે દેવદેવે પિતામહે

યે ગતા બ્રહ્મણઃ સ્થાનં મુચ્યન્તે સર્વ એવ તે ॥
અણ્ડસ્યાભ્યન્તરં સર્વં તદામ્ભોભિઃ પ્રપૂર્યતે

।
શરીરધારિણસ્સર્વે તદા નશ્યન્તિ પાર્થિવ ॥
અન્તર્ગતેન તોયેન ભિન્નમણ્ડે જગત્પતે

પૂર્ણે બ્રહ્માયુષિ તદા બાહ્યસ્થેઽમ્ભસિ લીયતે ॥
એવં સા જગદાધારા ધારા તોયે પ્રલીયતે

જ્યોતિષ્યાપઃ પ્રલીયન્તે જ્યોતિર્વાયૌ પ્રલીયતે ॥
ખે વાયુઃ પ્રલયં યાતિ મનસ્યાકાશમેવ ચ

મનઃ પ્રલીયતે બુદ્ધૌ બુદ્ધિશ્ચાત્મનિ લીયતે ॥
અવ્યક્તે લીયતે ચાત્મા અવ્યક્તઃ પુરુષે પરે

અનન્તાનિ તથોક્તાનિ યાન્યણ્ડાનિ મયા પુરા ॥
સર્વાણિ તાનિ સંહૃત્ય સમકાલં જગત્પતિઃ

પ્રકૃતૌ તિષ્ઠતિ તદા સા રાત્રિસ્તસ્ય કીર્તિતા ॥
બ્રાહ્મે સમાશતે પૂર્ણે પુનરેવ જગત્પતિઃ

( સર્વં વિધત્તે ધર્મજ્ઞ યથાપૂર્વમુદાહૃતમ્ ॥
અવ્યક્તાદિક્રમેણાથ વિધાયાણ્ડં મહેશ્વરઃ

અણ્ડે શરીરે ભવતિ સ્વયંભૂરમૃતદ્યુતિઃ ॥ )
સ્વયં સ એવ ધર્મજ્ઞ બ્રહ્મા શુભચતુર્મુખઃ

સર્વેષ્વણ્ડેષુ ધર્મજ્ઞસ્સમકાલં જગત્પતિઃ ॥
સ્વયં શરીરે ભવતિ પ્રાકામ્યાન્મનુજેશ્વર

બ્રહ્માયુષોન્તે જગતામવસ્થા મયેરિતા તે યદુવૃન્દનાથ ॥
અતઃ પરં કિં કથયામિ તુભ્યં તન્મે વદસ્વાયતલોહિતાક્ષ

ઇતિ શ્રીવિષ્ણુધર્મોત્તરે પ્રથમખણ્ડે મા૦ સં૦ મહાકલ્પવર્ણનો નામ સપ્તસપ્તતિતમોઽધ્યાયઃ॥