વિષ્ણુધર્મોત્તરપુરાણમ્ · અધ્યાય 1.39

માર્કણ્ડેય ઉવાચ ॥
એવમુક્ત્વા ગતે શુક્રે ગવિષ્ઠો વાક્યમબ્રવીત્ ॥
રાજઞ્છુક્રસ્ય વચનં ક્રિયતામવિચારયન્

સ્વપ્ના હિ સુમહાઘોરા દૃશ્યન્તે ભયવર્ધનાઃ ।ઽ
ભવતાં હિ વિનાશાય રાત્ર્યન્તે સતતં વિભો

ભવાન્સ્વપ્ને મયા દૃષ્ટો રક્ત સ્રગનુલેપનઃ ॥
ઉષ્ટ્રેણ શિશુમારેણ વરાહેણ તથા વ્રજન્

તૈલાક્તાશ્ચાપરે દૈત્યાઃ ખરયાનમુપાશ્રિતાઃ ॥
પતન્તઃ પર્વતા દૃષ્ટા રાજઁસ્તે ભયકારણમ્

કેચિત્કૃષ્ણાંબરધરાઃ કેચિત્કૃસરભોજિનઃ॥
કેચિત્પઙ્કગતા દૃષ્ટાઃ કેચિદ્ભસ્મશયા ગતાઃ

કેચિદ્વિવસ્ત્રયા નાર્યા કૃષ્યન્તે દક્ષિણાં દિશમ્ ॥
કાચિદ્રક્તામ્બરા નારી નીયતે દક્ષિણાં દિશમ્

કેચિન્નૃત્યન્તિ ભૂપાલા હસન્તિ ચ તથાઽપરે ॥
કેચિન્મુણ્ડા મયા દૃષ્ટાઃ કેચિત્કાષાયવાસસઃ

ચણ્ડાલસ્કન્ધગાઃ કેચિત્કેચિત્કિંશુકસંસ્થિતાઃ ॥
ગજાશ્વપત્તિસૈન્યેન સર્વેણ ચ ભવાન્યુતઃ

વાપીં સુકલુષાં પ્રાપ્ય નિમગ્નો ગોમયે હ્રદે ॥
રાજશ્રીશ્ચ મયા દૃષ્ટા શક્રાલિઙ્ગનતત્પરા

તસ્ય મે રોચતે સન્ધિસ્તવ શક્રેણ પાર્થિવ ॥
પ્રાણાન્રક્ષત ભો રાજઞ્જીવન્ભદ્રાણ્યુપાશ્નુતે

સાલ્વ ઉવાચ ॥
યદૈવ ભગવાન્વિષ્ણુઃ શ્રુતઃ શત્રુર્મયાઽનઘ ॥
તત્રૈવ દેવ તચ્છ્રુત્વા રાજ્યં ત્યક્તં તથા મયા

ઇષ્ટં યજ્ઞૈસ્તપસ્તપ્તં રાજ્યં કૃતમકણ્ટકમ્ ॥
મૂર્ધ્નિ સ્થિતમમિત્રાણાં સુહૃદઃ પરિપાલિતાઃ

ધૃતો ભૃત્યજનઃ સર્વઃ કૃતકૃત્યાસ્તતો વયમ્ ॥
ગોવિન્દાન્મરણં પ્રાપ્ય ભૂયો રાજ્યં ભવિષ્યતિ

માર્કણ્ડેય ઉવાચ ॥
ઇત્યેવ વાક્યં તુ નિશમ્ય રાજ્ઞો મેને તદાયુક્તતમં ગવિષ્ઠઃ ॥
તૂષ્ણીં બભૂવાઽથ સુનિશ્ચિતાત્મા મેને ચ દૈત્યાન્સમરે વિનષ્ટાન્

ઇતિ શ્રીવિષ્ણુધર્મોત્તરે પ્રથમખણ્ડે માર્કણ્ડેયવજ્રસંવાદે સ્વપ્નાધ્યાયો નામૈકોનચત્વારિંશત્તમોઽધ્યાયઃ