વિષ્ણુધર્મોત્તરપુરાણમ્ · અધ્યાય 1.71

॥ વજ્ર ઉવાચ ॥। ॥
યત્સ શુશ્રાવ ધર્માત્મા વરુણાદ્ભૃગુનન્દન ॥
તન્મમાચક્ષ્વ તત્ત્વેન પરં કૌતૂહલં હિ મે

માર્કણ્ડેય ઉવાચ ॥
જમદગ્નિસુતો રામો વરુણસ્ય ગૃહોષિતઃ ॥
કદાચિદ્વરુણં દેવમિદં વચનમબ્રવીત્

।
રામ ઉવાચ ॥
નમસ્તે દેવદેવેશ સુરાસુરગણાર્ચિત ॥
ગોબ્રાહ્મણહિતાસક્ત યાદોગણજલેશ્વર

ત્વં તસ્ય દેવદેવસ્ય વિષ્ણોરમિતતેજસઃ ॥
અયનમૃષિભિર્યેન વિષ્ણુર્નારાયણઃ સ્મૃતઃ

ત્વમેવેદં જગત્સર્વં સ્થાવરં જઙ્ગમઞ્ચ યત્ ॥
બ્રહ્મા વિષ્ણુશ્ચ રુદ્રશ્ચ ત્વચ્છરીરે સમાશ્રિતાઃ

ત્વમિન્દ્રસ્ત્વં ચ ધનદસ્ત્વમીશસ્ત્વં સમીરણઃ ॥
ત્વમગ્નિસ્ત્વં યમશ્ચૈવ સર્વાધારસ્ત્વમચ્યુતઃ

દેવાનામીશ્વરશ્ચૈવ નાગાનામીશ્વરસ્તથા ॥
સાગરાણાં ચ સરસાં સરિતાં ચ મહાભુજ

કૂપવાપીતટાકાનાં શૌચસ્ય પરમસ્ય ચ ॥
વિષ્ણોર્વામસ્ય નેત્રસ્ય શશાઙ્કસ્ય મહાત્મનઃ

ત્વન્મયં મણ્ડલં દેવ ત્વન્મયાસ્સર્વતારકાઃ ॥
ત્વમેવ સરિતાં નાથસ્સમુદ્રો યાદસાં પતિઃ

આધારસ્સર્વરત્નાનાં વિદ્યાનાં ચ જગત્પતે ॥
ત્વન્મયો દેહિનાં પ્રાણો જીવો રુધિરસંજ્ઞકઃ

રામસ્ત્વં પ્રાણિનાં દેવ સર્વદેવમયો વિભુઃ ॥
ભવતા સંયતા પાશૈર્દાનવા દેવ દારુણૈઃ

પાતાલદ્વારમાશ્રિત્ય ભવાંસ્તિષ્ઠતિ નિર્ભયઃ ॥
મેરુપૃષ્ઠે ચ ભગવન્પુરી તે દેવનિર્મિતા

તૃતીયા ચ મહાભાગ માનસોત્તરમૂર્ધનિ ॥
પુરત્રયે ત્વં વસસિ પ્રાકામ્યેન જલેશ્વર

સર્વત્ર પૂજ્યસે દેવૈસ્સર્વભૂતભવોદ્ભવ ॥
આધારસ્ત્વં હિ તપસાં શૌચાનાં ભુવનસ્ય ચ

ત્રૈલોક્યં સકલં દેવ પ્રકૃતિર્વિકૃતિશ્ચ તે॥
મમાપિ સુમહાભાગ પ્રસાદસુમુખો હ્યસિ

તસ્માન્મે ભગવંશ્છિન્ધિ સંશયાન્મનસિ સ્થિતાન્ ॥
વરુણ ઉવાચ ॥
યત્રાસ્તિ તે સંશયમસ્ત્રધારિઞ્છેત્તાસ્મિ તે તત્ર ન સંશયોઽત્ર ॥
યથા મમેશસ્ત્રિપુરાન્તકોઽસૌ તથા ભવાન્મે રણચણ્ડવેગ॥ ।

ઇતિ શ્રીવિષ્ણુધર્મોત્તરે પ્રથમખણ્ડે મા૦સં૦ શ્રીપરશુરામવરુણકૃતસ્તોત્રો નામૈકસપ્તતિતમોઽધ્યાયઃ