વિષ્ણુધર્મોત્તરપુરાણમ્ · અધ્યાય 1.66

॥ માર્કણ્ડેય ઉવાચ ॥। ॥
કૈલાસશિખરે રમ્યે રામસ્ય રમતસ્તદા ॥
આજગામ હરં દ્રષ્ટું દેવદેવઃ પુરન્દરઃ

સ સમાસાદ્ય દેવેશં પ્રણમ્ય વૃષભધ્વજમ્ ॥
ઉવાચ વચનં સમ્યઙ્મુદા રામસ્ય સન્નિધૌ

શક્ર ઉવાચ ॥
ત્વત્પ્રસાદેન દેવેશ મયા પ્રાપ્તં ત્રિવિષ્ટપમ્ ॥
રામેણ ઘાતિતાઃ સર્વે યથા મે દેવશત્રવઃ

અવધ્યાસ્ત્રિદશાનાં યે વરદાનબલોદ્ધતાઃ ॥
નરવધ્યાઃ કૃતાસ્તે હિ બ્રહ્મણા સુમહાત્મના

પાતાલનિલયા દેવ અવધ્યા દેવતાગણૈઃ ॥
બાધન્તે નરવધ્યા મે લોકાનાં ચ જગત્પતે

તાંશ્ચ ઘાતય દેવેશ રામેણાક્લિષ્ટકર્મણા ॥
માર્કણ્ડેય ઉવાચ ॥
એવં કરિષ્યતીત્યુક્ત્વા વિસૃજ્ય ત્રિદશેશ્વરમ્

ઉવાચ વચનં રામં ભાર્ગવં પુરતઃ સ્થિતમ્ ॥
શઙ્કર ઉવાચ ॥
ગચ્છ ભાર્ગવ પાતાલં પાતાલનિલયાઞ્જહિ

શક્રશત્રૂન્દુરાચારાન્નરવધ્યાન્મહાસુરાન્॥
વૈષ્ણવં ચાપરત્નં તે મયા ન્યસ્તં પિતુઃ કરે

તદાદાય શરૈસ્તીક્ષ્ણૈર્જહિ તાન્રામ દાનવાન્ ॥
અક્ષયં તૂણમાદાય શરપૂર્ણમિદં તથા

માર્કણ્ડેય ઉવાચ ॥।
એવમુક્ત્વા દદૌ ચાસ્ય તૂણમક્ષયસાયકમ્ ॥
દત્ત્વા ચ ભગવાનાહ રામં પરબલાર્દનમ્

શઙ્કર ઉવાચ ॥
તૂણમેતત્પ્રદાતવ્યં ત્વયાગસ્ત્યાય ભાર્ગવ ॥
ચાપરત્નં ચ રામાય કૃતે કર્મણિ સુવ્રત

અગસ્ત્યોઽપિ મહાતેજાસ્તૂણમક્ષયસાયકમ્ ॥
રાઘવાયાતિયશસે રામાયૈવ પ્રદાસ્યતિ

રામસંદર્શનાદૂર્ધ્વં મા કૃથાઃ શસ્ત્રધારણમ્ ॥
રામસંદર્શને રામ તવ તેજો હિ વૈષ્ણવમ્

રામં પ્રવેક્ષ્યતિ તદા સુરકાર્યાર્થમૂર્જિતમ્ ॥
યાવત્ત્વં તેજસા યુક્તો વૈષ્ણવેન પરંતપ

તાવચ્છત્રુગણાન્સર્વાન્સમરેષુ વિજેષ્યસિ ॥
સ્થાતું ન શક્તાસ્તવ દૈત્યસેના અસ્તાયુધસ્ય પ્રમુખે દ્વિજેન્દ્ર ॥
આદાય ચાપં યુધિ વૈષ્ણવં તત્તૂણં તથેમં જહિ દેવશત્રૂન્

ઇતિ શ્રીવિષ્ણુધર્મોત્તરે મા૦ સં૦ પ્રથમખણ્ડે રામં પ્રતિ શઙ્કરાનુશાસને ષટ્ષષ્ટિતમોઽધ્યાયઃ