Vishnudharmottara Purana · Chapter 1.32

// mārkaṇḍeya uvāca // //
sarvadevātidevasya brahmaṇastanayo bhṛguḥ //
paulomyāṃ janayāmāsa cyavanaṃ bhagavānbhṛguḥ

yayātijā sukanyāpi cyavanādbhṛgunandanāt //
ātmavānaṃ dadhīcañca janayāmāsa dhārmikau

ṛṣipatnī mahābhāgā cā''tmavānasya nāhuṣī //
aurvaṃ saṃjanayāmāsa ṛcīkāparasaṃjñitam

yena krodhābhibhūtena dṛṣṭo'gnirvaḍavāmukhaḥ //
tasya satyavatī bhāryā kauśikī gādhijā śubhā

tasyāṃ sañjanayāmāsa putrāṇāṃ śatamūrjitam //
jamadagniśca vatsaśca teṣāṃ śreṣṭhatamāvubhau

strīṇāṃ caruviparyāsājjamadagnirajāyata

vajra uvāca //
kathyatāmme yato brahmanvāḍavasya ca saṃbhavaḥ //
saṃbhavaṃ jamadagneśca śrotumicchāmi tattvataḥ

mārkaṇḍeya uvāca //
bhṛgūṇāṃ haihayānāñca vairamāsītsudāruṇam //
dhanahetostadā pāpairhaihayairbhṛgavo hatāḥ

ye'pi garbhagatā bālāste'pi taiviniṣūditāḥ //
garbheṣu hanyamāneṣu ṛṣiḥ paramaduḥkhitaḥ

aruṇaṃ dhārayāmāsa garbheṣṭaṃ dīptatejasam //
pūrṇe kāle tadā bāla ūruṃ bhittvā vyajāyata

jātamātrastu cukrodha devatānāṃ mahātapā //
haihayairhanyamānānāṃ bandhūnāṃ sumahātmanām

bhavadbhirna kṛtaṃ trāṇaṃ tasmātsarvāñśapāmyaham //
taṃ kruddhaṃ pitaro hantuṃ vārayāmāsurojasā

krodhaḥ putra na kartavyaḥ sa hi śatrurnṛṇāṃ sadā //
vayaṃ sarve jitakrodhāḥ kṣatriyairvinipātitāḥ

asmākaṃ na vadhe śaktāḥ kṣatriyā haihayādhipāḥ //
evamuktaḥ pitṛgaṇairṛcīkastānathā'bravīt

na hi me śāmyati krodho yuṣmannidhanakāritaḥ //
tasmāddevagaṇānsarvānnihaniṣyāmi tejasā

etasminneva kāle tu mahītoyasamākulā //
jagāma śaraṇaṃ viṣṇuṃ sarvabhūtabhavodbhavam //

śrībhagavānuvāca //
devānprati samutpannaṃ krodhamaurvasya yacchubham //
taṃ praviśya grasiṣyāmi toyaṃ sarvaṃ vasundhare

mārkaṇḍeya uvāca//
ityevamuktvā vasudhāmaurvaṃ krodhaṃ samāviśat //
bhūtvā ca vaḍavāvaktrastaccharīrādvinissṛtaḥ

na trātāro bhaviṣyanti putra sarve divaukasaḥ //
krodhaścā'yaṃ tava vṛthā na bhaviṣyati putraka

evamuktastu bhṛguṇā ṛcīkā'gnimabhāṣata //
pūrvottare samāsādya samudre vasa putraka

/
pibam̐statra sadā vegamambhasāṃ sumahādyute //
asmākaṃ tu kule bhāvī kṣatradharmā dvijottamaḥ

kṣatriyāṇāṃ samucchedaṃ yaḥ kariṣyatyanekaśaḥ ///
evamuktastu pitrā vai pibanmāsāṣṭakaṃ jalam

caitramāsaṃ samārabhya nityamāste sukhī jale //
pītaṃ māsāṣṭakaṃ toyaṃ jaṭhare bhasmasādgatam ///

kṛtkṛtya māsām̐ścaturaḥ śiśirākhye mahītale //
nityaṃ himoghaṃ sṛjati tasmādapi samīraṇaḥ

himācale pātayati pravāho nāma pārthiva //
eṣā toyāddhimotpattirhimatau yasya saṃbhavaḥ

vṛddhikṣayavihīnasya kathitaṃ tava dhārmika

utpattireṣā tava vāḍavāgneḥ proktā mayā bhūmipatipradhāna //
śrutvā'pi yāṃ muñcati mohajālaṃ saṃsārajāteśca yathā prabuddhaḥ

iti śrīviṣṇu dharmottare prathamakhaṇḍe mārkaṇḍeyavajrasaṃvāde vaḍavāgnyutpattirnāma dvātriṃśattamo'dhyāyaḥ