વિષ્ણુધર્મોત્તરપુરાણમ્ · અધ્યાય 1.45

॥ માર્કણ્ડેય ઉવાચ ॥
રાહૌ દિવમસંપ્રાપ્તે સાલ્વે રાજ્ઞિ સભાં ગતે ॥
રામેણ પ્રેષિતો દૂતઃ સંપ્રાપ્તસ્ત્વકૃતવ્રણઃ

સ પ્રવિષ્ટઃ સભાં રમ્યાં સાલ્વરાજ્ઞા ચ પૂજિતઃ ॥
પાદ્યાર્ઘ્યાચમનીયાદ્યૈર્નિષણ્ણો વાક્યમબ્રવીત્

અકૃતવ્રણ ઉવાચ ॥
દૂતોઽહં પ્રેષિતઃ સાલ્વ રામેણાઽક્લિષ્ટકર્મ્મણા॥
શ્રુત્વા રામસ્ય વચનં તતઃ કુરુ યથેપ્સિતમ્

આહ ત્વાં ભાર્ગવો રામસ્ત્ર્યમ્બકેણ વિસર્જિતઃ॥
ત્વયા યુદ્ધાય દૈત્યેન્દ્ર સંગ્રામે ક્રિયતાં ક્ષણમ્

વિવાસ્ય વાસવં સ્વર્ગાદ્દેવાઞ્જિત્વા સદાઽઽહવે॥
અનયસ્યાઽસ્ય ઘોરસ્ય ફલં પ્રાપ્નુહિ દુર્મતે

નાહં પ્રમત્તે વિશ્વસ્તે પ્રહરામિ કદાચન॥
તેન તે પ્રેષિતો દૂતસ્તસ્માદ્યુદ્ધે સ્થિરો ભવ

માર્કણ્ડેય ઉવાચ ॥
એવમુક્તસ્તદા સાલ્વો બ્રાહ્મણં વાક્યમબ્રવીત્ ॥
નાઽહં રામકૃતે બ્રહ્મન્સન્નહ્યામિ કદાચન

કિન્તુ સૈન્યેન સર્વેણ સન્નદ્ધેન વરૂથિના ॥
મહાદેવં વિજેષ્યામિ યેન રામો વિસર્જિતઃ

સન્નદ્ધસૈન્યસહિતં મહાદેવજયૈષિણમ્ ॥
યદિ માં યોત્સ્યતે રામો હન્તાસ્મિ તમહં મૃધે

સ ત્વં ગચ્છ યથાકામં રામાય વિનિવેદય ॥
એતદ્વચનમાદાય સાલ્વસ્ય સ મહાત્મનઃ

જગામ રામં ધર્મજ્ઞં સાલ્વવાક્યનિવેદિતઃ ॥
ગત્વા શશંસ રામાય સૈંહિકેયવિચેષ્ટિતમ્

તેન વાક્યેન રામોઽપિ રોષાદ્દૈત્યપુરં યયૌ ॥
રામદૂતે ગતે તસ્મિન્ દૈત્યાન્સાલ્વઃ પ્રચોદયત્

સન્નહ્યધ્વં વિજેષ્યામઃ સગણં ભગસૂદનમ્ ॥
તતસ્તે દાનવાઃ સર્વે સાલ્વવાક્યપ્રચોદિતાઃ

સન્નદ્ધા સ્વગૃહેભ્યસ્તુ રાજદ્વારમુપાગતાઃ॥
કુઞ્જરાણાં નિનાદેન શઙ્ખભેરીરવેણ ચ

રાજદ્વારે મહાઞ્છબ્દસ્તુમુલઃ સમપદ્યત॥
હુત્વા હુતાશનં સ્નાતઃ સાલ્વ સંપૂજ્ય ચ દ્વિજાન્

આરુરોહ ગજં મત્તં શૈલાગ્રં સવિતા યથા

વિનિર્ગતં દૈત્યપતિં સમીક્ષ્ય દૈત્યેશ્વરાઃ કાલસમાનદર્પાઃ ॥
ઊચુસ્તદા તં સમરેષ્વજેયમ જયસ્વ શમ્ભું યુધિ સંપ્રગૃહ્ય

ઇતિ શ્રીવિષ્ણુધર્મોત્તરે પ્રથમખણ્ડે માર્કણ્ડેયવજ્રસંવાદે શ્રભાર્ગવરામયુદ્ધે સાલ્વનિર્યાણં નામ પઞ્ચચત્વારિંશત્તમોઽધ્યાયઃ