Vishnudharmottara Purana · Chapter 1.45

// mārkaṇḍeya uvāca //
rāhau divamasaṃprāpte sālve rājñi sabhāṃ gate //
rāmeṇa preṣito dūtaḥ saṃprāptastvakṛtavraṇaḥ

sa praviṣṭaḥ sabhāṃ ramyāṃ sālvarājñā ca pūjitaḥ //
pādyārghyācamanīyādyairniṣaṇṇo vākyamabravīt

akṛtavraṇa uvāca //
dūto'haṃ preṣitaḥ sālva rāmeṇā'kliṣṭakarmmaṇā//
śrutvā rāmasya vacanaṃ tataḥ kuru yathepsitam

āha tvāṃ bhārgavo rāmastryambakeṇa visarjitaḥ//
tvayā yuddhāya daityendra saṃgrāme kriyatāṃ kṣaṇam

vivāsya vāsavaṃ svargāddevāñjitvā sadā''have//
anayasyā'sya ghorasya phalaṃ prāpnuhi durmate

nāhaṃ pramatte viśvaste praharāmi kadācana//
tena te preṣito dūtastasmādyuddhe sthiro bhava

mārkaṇḍeya uvāca //
evamuktastadā sālvo brāhmaṇaṃ vākyamabravīt //
nā'haṃ rāmakṛte brahmansannahyāmi kadācana

kintu sainyena sarveṇa sannaddhena varūthinā //
mahādevaṃ vijeṣyāmi yena rāmo visarjitaḥ

sannaddhasainyasahitaṃ mahādevajayaiṣiṇam //
yadi māṃ yotsyate rāmo hantāsmi tamahaṃ mṛdhe

sa tvaṃ gaccha yathākāmaṃ rāmāya vinivedaya //
etadvacanamādāya sālvasya sa mahātmanaḥ

jagāma rāmaṃ dharmajñaṃ sālvavākyaniveditaḥ //
gatvā śaśaṃsa rāmāya saiṃhikeyaviceṣṭitam

tena vākyena rāmo'pi roṣāddaityapuraṃ yayau //
rāmadūte gate tasmin daityānsālvaḥ pracodayat

sannahyadhvaṃ vijeṣyāmaḥ sagaṇaṃ bhagasūdanam //
tataste dānavāḥ sarve sālvavākyapracoditāḥ

sannaddhā svagṛhebhyastu rājadvāramupāgatāḥ//
kuñjarāṇāṃ ninādena śaṅkhabherīraveṇa ca

rājadvāre mahāñchabdastumulaḥ samapadyata//
hutvā hutāśanaṃ snātaḥ sālva saṃpūjya ca dvijān

āruroha gajaṃ mattaṃ śailāgraṃ savitā yathā

vinirgataṃ daityapatiṃ samīkṣya daityeśvarāḥ kālasamānadarpāḥ //
ūcustadā taṃ samareṣvajeyama jayasva śambhuṃ yudhi saṃpragṛhya

iti śrīviṣṇudharmottare prathamakhaṇḍe mārkaṇḍeyavajrasaṃvāde śrabhārgavarāmayuddhe sālvaniryāṇaṃ nāma pañcacatvāriṃśattamo'dhyāyaḥ